Pope Francis Mongolia thleng (September 1, 2023)

Pope Francis Mongolia thleng

September 1, 2023

         Pope Francis cu a mai a vei (43) nak, leitlunhuap a Tuukhaal khualtlawnnak ah tluang ten a thleng zo.

         Pope Francis Mongolia ih phurtu ITA Airways cu tlawngkai nili zaanlam ah a pok ih vanzam parih thuthang latu pawl thawn pehtlaihnak an nei. Cu mi cun fimnak thawn si loin theihtheinak thawn a tican an thei ter dingih cui hmun tikcu caan zinglam 10 am hlan ah a thleng.

         Pope cu Ulaanbaatar’s international Chinggis Khaan airport in Mongolia’s Apostolic Nunciature ih Charge d’ affaires, Msgr. Fernando Duarte Barros Reis le the Ambassador of Mongolia to the Holy See, Ms. Davaasuren Gerelmaa, cu theh in Pawlpi le acozah pawlkom ai-awhtu pawl in lamzin in an rak hmuak.

         Mongolia rampi ai-awhtu ralkap cu hlanlai thuanthu sungih Mongolia miphun ralkap pawl mangsal ter tu a sen, a pawl le aihre rong uniform le lukhuh pawl thawn lungawi sopar zet in an rak ding.

         Airport ih hmuahnak caanserh sungah, Mongolia fala in an thuam hruk in cawhnawi, kalauk hnawi ti thawn tuah mi “Aaruul” khuatkhat cu Pope a rak pek ih Mongolia miphun pawl ih nunphung ai-awhtu, an hman tambik mi khualtlawn man pawl sungin pakhat a si.

         Pope Francis in khuat cu lunghmui zet in a rak cohlang ih a rak in.

         Pope in hmun hlapi ihsin a thlen hnu, tlawngkai ninga ni cu colh a tum. A mai meeting pawl le caanserh pawl cu Zarhte zing ah an thok ding.

         Pope in a mai (43) nak ramleng tlawng dingih a hril mi nisuahnak lam Asia ram cu Kazakstan ram theh hnu ah leitlunhuap ah a pahnihnak ih tumbik mi khar mi ram a si. An nunphung ah mipum 3.5 million an um ih Christian mipum cu zateek pahnih hnak in an mal lai.

         Communist acozah in kum 70 sung a uk hnu ah, USSR ih satellite rampi, Mongolia cu 1990 ah a remdai mi dokalhnak an rak tuah ih party phunkim in democracy an rak din. Biaknak lam zalennak nemhnget mi upadi thar pakhat an rak tuah.

         Cui caan ah communist ih uk caan kum tampi sungah ram ihsin dawi tuar mi Catholic mission hnatuantu pawl cu Biakinn a thok in sak sal ding tuanvo thawn ram sungah an lut sal. Tui ni ah Parish 28 a um ih baptism ngahtu Catholic mipi 1500 an um.

         Farah harsa pawl, kum upa pawl, kut ke kim lo pawl le hnon a tuar tu pawl hrang tuah sak tu nunphung, harhdamnak le fimzirhnak lam caanserh tampi cu thuneitu pawl le mipi pawl in an rak hmuak ih pawlkom tlang in an rak upat zet.

         Mino pawlpi cu Cardinal pawl ih College ihsin Cardinal nautabik, Cardinal Marengo in a hoha ih a mah cu Pope Francis in 2022, August ah Consistory sungah Cardinal dinhmun ih a rak khaisan mi a si.

         Pope a tlawn hnu ah mission hnatuantu pawl ram sungih hnatuan thei dingah a tulsam mi visa pawl thawn pehpar in harsatnak pakhat cu mission hnatuantu pawl ih ruahsannak cu cabuai parah ret a tul.

         Nunphung hnatuantu pawl in thukam an rak tuah ko nan, mission hnatuantu tamsawn cu ram sungah kum reipi hna an tuan ih an tong an rak zir mi hi caan malte sung lawng daih mi  visa pawl thawn feh a tul. Mi pakhat ciar hrang mankhung zet mi mission hnatuannak visa hrangah, acozah in mission hnatuantu pawl hnenah cui hmun ih mipi panga tuan dingah zaangfah a dil.

         Hi thuthang cu Vatican News ih kan ngah mi a si.