Nauhak pakhat in Bawi Jesuh hnenih a kuat mi ca a kum 82 a kim lawngah rin lo pin a hmu sal (August 10, 2021)

Nauhak pakhat in Bawi Jesuh hnenih a kuat mi ca a kum 82 a kim lawngah rin lo pin a hmu sal

August 10, 2021

         A nauhak nunram ah Bawi Jesuh hnenah a rak kuat mi ca cu a kum 82 a rei hnu lawngah a hmu sal ih a rak ngan mi cun a ca siar tu pawl a hip thei ih ruahnak a phunphun a pe ter. Cui ca cu leitlunhuap veihnihnak ralbuainak thok hrawngih a rak ngan mi a si. Cui ca cu ca ngan tu ih aansuai pakhat ah a an rak tong. A rak ngan tu cu mi mawi zet mi Pierre a si. A mah cu France thlanglam, Tarn khayaing, Mazamet khuapi ih um a si. A rak ngan kum cu 1939, December 17 ni ah a si.

Ca sungah duhdawt zet mi Bawi Jesuh:

            Hmaisabik nak Bawi Jesuih Thi le Sa sang dingah tim ka tuah rero lai. Tui kum cu zuk pawl keng lo dingah zaangfah ka lo dil. Tu vek zaangfah ka lo dil nak cu na hnenih ka lungawi ruangah a si.Ka pa khal in kilkhawi sak dingah zaangfah lo dil ka duh. Leitlunhuap ralbuainak khal zamrang ten daiter hram aw. Cu lawngah hmun hlapi ih ralbuainak ah feh in do awk dingah tlunlam ih thupek suah a tul nawn lo ding.Cui ca a ngan ih cabuai pakhat ih aansuai sungih a rak retnak cu kum 82 a rei hnu lawngah a dang innsungsang pawl thawn an rak tong awk. Ca ngan tu ih innsungsang pawl cu dinhmun a phunphun ruangah an inn zuar in hmundang ah an rak thawn a bang.

             Cui ca cu rin lo pin an rak hmu sal ih an siar theh hnu ah an thin a nuam lo zet. Ziangah tile Pierre cu hmaisabik Bawi Jesuih Thi le Sa a sang hrih lo nan zumnak tum zet nei tu a si. Ca ngan tu tong thei sal dingah an rak zuam. Cui ca rin lo pin a rak tong tu cu innnei tu ih theih mi fanu Laura a si. Cui ca cu facebook ah a rak tarlang. Cu lawng ah ca a ngan tu hmu thei in an thei ding a si. A dam lai ah siseh, dam lo in hmu theih nawn lo a si le a innsang pawl hnen pe sal dingih tumtah mi a si. A mai facebook  cahmai ah a mah in ‘Kan innsungsang in man a nei zet mi innsang thilri hlun pawl lak ih thuh mi thil mankhung pakhat an hmu bet. Cui thilri mankhung cu a nei tu hnenah siseh, a innsungsang hnenah an pek duh. Ziangah tile tuar mi thil cu pek sal kan duh tiah a rak tarlang.

Bawi Jesuh hnenah ca a rak kuat tu nauhak

         France ram ih mi theih tam zet mi Catholic cahmai pakhat a si mi Famille Chretienne ah an tarlang ih cui ca ngan tu hawl bawm dingah Laura in zaangfah a rak dil.  A mah dinhmun in ca ngan tu ih hmin ‘Joseph,’ ca a ngan nak hmun le nithla zianghman a tel lo. Tu vek in media ih tarlang hlan ah hmaisa ah an ti thei tawk in an rak hawl. Diocese ih Sacramentu pawl ih hminsinnak pawl, tlawng pawl ih hminsinnak pawl ah an rak hawl. Asinan, an rak hlawhtling lo. Cui hnu ah a facebook cahmai ih tarlang dingah a thinlung a rak botcat. A rak ngan mi ca tawi te a rak share tu 7000 tiang an rak um.  A facebook cahmai ah tarlang in ni malte a rei hnu ah cui ca nei tu a si mi Pierre ih a fanu thawn pehtlaih awk nak an rak ngah.

         A fanu thawn an pehtlaih awk hnu lawngah Pierre in hi ca a rak ngan lai ah kum sarih lawng a rak si lai. A mah cu a suahnak khua Mazamet ah an rak um. A kum ruangah a thluak a tha tuk nawn lo ih hi vek ih a rei zet mi thuhla pawl a theih nawn lo thu a rak ngan mi a nei tu in a rak tarlang mi a hngetkhoh mi thuhla tampi a um. Tahthimnak ah hmaisabik Bawipai Thi le Sa a rak san lai le Christmas tha pek nak Sacramentu a rak lak lai ah hngilh thei lo mi tampi a rak tang. Hmaisabik Bawi Jesuih Thi le Sa a rak san lai ah nuam aw zet in thinlung sungah a tang lai.Cu vek in Pierre khal in ‘Nau te Jesuh in ka lo hngak rero. Ka duhdawt mi zaten thluasuah pe hram aw’ tiin duhnung zet in a rak ngan. Netabik ah cui man a nei zet mi hminsinnak tampi a nung ter tu catlang nei tu an tong sal zo.

         Hi thuthang cu Aleteia thuthang in kan ngah mi a si.

https://bit.ly/3jLBh1f