Pope Francis le Corona Nathrik

Pope Francis le Corona Virus

            Kan dung zarh thok in Pope Francis ih damlonak thu thawn pehpar in leitlun thuthang zamhnak media pawl lakah le mipi lakah thinphannak le corona virus (nathrik) ih kaih a si le silo thu theihduhnak a leng zet. Kan kawlram ih hrek khat thuthang zamh pawl tla cun Pope Francis cu corona nathrik in a kaih ti'n thuthang diklo thantu pawl tla an rak um.

            Himi corona nathrik ih kaih a si le silo thu ah Vatican thuthangca cun zianghman tarlangnak le simphuannak a tuahmi a um lo. Tui a natnak ruangah mi zapi hrangih a tumtah cia mi hrek khat pawl a tuah thei hrih lo ding thu lawng simphuannak a tuah.

            Tuitum Pope Francis ih natnak thawn pehpar in Italy ram ih thuthangca pakhat a simi II Messaggero cun a tanglam vek in a ngan: Pope Francis ih natnak an cekfel ih Corona nathrik in a kai lo. Kum 83 a kim thlangtu Pope Francis hi tlangrai, khawsik, khuhkhuh le dangna ih velhnak ruangih na a si.

            Pope Francis hi kan dung February 20, Ash Wednesday timi Vutcam Culhni ih mipi thawn Missa raithawinak a tuah rero lai ih a khuhkhuh an hmuh ruangah media tampi in thulu phunphun hmangin an rak tarlang ciamco ih leitlun huap ih lungphannak a len rero nak khal a si.

            Pope thuhla simphuannak official thuthangca a simi Vatican thuthang cun, Pope hi malte a dam lo nan, amaih zung sungah cun, midang thawn tonawknak a neih rero thu a than cia mi a si ko.

            Tuitum ih hiti'n thubuai a um ciamco hi Italy ramah corona nathrik ih kaihmi minung an tam vivo ruang khal ah a si bik. March 3, tlawngkai 2 ni tiangah Italy ramah minung 2000 lenglo in corona nathrik an nei ih, minung 52 an thi zo ti a si. Leitlun Harhdamnak lam tuanvo neimi World Health Organization in Italy ram hi leilung tlun corona nathrik tam bik nak ram 4 sungah a tel ve ti'n simphuannak an nei.