A pi ih zumnak thawn nauhak pahnih thlisia ihsin an luat ih dam cing in hmu sal December 21, 2021

A pi ih zumnak thawn nauhak pahnih thlisia ihsin an luat ih dam cing in hmu sal

December 21, 2021

         America ram, Kentucky ih rak hrang mi thlisia tuartu a tuule pahnih, a Pi in a tuule pawl tihnungza ihsin an luat ih a nung ter thei mi zumnak thawn nauhak pawl tikholhnak tili (Bath Tub) sungah ret in Bible Cathianghlim khal ret mi dinhmun ah a tuu pawl a run suak thei.

         A inn cu thlisia a hran caan ah Clara Lutz ti mi nunau cu tui sim bek in a vun thei sal ih a tuu pahnih tili ah re in lukham ret in, puan thawn tuam in Bible Cathianghlim khal tha ten a ret. Kaden, thla 15 fapa te le Dallas thla 3 fate pahnih cu an pi ih ralring ten zumnak famkim thawn a tuah mi ruangah an rak luat ih thlisia theh ah a rak hawl hmu sal thei.

         ‘Ka kut pawl an thia, tili in si lo in ka kiangin a suak. Ziang tuah ding ka thei nawn lo. Pathian lawng ka tul’. Bawipa in zaangfah hram aw. In run aw. Nauhak pawl ka hnenah hruai kir sal hram aw tiin thla a cam. Nauhak pawl khui tawk an thleng ti khal ka thei lo. Thlacam phah in ka hawl. Thlisa a reh tikah milai nunnak runtu pawlkom pawl in tili ah a it mi nauhak pawl an hmu ih an va run.

         Hi tili ah ka tuu le pawl an tel ih thlisia a reh zaan ih hmuh mi tikholhnak tili a si. Hi vek thil pawl ah Pathian ih sunlawinak thangthat lo a si le ziang vek caan ah thangthat ding ti ka thei nawn lo. Ka tuu le pawl Pathian in a hruai kir sal. A mah thangthat ka bang dah lo ding. Thil ti mi cu aiawh a theih. Asinan, minung cu a ngah lo. Pathian ih duhnak ka hawl rero. Neta tla ka hawl bet hrih ding tiah an pi in lo ih thuthang zungah a rak sim.

         December 10, 11 ih rak hrang mi thlisia cu Kentucky, Arkansas, Missouri, Illinois le Tennessee pawl ah a rak hrang ih mipum 89 an nunnak an rak liam. Naute le a pi pawl ih umnak hmun Kentucky ah mipum 76 an nunnak an rak liam tiah an sim.

         Hi thuthang cu Aleteia thuthang ih kan don mi a si.

https://bit.ly/3Em9XyZ