Pope Francis ih thuanthu ih tel dingmi a tuukhal khualtlawnnak sunloih nakah Iraq ah Pope ih zuk thawn tacik lu an suah September 20, 2021

Pope Francis ih thuanthu ih tel dingmi a tuukhal khualtlawnnak sunloih nakah Iraq ah Pope ih zuk thawn tacik lu an suah

September 20, 2021

         Pope cu kan dung March 5 ah Iraq ram ah nithum sung a tuukhal khual a rak tlawng. Hi khualtlawnnak cu thuanthu ih tang ding mi khualtlawnnak a si. Ziangahtile covid ruangah ramleng cu tilo ram sung khualtlawnnak pawl a pahnih in an rak kham ruangah humhimnak siidawh theh ah, ram sung ramleng khualtlawng thei dingah a demdeuh hnu Pope ih hmaisabik a khualtlawnnak a si. Cuvekin Iraq ram ah a tuukhal khualtlawnding a rak hngakhlap zet ih, tuletu a rak zuam nan ram khel dinhmun pawl ruangah an rak bal sal mi St. John Paul II ih tumtah mi silhkhah saknak tla a si. Iraq ram ih thuanthu khalah Catholic Pawlpi hotu ih hmaisabik a rak tlawnnak a si. Pope Francis amah rori khal a tlawn duhnak ram pakhat a rak si. Cui thuanthu ih tel ding mi ram khel hotu pawl, biaknak lam pawlkom a phunphun ih hotu pawl thawn an rak tong aw ih thla an rak cam. Missa sumnak tla an rak tuah.

         Cui thuanthu sung tel mangsalnak ah Iraq ram ih pehtlaihawk nak zungin Pope Francis ih zuk a tel mi tacik luu phun thum cu kan dung tlawngkai ni khat niah an rak suah. Tacik lu ah a hni siamsi ih thluasuah pe dingah a kut a thlir lai mi zuk thawn Iraq ram ih ram zukin an tuah. A dang tacik lu pakhat ah cun Pope cu Shiite biaknak lam hotu asimi Ayatollah Ali Al Sistani thawn an tonawk lai zuk tuah mi a si. Ayatollah Ali Al Sistani cu Iraq ram lawngah thunei zet tu a si. Cui zuk tacik lu ah remdaihnak a keng tu laileng pahnih, Muslim pawl ih biaknak lam inn le St. Peter Basilica ih zuk tla an telh. A pathumnak cu Gaghdad ih um rundamnak ih Bawinu Biakinn ah Pope a cawlh lai zuk an telh. Cui biakinn cu a liamzo mi 2010 ah Missa sumnakih a tel tu mipi pawl Muslim mi tha lo Al Qaeda pawl ih rapthlak zetih tuahmawh nak an rak tuar ih, minung 58 an rak thihnak thinnat zet nak hmun  a si. Cathianghlim sungtel mi khuapi hlun khal a si vekin zumnakih Pa khal asimi Abraham ih a suahnak Ur khuapi khal an telh. Tacik lu cu 5000 lawng an pholang dingih ramsung, ram leng a pahnih hrangah hman a theih.

         Iraq tacik luu hnatuannak cu acozah ta a si. Asinan, ca kuat nak hnatuan cu Iraq ram mipi pawl in zumnak nei loin an rinsan lemlo. A thupibik in 2003 hnu lam ah Suddam Hussein ih zuk cu neta lam ah a hmang tu an mal sinsin. Mi tamsawn cu zumtlak zet mi mai ti daan pawl thawn pehtlaih awknak an rak tuah.Kum 84 a kim zo tu Pope Francis in hi thuanthu sungih tang ding mi a tuukhaal khualtlawnnak a rak fehnak ah a mah dinhmun in ‘ramdaihnak hrangah khualtlawng tu’ tiah khaisang in a rak sim. Iraq ram mipi pawl khal thlacamnak pakhat, thinlung um tu daan pakhat, ruansannak pakhat thawn lungrual dingah zuam dingin tha a rak pek. Iraq ram sungah tuahmawhnak hnatuan pawl khal an tuah mi pawl cawl dingah a forhfial.

         Iraq ram ih um Khristian pawl in Cathianghlim ih hmuh theih mi zumnak ih hramthoknak a si. 2003 ah Saddam Hussein America ih a do neh hnu ah ramsung ralbuainak a rak cang. Khristian pawl khal tuahmawhtu pawl ih hmuhsuan mi pawl ah an tel ih Khristian mipum a mal deuhdeuh. Ziangah tile thahnak, Biaknak lonnak, mai umnak tansannak pawl ruangah a si. Hi kumzabi sungah Iraq ih mitampi (tanlenglo) Khristian pawl an umnak tansan in an rak tlan. Iraq ram sungih um mi Khristian mipum a cekci ih theih a si lo. Ziangah tile cazin a cekci ih an lak thei lo ruangah a si. An ruahnak ah cun 500,000 hrawng an tang lai ding tiah an sim. Iraq ram sungah Khristian pawlkom thenthek mi 14 an um tiah an tarlang. Asinan, ramsung raal ruangah Khristian mipum a rak mal vekin Biaknak lam inn pawl khal siatsuah an rak tuar. Cu vekin ram ih um tu daan khal a thleng aw ih a mawi nak a rak ziamral theh.

         Hi thuthang cu The National thuthang ih kan ngah mi a si.

https://bit.ly/3ug2K04