Nigeria Puithiam cu a tuanvo a theh ih a thlun hnu ah methal thawn kah tuar.

Nigeria Puithiam cu a tuanvo a theh ih a thlun hnu ah methal thawn kah tuar.

          Catholic Puithiam, Fr. Charles Onomhoale cu Benin khuapi, Nigeria Archdiocese ih a tuanvo pawl a theh ih a tlun hnu, June 07 ah methal thawn kah a rak tuar. Benin khuapi ih Archbishop Augustine Obiora Akubeze in, “mangbang zet in tui zing June 7, 2023 ah a umnak hmun ih a kir sal ah kah a rak tuar ti mi thuthang kan thei ih a ruak cu Edo State, Ikapoba Okha Local Government, Ikapoba Hill ih lamzin ah an tong,” tiah a rak sim.

          Fr. Onomhoale cu Aug 13, 2022 ah Puithiam cannak a rak ngah ih Nigerian Archbishop in a thlarau hrang thlacam sak dingah zaangfah a rak dil. Fr. Onomhoale cu Ikahueniro, St. Michael College ih Vice Principal dinhmun in rian  a rak tuan. Fr.  Charles Onomhoale hrang ruakvuinak Missa cu June 09, 2023 ah Bishop Kelly pastoral center’s chapel ah an rak tuah.Benin City Archdiocese ih tuanvo nei tu in, “riahsiatnak Bawinu hnenah ka lo ap,” tiah a rak sim.

          Nigeria ih Nnewi Diocese ih Catholic Puithiam, Fr. Stanislaus Mbamara cu June 02 ah an rak kai ih an rak thlah sal thu thuthang ah an tarlang. Penticost puai, Zarhpi ni, 2023 ah Owerri ih Nigeria’s Catholic Archdiocese ih Puithiam pakhat, Fr. Matthias Opara cu ruakvuinak ihsin a tlunnak ah kaih a tuar ih an rak thlah sal.

          Okigwe Diocese ih rian tuan rero tu, Nigerian Catholic Puithiam, Fr. Jude Kingsley Maduka cu May 19 ah kaih a rak tuar ih cui hnu nithum ah an rak thlah sal. 2022 ah doawknak thawn pehpar mi vei 39 a rak um ih a malbik Nigeria Catholic Puithiam 4 thah an tuar ih minung 30 an rak kai.

          CAN president, Archbishop Daniel Chukwudumebi Okah in may 29 ah, “Nigeria in a hngetkhoh ih a tlaitluang mi hohanak lam ah hniksaknak pawl a tong rero,” tiah a rak sim. Archbishop Okoh in “humhimnak lam thinharnak pawl ihsin pursum leilawnnak lam tiang, Nigeria in famkim zet ih tuah thei dingah tuah tul mi tampi a um thu a langter,” tiah a rak sim bet.

          Hi thuthang cu RVA thuthang ih kan ngah mi a si.