Pope in Cardinal pawl council ah sungtel thar ret (March 8, 2023)

Pope in Cardinal pawl council ah sungtel thar ret

March 8, 2023

           Pope Francis in ahlan ih council thuneihnak kum a cem ruangah tlawngkai nihnih ah a thar in thuron pe tu pawl a din sal. Cardinal pawl council 'C9' ti tla ih theih mi cu leitlun pi ih kohhran uk nak ih Pope Francis bawm tu a si.

           Hi council thar ih Cardinal sungtel thar pawl cu Vatican secretary Cardinal Pietro Parolin (68), Vatican city uknak ih President Spain Cardinal Fernando Vergez Alzaga (78), Kinshasa ih Archbishop Congolese Cardinal Fridolin Ambango (63), Bombay ih Archbishop India mi, Cardinal Oswald Gracias (78), Boston ih Archbishop American mi, Cardinal Sean Patrick O'Malley (78), Barcelona ih Archbishop Spanish mi, Cardinal Juan Jose Omella (76), Quebec ih Archbishop Canadian mi, Cardinal Gerald Lacroix (65), Luxembourg ih Archbishop Synod cangsuak dingih tawlrel tu Cardinal Jean Claude Hollerich (64) le San Salvador de Bahia ih Archbishop Brazilian mi, Cardinal Sergio da Rocha (63) pawl an si.

           Bishop Marco Mellino cu commission ih secretary(sungtuan) dinhmun ih hnatuan tu dingah tuanvo pek a si. Council sungtel dinhmun in hnatuan peh dingah thuneihnak thar ter sal lo mi pawl cu Cardinal Oscar Rodriguez Maradiago (80), German Cardinal Reinhard Marx (69) le kum 80 asimi Vatican City State ih President Cardinal Giuseppe Bertello te pawl tla an si. Cardinal Giuseppe Bertello cu Cardinal Fernando Vergez Alzaga in a aiawh.

           Pope Francis in 2013 September 28 ah Roman Curia tharsuah sal ding tumtahnak thawn C9 a rak din mi a si. Council thar sungtel pawl cu April 24 ah Pope ih umnak Casa Santa Marta ah tongaw khawm ding an si. Netabik tonawknak cu 2022 December ah an rak tuah ih a tui Synod le adang thulu pawl thawn an tuah mi a si.

           Himi thuthang cu RVA thuthang ihsin kan don mi a si.

https://bit.ly/3YxGsnN