Nisuahnak lam a laifang ah Khristian pawl hmuhsuam nak pawl a um tiin Iraq Archbishop le Syria ih Sister in sim. (July 7, 2022)

Nisuahnak lam a laifang ah Khristian pawl hmuhsuam nak pawl a um tiin Iraq Archbishop le Syria ih Sister in sim

July 7, 2022

            Nisuahnak lam a laifannak ah Khristian pawl hmuhsuamnak a cang rero thu le farah nak pawl khal a um thu Iraq ih Archbishop pakhat le Syria ih Catholic Sister pakhat in kan dung tlawngkai nihnih, July 5 ah British upadi pawlkom sungtel pawl hnen a sim.

          Cui Archbishop cu Bashar Warda asiih, Erbil khuapi in a si. Sister cu Annie Demerjian asiih Aleppo khuapi in a si. ‘Aid to the Church in Need’s (ACN) tiih kawh mi pawlkom cu “atul mi Diocese pawl bomnak karuna pawlkom” asiih England ram khalah zung an phuan. Himi pawlkom cu ramtin ah mai zumnak zalen zet in zumnak lam thurelkhawmnak program an tuah.

          Rammi pawl cu mai zumnak pawl ruangah hmuhsuam an tuar bet thu le Aid to the Church in Need’s (ACN) pawlkom dinhmun in Khristian pawlkom ih an dinpi ruangah a lungawi thu, tlawng pawl ong thei dingah an bom ruangah khal an lungawi thu, ISIS pawl ih miphun cimit nak thilsual a tuar rero tu Iraq ih Khristian pawl fim zir nak lam ah tuan thei dingah an bom ruang khalah, hmuhsuam nak tuar tu Khristian pawl hrang khal ram tin in thei thei dingah an din pi ruang khalah an lungawi thu an sim.

          Sr.Annie khal in a tui Khristian pawl cu ralbuai caan hnakin an tuar sawn thu, Syria ram ih Pope aiawhtu Cardinal Zenari ih asim vekin Syria rammi zatek 90 cu an farah tiin an sim. Sister cu 2011, ramsung ralbuainak ihsin thokin harsatnak a phunphun a tuarmi Syria Khristian pawl a bom ti a si.

          England ram, Birmingham Diocese ih a cawl zo tu bawmtu Bishop William Kenny khalin hmuhsuam rero mi Khristian pawl thu hla thawn pehpar in tuahmawhnak a tam vivo thu an sim. Pope Francis dinhmun in a veithumnak leitlun ralpi a thokzo tiin a zum thu, asinan a darh rero thu, leipar ah a tam zet mi buai nak 40 luan a um thu a sim.

          Kan dung kum malte lai ihsin thokin Iraq ah Khristian mipum cu thinphang ding tlak in an mal. 1951 ih cazin laknak vekin Iraq ramsung ah Khristian mipum cu ram mipum ih zatek 6.4 an um ih atu cun 0.5 lawng an um. President Saduhu kutsungah Khristian tan 1-2 cu atuah 200000 tiang an tlak thu, nunphung, sumpai buainak pawl ruang khalah a vai tu pawlkhal an um ih Syria ram khalah Khristian mipum cu rammi pum ih zatek 10 cu 2011 ramsung ral a thok hnuah zatek 3 tiang an tla tiin an sim. Himi thuthang cu ACN thuthang ihsin kan donmi a si.

Photo courtesy of ACN
https://bit.ly/3OkhOC9