Pope Francis ih Hungary le Sloviakia ramah tlawng ding

Pope Francis ih Hungary le Slovakia ram ah a tlawnnak ding a tuukhaal khual tlawnnak caan serh pawl thawn a khat

July 21, 2021

         Pope Francis in hi khualtlawnnak cu a pumpi operation a tuah thluh hnu thlakhat hrawng a rei ding mi khualtlawnnak cu a ralai ding mi September thla ih feh dingah tim a tuah. Rome khuapi in September 12, Zarhpi ni ah a pok dingih September 15 ni, tlawngkai nithum ni ah Rome khuapi ah a thleng sal ding.Hi khualtlawnnak cu feh lam le tlun lam nili a rei ding. Pope cu Rome khuapi in September 12, zing nazi 6:00 am ah Fiumicino airport in a pok dingih Hungary ram ih khualipi Budapest khuapi ih airport ah zing nazi 7:45 am ah a thleng ding. A thlen hnu nazi 6:00 hnu ah Hungary ram ih minister Viktor Orban le President Janos Ader pawl thawn an tongawk ding a si. Cui hnu ah Hungary ram ih Catholic Bishop thawn siseh, a dang Khristian unau pawlkom pawl ih ai-awh tu pawl thawn siseh, Jew pawlkom thawn khal an tongawk ding.

          Pope Francis in ram huap thawn pehpar mi Bawipai Thi le Sa Congress ih a cem nak lam Missa sumnak a hoha ding. Cui hnu ah zaanlam 2:40pm ah Slovakia ram ah a feh dingih nazi pakhat hrawng lawng a rei ding. Asinain, Pope ih nikhat sung a caan hman mi cu cem hrih lo in Bratislava ih um Pope ai-awh tu ih zung ah Khristian pawl thu relkhawm nak ah a tel ding. Cui hmun ah ramkhel thu an rel dingih Pathian rian tuan rero tu Jesuit Puithiam pawl thawn khal an tongawk nak an nei ding.

          Tlawngkai nihnih ah Kosice khuapi ah a feh dingih St. John Chrysostom ih Byzantine ti dan thawn thla a cam ding. Cui hnu ah mi mawl sawn a si mi hnon a tuar mi Rome ti dan a hmang mi kohhran mipi pawl thawn an tongawk ding. Bratislava ih a feh hlan te ah Kosice mino pawl thawn an tongawk ta ding.Tlawngkai nithum cu Pope ih tui a khualtlawnnak netabik ni a si ih National Museum ah a feh dingih Slovakia Catholic Kohhran mipi pawl ih nitin Pathian Biakkhawmnak caanserh ah a tel ding. Cui Biakkhawmnak hmun ah ‘Riahsiatnak Bawinu’ zuk an ret ih upatnak an pek ‘Riahsiatnak Bawinu’ cu Slovakia ram kilkhawitu Bawinu a si. Soviet Russia thuneihnak laiah tui Biakkhawmnak caanserh kumkhat hman an pelh dah lo. Pope in cui hmun ih a thleng tu Bishop pawl thawn Missa sumnak tuah hlan ah thla an cam tlang ding.

          Missa raithawinak theh hnu ah Rome khuapi ah zaanlam 1:45 ah a tlung sal dingih Rome tikcu caan 3:30pm ah a thleng ding. Khualtlawnnak cu nili a rei ko nan Pope cu caanserh zaten 20 hrawngah a tel ding tiah Vatican thuthangin a than a si.

          Hi thuthang cu Rome Reports thuthang ih kan don mi a si.

https://bit.ly/3rv7Ion