Neta lam ah Pope a cang leh tu ding Yatih pakhat in a rak din mi Basilica Biakinnpi ih khualtlawnnak September 8, 2021

Neta lam ah Pope a cang leh tu ding Yatih pakhat in a rak din mi Basilica Biakinnpi ih khualtlawnnak

September 8, 2021

          Collemaggio tlangih Santa Maria Biakinnpi cu Pope Celestine V (5) in a rak din. Pope in a mai ‘ngaidamnak’ ti mi capi (Papal Bull of Forgiveness) hrangah mansalnak le Pope thawn pehpar mi hauhruang tanta daan pawl a rak din thok ruangah Biakinnpi a rak din. Italy ram, khuapi laifang Abruzzo hmunih sak mi L’Aquila khuapi cu 2009 ih a rak cang mi linghnin hrekkhat ruangah a rak siat. Cui linghnin ruangah mipi 300 luan an nunnak a rak liam lawng si lo in thuthentu in ruat dingih a rak pelh mi linghnin lamih mifim hrekkhat khal thawng a rak thlak.  L’Aquila khuapi cu linghninnak hmun tiin mi tampi in an thei ko nan Pope dinhmun tansannak hrangah thuanthu a si mi Santa Maria di Collemaggio Basilica Biakinnpi tiin a hmin thang zet. Pietro hmin a nei mi Yatih pakhat cu Pope ah a cang ding.

          1274 ah Morrene khuapi ih Yatih Pietro (Celestine Yatih kaing dintu) cu lyon khuapi ih tuah mi Pawlpi thurelkhawmnak ih tel dingah L’Aquila khuapi lan in France ah a rak feh.Cin le daan vekin Fala Thianghlim Maria in a mah upatnak pek dingah Biakinn pakhat saksak dingin Yatih Pietro cu a zanmang ih a rak dil thu theih a si.1287 ah Celestine Yatih kaing sungtel pawl in L’Aquila khuapi deng ih um mi tlang pakhat an rak lei ih an rak sak thok.

          Pope Nicholas IV a rak thih hnu ah Pope thar pakhat hril dingah thurelkhawmnak kumhnih rei an rak tuah. 1294, July 5 ah kum 80 a kim zo mi Morrone khuapi ih Yatih Pietro cu Pope ih pulpit sawng dingah hrialnak a rak ngah. A thok lam ah cun a tlaitluang zet mi Yatih pakhat a si vekin Pope sinak cohlang ding hman a rak el. Asinan, thungainak thawn a rak cohlang sal. Yatih Pietro cu a mah rori ih a rak sak mi L’Aquila khuapi ih um Santa Maria di Collemaggio Basilica Biakinnpi ah Pope ih sinak pawl a rak cohlang ih Celestine V hmin thawn Pope pakhat ah a rak cang.

Kumtin indulgences ngah thei dingah biakinnpi ih khawmzawhnak

          A mai Pope a tuannak a rei lo nan hmaisabik ih a rak tuah mi pawl sungin pakhat a si mi ‘ngaidamnak capi’ (Papal Bull of Perdonanza or Forgiveness) ti mi a rak suah. Hi capi ah August 28 a si lo le 29 a thlen tinten indulgences (sualngaithiamnak thluasuah hleice) ngah a theih thu a langter. A mai dinhmun ai-awh tu Pope Boniface cu AD 1300 kim Jubilee kum ih zohthim tlak ah Rome khuapi ih khawmzawhtu pawl hnenah indulgences thluasuah an ngah theinak dingah hi khawmzawhnak an rak nemhnget.

Pope dinhmun tansan dingah lamzin sial sak nak

          Pope Celestine cu a thianghlim ih Biaknak lamah a hngetkhoh zet nan Pawlpi sung le lenglam thilri pawl, ramkhel le pawlkom hohanak thawn pehpar mi sambaunak pawl ruangah Pope pakhat dinhmun in rian a rak tuan hnu ah Pawlpi hotu in a rak cawl. Asinan, Pope sinak a banzan hlan ah Pope Celestine in tidaan pakhat mipi hmuh ah a rak tuah. A mah hnuih Pope pawl in cu vekin ziangvek ti daan hman rak tuah lo in hauhruang an rak tansan ruangah a rak thok mi tidaan cu Pope thuanthu ah hmaisabik ah a rak cang.

Basilica Biakinnpi ih tlawnnak

          L’Aquila khuapi ih um Basilica Biakinnpi cu a fate zet mi Basilica ah a tel ih 1327 ah Pope Celestine an rak vuinak hmun khal a si. Cu mi cu Abruzzo khuapi ih kutthiam thuanthu ah hminthang bik mi khal a si. Biakinn sungah luh hnuhnu cun a mawi ih a kau zet mi Biakkhawmnak tuah tu pawl ih hmunlak nak pawl, a mawi zet mi kutthiam pawl mangbangthlak zetin hmuh a theih. August 28 a si lo le 29 ni a thlen tinten Celestine Perdonanza tiin mi theih tam zet mi kum tinten Jubilee puaipi an tuah theu. Curuangah Biakinnpi ih a thianghlim zet mi Saangka pi ih thlanglam saangka tiih sunsak zet mi a si. 1313 ah Pope Clement V nak in Mithianghlim ah a rak khaisang ih a thianghlim zet mi Pope ih hminthannak a hleice in Pope hauhruang a tansan lai ah a mai a rak el nak le L’Aquila khuapi ih Jubilee puai pawl ruangah Biakinn pi ih a feh tu pawl thawn ropi zet in a um. 2009, ling a hnin hnu 2017 ah an rem tha sal. Cui hnu ah Europe ih thlun mi nunphung zungih thuanthu sungtel mi rothil laksawng a rak cohlang ih nemhnget mi a si.

          Pope Benedict XI in 2009, April thla ih a rak cang mi linghnin theh hnu ah L’Aquila khuapi ih um tu pawl tha a rak pek. Pope in a mai (Pallium) cu Santa Maria di Collemaggio Biakinn sungih um Pope Celestine ih thlaankua ah an rak ret tiah mi tampi in an zum. Kumli a rei hnuah Pope Benedict cu Pope sinakih a rak cawlhnak cu Basilica sungih rak tuah mi Pope ih hmailam caan mi tampi in an rak sim. A ngaingai ah cun Pope Benedict in Pope Celestine ih a rak tuah mi tidaan pawl a rak cawn mi a si.

          Hi mi thuthang cu Aleteia thuthang ih kan ngah mi a si.

https://bit.ly/2XVbb4Z