Pope Francis cu Mongolia Bishop thar thawn tong aw August 12, 2020

Pope Francis cu Mongolia Bishop thar thawn tong aw

August 12, 2020

            Pope cu August thla 8 niah Bishop sinak a latu Italy Pathian hnatuan tu thawn nithum niah an tong aw. Bishop thar hnenah Mongolia Catholic Diocese hoha dingah sinak a pek a si. Bishop Giorgio Marengo cu kum 46 lawng asi laiih, Italy hrangih hna a tuan tu Pathian hnatuan nak pawlkom pakhat asimi Consolata missionary sungtel Siangbawi pakhat a si. Mongolia ah Pathian hna a tuannak cu kum 17 asizo ih, amah cu aliam zo mi April 2 ah Ulaanbaatar ih Diocese ih tuanvo nei tu tiin sinak an pek.

            Amah ih Bishop cannak canserh cu Bishop Luis Tagle in a hoha ih, Italy ram, Turin khuapi ah August thla 8 ah an tuah. Pope Francis thawn mah le mah rori in an tong aw ih, thazang pek nak asim ruangah a lung a awi tuk thu August 12 Pope thawn an ton awk theh ah a sim. Pope Francis cu Mongolia ih Diocese le Mongolia miphun pawl a duh tuk. Pope cu Catholic mipi tampi an um lo nan, Kawhhran an duh tuk thu lungawi zet in a sim.

            Missa raithawi nakih hoha tu Bishop Luis Tagle khal in "Nangmah cu na thinlung, na tong, na hnih cu Mongolia ih mipi pawl, mi tontai pawl, nat tuar tu pawl, horkuam le van ah Jesuh Khrih ih thuhla sim dingah cang ter aw. Bishop thar pakhat dinhmun in Jesuhih zangfah lainat nak sim ding lawng kha porh awk ding a um. Bishop thar cu Italy saklam Piedmond ah a suak ih, Turin khuapi ah a thanglian. Catholic Siangbawi cazir nak cu Rome ih Gregorian phunsangtlawng ah a zir. Cui hnuah Master le puah cu Urbaniana phunsangtlawng ah a ngah. Amah cu Mongolia ih Pathian hnatuan tu Siangbawi tiih hna a tuan lai ah Pathian thu sim nak program a ngan ih a hmuh thei. Himi program a hmuhnak cu tui lai mino pawl cu Bible saya tiin hna tuan thei dingah a tumtah. Caruangah Pathian thu zir nak cu menmen siloin, Theology le Diocese le a thuhla pawl khal a zing zoi bet.

            Mongolia ram cu mipum tan 3 luan an um ih Catholic mipi 1300 lawng an um. Ulaanbaartar ih Diocese tuanvo cu rampumpi ih a karh zai mi Kawhhran mipi pawl a kilkhawi. Mongolia ah Bishop pakhat asinak cu Nu Pawlpi ih ahmaisa lamih Kawhhran hoha tu Bishop pakhat ih Pathian hnatuan nak thawn a bang aw. Mipi cu an mal tuk. Cutivekin Kawhhran mipi khal an mal.

            Catholic sinak a latu Mongolia ih Kawhhran mipi pawl cu ralthazetih hril nak a siih, Jesuh Khrih dungthluntu si dingah Catholic Kawhhranpi ih then khat sidingah sawm nak a si. Mongolia ah Catholic Pawlpi cu 1922 kum ah a thlen ih, Bawinu ih a thianghlim zet mi thinlung Pathian hnatuannak pawlkom hnenah an ap.

            Communist san ah Kawhhan ih hminsin nak pawl langter a ngah loih mi tampi ih theih hlan ah hrinhro nak le hmuh suam nak pawl an ton nak cu kum 1992 tiang a si. 2002 a thlen tikah Ulaanbaatar Diocese cu Bishop ih kilkhawi mi Diocese ah an thangso. Cumi Pathian hnatuan nak cu culaiah Bawinu ih a thianghlim mi thinlung Pathian hnatuan nak pawlkom ih hotu a simi Fr.Wenseslao Padilla hnen an ap ih, Bishop sinak a ngah. Bishop cu 2018, September ah a nun nak a cem. Mongolia ih Siangbawi pakhat cu 2016 ah Bishop si nak an pek. Mongolia Catholic mipum cu an mal tuk ruangah zum nak a bang aw lomi biaknak khat le khat, nunphung um daan khal hlawm aw dingah a tul. Tiduhsan cu kiangkap tong zir diangah caan pek ding a si.

            Cutilawngah an lak ah tel a thei ding. Biak awk a theih ding. An man neih ter mi an duh mi thil pawl upat a theih ding. An thuanthu, an nunphung, an biaknak hram pawl khal theih a si ding. Cutivekin zingzoi rero laiah kan neih mi man a khung mi lungmankhung thawn a bang aw mi Gospel ih man khal hlo lo dingah, tangdor ten ziang tin kan sim ding. Bishop thar ih thulu cu "Amah zoh aw. Na tleu sinsin sing" timi a si. Bishop thar cu a ra lai dingmi September thla covid-19 a zia deuh caan ah Mongolia ah tlung dingin a tum. Himi thuthang cu CNA thuthang ihsin kan ngah mi a si.

https://bit.ly/311GD0s