Myanmar ram Diocese pakhat ah zarhkhat sung ah mino thawngkhat lai in confirmation sacrament ngah (March 9, 2023)

Myanmar ram Diocese pakhat ah zarhkhat sung ah mino

Myanmar ram Diocese pakhat ah zarhkhat sung ah mino thawngkhat lai in confirmation sacrament ngah

March 9, 2023

           A liam zo mi February thla ih zarh khat sungah Myanmar ram Myitkyina Diocese ah mino mipa nunau komin mi thawng khat lai in Confirmation timi Chrisma thapeknak Sacrament an ngah. Sacrament petu cu Cardinal Charles Bo a si ih, Sacrament ngah tu hi mipum 1173 an si.

           Chrisma thapeknak Sacrament ngah tikah Catholic zumtu Khrihfa pawl cu Thiang thlarau laksawng hleice takin an ngah ih Kohhran hrang rian tuan dingah thazang cahnak khal pek an si.

           Vicar General Msgr. Peter Hka Awng Tu in, “Chrisma thapeknak Sacrament a ngah tu pawl hrangah zohthim tlak zumtu tha ngaingai an si ding hi a thupi tuk,” ti’n a sim.

           Pawlpi zirhnak CCC Cabu, 1285 sungih kan hmuh vekin, Chrisma thapeknak Sacrament ngah tikah Baptisma ngah lai ih comi zangfahnak thluasuah cu Thiang Thlarau in a famkim ter ih cuti cun Chrisma thapeknak a ngah tu pawl cu an tuahnak le an tongkam in an zumnak humhim ding le karh ter dingah hleice takin tuanvo pek an si. 

           February 17 ah Tanghpre Parish ih Queen of Heaven biakinn ah mi 209 in Confirmation an ngah. February 18 ah Namti Parish Namti Myo OO ih St.Dominic biakinn ah mi 207 in an ngah. February 19 ah Moe Nying Parish Nan Si Aung khua St. Francis Xavier biakinn ah mi 215 in an ngah. February 20 ah Moe Nying parish Nammawn khua ah mi 112 in an ngah. February 21 ah Myotit Gyi parish St.Michael biakinn ah mi 185 in an ngah ih February 23 ah PalaNa parish ih Jesu Thianghlim Thinlung biakinn ah mi 245 in an ngah.

           Datareportal.com ih an simnak vekin 2023 January ah Myanmar mipum 54.38M an um. Myanmar ah Catholic cu mi malsawn an si. Myitkyina diocese web ih an sim nak vek a sile, Myikyina diocese ih mipum cu 2,500,000 hrawng an siih Catholic mipum cu 91,055 an si. Myitkyina Diocese ah parish 32 a um ih Diocese hrang rian tuan tu Puithiam 56 an si.

           Himi thuthang cu RVA thuthang ihsin kan don mi a si.

https://bit.ly/3J6zyk1

Add new comment

3 + 0 =