Philippines miphun pakhat Vatican ralkap cang (August 02, 2022)

Philippines miphun pakhat Vatican ralkap cang

August 02, 2022

         Philippines thi zate tel mi Philippines miphun pakhat cu Vatican ah rian tuan rero tu Swiss ralkap sungtel ah a rak cang.

         A hmin cu Sebastian Esai Eco Eviota tiah an ko. Kum (23) lawng a si lai. A mah cu Philippines miphun sungah Vatican ralkap cangtu pahnihnak a si. A mah cu Philippines ram ih thlanglam Davao ah a rak suak ih 2009 ah Switzerland ah a rak thawn.

         Vatican ralkap ih riantuan dingah thlahnih rei tindaan a rak kai. A pa cu Diomedes Eviota a si ih Surigao in a si. A nu cu Editha Eco a si ih (2000) ah a rak thi. A pa cu thuthentu (lawyer) a si ih (2002) ah a rak thi. A rualpi pawl in ‘Baste’ tiih an kawh mi ‘Sebastian’ cu Switzerland ram ih a thawn hnu ah Pawlpi ih pawlkom cangvaihnak pawl ah thatho ten a rak tel theu.

         Tu vekih cang dingah (Jan 17, 2022) ah ralbawi in a rak kawh mi a si. Vatican ralkap pakhat cang dingah (1) mipa si a tul; (2) Switzerland miphun si a tul; (3) Catholic kohhran mipi si a tul; (4) nupi nei hrih lo mi si a tul; (5) kum (19-30) sung si a tul; (6) ralkap tuan dah a tul; (7) thiamnak ah pakhat khat ah deploma (lole) buaih pakhat khat ngah a tul.

         Vatican ralkap mipum cu 135 an um ih Vatican ralkap a umnak hi kum 516 a kim thlang. Vatican ralkap cu Swiss ralkap ih kuthnuai ah a um.

         Sebastian cu Vatican ralkap dinhmun ih tuantu a pahnihnak Philippines miphun khal a si. A mah hlan ah Vincent Luthi in a rak tuan. A mah cu Oct, 2020 tiang a rak tuan. An tuanvo cu Vatican ih neih mi inn pawl siseh, Pope ih inn a si mi Castel Gandolfo siseh, Pope kilhim tu tuan a si. Kum 516 rei nak tuantu Vatican ralkap cu leitlunhuap ih nautabik mi ralkap a si ih kum reibik mi ralkap pakhat a si.

         Hi thuthang cu RVA thuthang ih kan ngah mi a si.

https://bit.ly/3VBUN2l