Pope Francis le President Joe Biden Vatican ah tongawk October 29, 2021

Pope Francis le President Joe Biden Vatican ah tongawk

October 29, 2021

         Pope Francis le Joe Biden cu October 29 ah than cia zo vekin an rak tongawk. President Joe Biden le a nupi Jill Biden te cu a kiltu mortow 85 thawn kulh thepthep in Vatican ah an rak thleng. An mah cu G-20 conference hlan ah Pope thawn an tongawk.Tuitum hi Joe Biden in President dinhmun in Pope Francis thawn an tonawk hmaisabiknak a si. White House ihsin a tel mi ruahnak pek tu mifim pawl, ai-awh tu pawl khal President in Pope Francis cu pakhat hnu pakhat cibai a rak buuk ter.

         Joe Biden cu American thuanthu ah a pahnihnak Catholic President a si. Catholic pakhat a si vekin Catholic Biaknak thawn a mil aw mi laksawng pakhat kha Pope Francis hrangah a rak keng. Cuih laksawng cu Washington DC ih Mifim Pathum Biakinn ihsin thuanthu mawi nei cia mi korfual pakhat a si. Hi mi korfualcu 1930 lai ah Jesuit pawl ih rak hman zo mi ro sunglawi pakhat khal a si.

         Pope khal in St. Peter Basilica zuk dunglam ah a tel mi marbel thawn tuah mi zuk pakhat le ca uk pakhat a rak pek. A kaih maw ti cu ka thei lo. A sinan hi tangkafang cu American daan ah President in ralkap pawl le hotu hminthang pawl a pek theu mi tangkafang a si. Ka hmuh mi hmuahhmuah lakah nang cu remdaihnak hrangih a zuam zettu na si ruangah na duh a si le pek ka lo duh tiah President Joe Biden in sim phah in tangkafang a rak pek.

         Hi tangkafang hi ziang ruangah President hrangah a sunglawi hleice ti a si le khat lei lamah Delaware ramthen zuk a cuang. Thu um daan cu a fapa Beau kha Delaware Army National Guard’s 26^th brigade sungtel dinhmun in ralkap a rak tuan dah ih cancer natnak ruangah a kum 49 ah a rak thi. Hi thuthang cu Rome Reports thuthang ih kan ngah mi a si.

Photo courtesy of ANSA

 https://bit.ly/31facOy