Nauthlak dingah tumnak in runsuak mi naute 14 Bishop in Baptism pe thei. November 8, 2021

Nauthlak dingah tumnak in runsuak mi naute 14 Bishop in Baptism pe thei.

November 8, 2021

            2021 September thlacem lam ah Alcala de Henares Diocese ih Bishop Juan Antonio Reig Pla cu naute 14 Baptism a pek. Cui naute pawl cu thlak dingih a hmun an thlen laiah John Paul II runnak pawlkom in tikcu khel in an run thei mi naute pawl an si. Himi pawlkom cu dinhmun a phunphun ruangah ngah mi naute pawl thla dingah a thleng tu nu pawl thuhla thawn bom nak pe in a bom tu pawlkom a si. Harsat nak ah himi cu hril mi pakhat tiin thu botcat tu pawl hnen a dang a cang thei mi pawl sim fiang in an bom theu. Ziangruangahtile thenkhat nauvon pawl cu nau thla nak tha pe tu pawl in thlem in, a zum tu pawl khal an um.

Nauthla ngah loin run ngah mi naute pawl

            John Paul II bom tu pawlkom sungtel pakhat asimi Marta Velarde in nunau thenkhat le naute thenkhat pawl ih thuhla pawl cu pawlko ih facebook ah a ngan.

Marta ih thu

            Hi pawlkom ih bomnak a ngah tu pawl lakah Marta timi nunau pakhat khal a tel. Amah cu a pathumnak fanu khal asimi nau thlak dingah a then laiah a naute cu thla 10 a kim zo. Nau a von pek te cu pulh nat a um caan a si.  A kiang ih um mi pawl in nau thla dingah tha an pe. Cu tiin nauthlak nak zungah phone thawn a biak. Minung nunnak a duh zet tu Pathian ih duhnak tiin ti ding a si. Ziangruangahtile amah cu nauthlak nak zung ih phone le St. John Paul II nauvon nu pawl nauthlak nak in a bom tu pawlkom ih phone thawn a biak sual. Marta cu khat lam ih phone kai tu thawn reipi an biak awk hnu ah cui pawlkom sungtel pakhat thawn tong aw dingah thu a bot cat. Tong aw ih an biak awk tikah Marta cu na pi'n a tap. Ziangruangahtile nauthla dingah a ruat ruangah a thinlung a dai thei lo. A ruah nak pawl a von mang. Nau nu te a neih hnu Baptism a ngah zan ah minung nunnak that ding hnakin run ding ah a hril thei ruangah a lungawi nak cu sim ban ding a silo.

Ana thu

            Ana cu Marta vekin St. John Paul II pawlkom ih bomnak a ngah tu a dang pakhat a si. A thok lam ah anih khal thu botcat thiam loih aum hnu netabik ah naute ih nunnak hril ding ah, nei dingah thu bot cat tu a si. Thlak dingah a hril mi naute cu a fa 5 nak fanu asiih, cutiih a ruah caan ah a pumsung nau cu thla 5 a si zo. A nunram felfai ter dingah a harsa zet. Cutivekin a fanu Baptism ngah dingah thu bot cat ding khalah kum tampi a rei. Ana cu harsat nak karlak ih ummi pakhat asi thei. Asinan cui a ton mi pawl pahsuak thei dingah, thil pakhatkhat tuah dingah thu bot cat hlan ah thureltlang nak theih nak, thiam nak a zir tiin Velarde in a sim.

Mariana ih thusim mi

            St. John Paul II pawlkom ih bom mi a pathum nak nunau cu Mariana a si. Amah cu nau thlak nak siizung ih a feh laiah bom tu pawlkom pakhat thawn an tong aw. Cutiih an ton awk caan ah amah ih caan thleng dingah minute 10 lawng a tang. Mariana cu pawlkom sung tel pakhat thawn an biak awk hnu nau thlak dingih a ruah nak a thin. A innsang pa hnenah thilcang mi pawl a sim ih an ton dingmi sawmnak, buainak pawl ruangah a pasal in Mariana cu a tan ih a thlan. Thinlung a thleng tu Mariana ruangah a nau taktak hman in a bawm lo.

            Mariana  cu hnatuan nei lo in a um. Bawmtu khal a nei lo. Asinan mi bom tu pawlkom ih bom nak angah. Nau von nak cu a har. Mi bom tu pawlkom cu ziang tluk in a har asikhalle Mariana ih tul mi pawl an bawm. Nau a neih tikah nau thla dingih thu a botcat tu a thinlung thleng dingin a bom tu ih hmin a pek. Baptism ngah ding asi tikah a fa lawng siloin, amah khal Baptism a ngah hrih lo ruangah caan malte a rei hnuah nu le naute Baptism an ngah. Baptism a ngah hlan amah cu Schoenstatt Bawinu lungdawl ah khawmzawh in a feh. Cuini ah nau hak pawl cu a hmaisabik Missa an sang. A tu ah a mah cu hnatuan a nei zo. Rualpi pawl, fa thawn a um zo. A nunram thu cu nunau dang hnen ah a hlawm.

            Nunnak run thei dingah tong duh nak thinlung, thungai duh nak thinlung, bom duh nak thinlung pawl neih ding. Himi daan cu Bawi Jesuh Gospel thuthangtha sungah in hmuh. Mah vekin midang pawl duh dingah, ziangruangahtile anih khal in hivekin in duh. Kan neih mi pawl, thlarau laksawng pawl khal midang a tul tu pawl hnen hlawm ding ah in zirh.

            Nunau tampi cu nauthlak nak an hril. Ziangruangahtile ton mi harsat nak pawl pah suak thei dingah a dang hril mi a um lo tiin an ruat. Curuangah anmah pawl hnen dik lo mi thu hnak in anmah pawl sim fiang ding. An thu botcat nak cu ziang tluk in a tha lo timi thei dingah sim fiang ding. Anmah pawl pek dingmi bomnak pawl cu tuah taktak dingah kanmah ih tuah ding a si. Cui thu khal in thei thiam ter ding.       

            Ni netabik thuthen nak ah Bawi Jesuh hnenah "nau ka von zo, nei dingah ka tih caanah ka buai rero caan ah nangmah in a thim mi ka mit in vangter sak. Zangfah nak thawn in kil khawi. Umnak in pe. In bawm ih hnatuan in pe. Ei ding in pe. Hruk ding in pe tiin sim thei hram uh. Himi thuthang cu Aleteia thuthang ihsin kan don mi a si.

https://bit.ly/3kTYj7B