Pope Francis a zamrang thei bik in damnak ngah sal dingah leitlun killi in thlacam July 5, 2021

Pope Francis a zamrang thei bik in damnak ngah sal dingah leitlun killi in thlacam

July 5, 2021

            Pope Francis cu kan dung July 4 zanlam ah rilpi thawn pehpar in pum khuai nak cu Pope St.John Paul (II) meithla thawn kah asi lai ih an tuamhlawm nak siizung ah cui mi khuai nak an tuah. Khuai a si ding timi khal Vatican thuthang ah an than. Curuangah biaknak lam hotu pawl, ram khel lam hotu pawl, nunphung pawlkom pawl in a zamrang thei bik in dam sal dingah a phunphun in thla an cam sak.

Izipt ram Cairo al-Azhar ih Grand Imam ih thlacam nak

          "Kan unau Pope Francis a zamrang thei bikin dam in, a hnatuan thaten tuan thei hram seh tiin thla an cam" tiin July 5 niah a twitter ah ca a ngan.

Constantinople ih biaknak lam hotu pawl thlacam nak

          "A zamrang thei bik in a dam sal ding timi thu, ulenau thinlung pu in thla kan cam sak" tiin kum 84 asimi Pope Francis hrang thla an cam thu Vatican thuthang in a than.

Nisuah nak lam Khristian Kohhran ih biak nak lam hotu Bartholomew ih thlacam nak

          Nisuah nak lam Khristian Kohhran ih biak nak lam hotu Bartholomew khalin ziang hman ah rel loin a um men lo. "Bawi Khrih ih lungrual nak hnautan tuan peh dingah kan zaten in ko ih cui hnatuan cu hmun khat ten tuan dingah a zamrang thei bik in dam hram seh" tiin thla a cam sak.

Orthodox Kohhran hotu ih thlacam nak

          Orthodox Kohhran ih hotu cu St.Paulo in Korin khua pawl hnen a kuat mi Gospel ca thawn pehpar in "Pathian ih tontaih nak cu minung ih cah nak hnak in a cak sawn" 1Korin 1:25 timi Bible catlang thawn a pehpar aw. Cutivekin Bawi Jesuh ih a thu thuk cu kan hnen ah siseh, harsat kan tuar nak ah siseh a um ih, cutiin Gospel thuthangtha cu kan hnen ah a nung ding asi" tiin tha zang pe in thla a cam sak.

Rome khuapi ih rabbi upa ih thlacam nak

          Rome khuapi rabbi upa asimi Riccardo Di Segni khalin Pope a zamrang thei bik in dam hram seh tiin twitter ah ca ngan in thla a cam sak.

Vatican hnatuan tu pawlih thlacam nak

          Pope Francis an khuai nak cu nazi 3 a rei. Vatican ih simrel thei nak a nei tu Matteo Bruni ih asim nak vekin an khuai theh hnu a thaisun July 5 niah Pope dinhmun thazet in hmuh a si thu, a dam that tuk thu, Pope cu siizung ihsin suak hrih loin kar khat hrawng siizung lawngah a um hrih ding thu, kan zaten khal Pope a zamrang thei bik in dam sal dingah thla an cam sak thu a sim.

Rome ih Anglican Kohhran hotu ih thlacamnak

          Rome ih Anglican Kohhran ih hotu khalin July 5 niah "Pope Francis cu pum khuai a si ding ruangah a hnen ah kan ruahnak, kan thlacam sak nak in kan um ding. A zamrang thei bik in dam hram seh tiin khal thla a cam. Pathian in a dai nuam mi a duhdawt nak thawn thazang pe hram seh" tiin thla a cam sak.

Leilung pumpi ih ram khel lam hotu pawl ih thlacam nak

          Nigeria ram President Muhammadu Buhari in a ram mi pawl hnen Pope Francis an khuai nak hlawhtling dingah le a zamrang thei bik in dam sal dingah thla cam sak dingah thu a than. Cutivek in Venezuela ih ram hotu Nicolas Maduro khalin Pope an khuai nak ah Blessed Jose Gregorio Hernandez ih thlacam sak nak ngah in, zamrang ten dam sal dingah thla a cam sak. Cumi blessed cu tubaite ih "Blessed" tiin khaisang mi mi zonzai pawl ih siibawi a si.

          Italy Prime Minister Mario Draghi khalin "duhdawt zet mi Pope a zamrang thei bik in dam hram seh, a zamrang thei bikin tuamhlawm nak in dam hram seh" tiin thla a cam sak. Philippines ram ih Catholic Bishop pawl pawlkom khlain thuthan pakhat an suah ih, Pope Francis khuai nak hlawhtling dingah le a zamrang thei bik in dam sal dingah Bawinu ih thlacam sak nak dil sak dingah Catholic mipi pawl hnen an forhfial.

          Kei khal Pope Francis an khuai nak ah a zamrang thei bik in dam sal dingah kan zaten thlacam nak thawn kom in Bawinu ih thlacam sak nak rinsan in Pathian hnen thla a cam sak" tiin Davao ih Archbishop Romulo Valles khalin thla a cam sak. Cutivekin kan zaten (Bishop pawl, Siangbawi pawl, Pathian hnatuan pawl, Kohhran mipi pawl khal hmunkhat aw khat in thla cam sak cio uh. Himi thuthang cu CNA thuthang ihsin kan don mi a si.

https://bit.ly/3woIB7t