Pope Francis ih Kazakhstan ram a tlawnnak ding (a vei 38nak tuukhal khualtlawnnak) canserh hman dan ding  cepniar pawl Septemper 13 ah Vatican ih thuthannak zung in tarlang. Sep (Sep 11, 2022)

pope_francis_ih_kazakhstan_tlawnnak_ding_tikcu_caan_nepnawi.

Pope Francis ih Kazakhstan ram a tlawnnak ding (a vei 38nak tuukhal khualtlawnnak) canserh hman dan ding  cepniar pawl Septemper 13 ah Vatican ih thuthannak zung in tarlang. Sep (Sep 11, 2022)

               Kazakhstan ram cu continent pahnih karlak ih um mi ram pakhat a si. Asia laifang ah a um nan, nisuahnak lam Europe thawn khal a peh aw. A ramri umdan tla cu Caspian tifinriat ihsin nitlaknak lam ah a feh ih Altai tlangtluan ah, cuihsin nisuahnak lamah Russia le Tuluk thawn a pehaw mi ram a si. Pope Francis cu Kazakhstan ih khuapibik a simi Nur-Sultan ah a vei 7nak leitlun ih biaknak lam hruaitu pawl (Leaders of World and Traditional Religions) ih tonkhawmnak ah a tel ding a si. Himi a tlawnnak in, mi malte si hmansehla zumnak a kaifek ringring tu, Kazakhstan ram sung ummi Catholic zumtu pawl a ngaihvennak tla a langter. “Pulhnat a tlun hnu, leitlun mipi pawl ih thlarau lam siseh, pehtlaihawknak lam siseh an thanso theinak ding hrangah biaknak lam hruaitu pawl in ziangvek tuanvo kan nei” timi hi tui tum an tonkhawmnak ih an reltlang dingmi thu tlangpi a si .

              Tui kum ih himi tonkhawmnak tawlreltu pawl cun, ram 60 ihsin biaknak dangdang ih palai mipum 100 hrawng an rat ding an hisap. A tel tu ding pawl cu Islam, Christian biaknak, Judaism, Shintoism, Buddhism, Zoroastrianism, Hinduism, le zumnak dangdang aiawhtu palai pawl an si ding. Pope Francis in Kazakhstan a tlawnnak san cu biaknak dangdang hruaitu pawl ih  bawmnak thawngin leilung tlun ah biaknak pakhat le pakhat karlak ih pehtlaih awknak le remdaihnak a karh sinsin ding tumtahnak a neih ruangah a si ti’n Vatican Thuthannak zung ih tuanvo neitu  Matteo Bruni cun a sim. Cui hleiah, Kazakhstan ram hi Pope Francis ih a tlawn zomi ram lakah 57nak ram a si ding ti’n khal a sim bet.

              Tui tum Pope Francis ih khualtlawn mi hi Pope St. John Paul II ih keneh thlun rero tla a si. 2001 kum, US ram ih Twin Towers le Pentagon innpi siatsuah a ton hnu reilo teah Pope St. John Paul II cu Kazakhstan ah a rak tlawng dah ve. Cuih tum ih a tlawn lai ah, Pope St. John Paul cun biaknak dangdang le miphun dangdang karlak ih rem teih umtlang thei ding a thupit zia pawl forhfialnak a rak nei. Kazakhstan ram cu 1991 kum ah Soviet Union ihsin independence rak ngah mi ram a si. Pope St. John Paul II lawng in Pope Francis hlan ah Kazakhstan ram a rak tlawng dah.

               Tui tum ah Pope Francis cu Kazakhstan ih ram uktu pawl le Kawhhran upa pawl ih sawmnak vekin a vei 7nak leitlun biaknak hruaitu pawl ih tonkhawmnak ah tel dingin Kazakhstan ram a feh hi a si. Pope Francis cu September 13-15 tiang Nur-Sultan khuapi ah a um ko ding. Khual a tlawn sung thil thupi a tuah dingmi pawl cu tonkhawmnak sungih thusimnak, daiziar te’n thlacamnak, le biaknak lam hruaitu pawl thawn thurel tlangnak ti pawl tla an tel. Himi tonkhawmnak ih teltu biaknak lam hruaitu pawl hin thusuahnak pakhatkhat cu an tuah tlang ding zum a um. Hi tonkhawmnak hi 2003 kum ihsin rak thok zomi a si ih, Kazakhstan ram ih khuapi bik ah kum 3 vei 1 rak tuah theu mi a si ih netabik an tuah cu 2018 kum ah a si. A luan ciami kum 3 sung cu pulhnat ruangah an rak cawl.Pope Francis cu Kazakhstan ram a feh zawngah thuthang latu journalists pawl a  ton ding zum a um ih, Rome a thlen hnu khal ah kan dung July thla ah Canada ihsin a tlun ih a tuah vekin press conference a tuah sal ding khal zum a um. Journalists 70 lenglo in Pope ih khualtlawnnak ah an thlun ding tiah zum a si. Kazakhstan ram ih mipum zatek 70 cu Sunni Muslim an si ih, zatek 26 cu Christian an si. Cuih Christian mipum zatek 26 ummi sung ihsin a tam sawn cu Russian Orthodox an si. 

https://bit.ly/3eIAGOY

  

 

Add new comment

3 + 0 =