Pope in Seychelles ram hrangah Bishop thar ret September 11, 2020

Pope in Seychelles ram hrangah Bishop thar ret

September 11, 2020

            Pope cu 2002 kum lai ihsin Victoria Diocese ih Bishop tiin tuanvo a nei tu Bishop Denis Wiehe ih cawl dingih a dil nak cu Pope in a cohlang ih Bishop Alian Harel kha Seychelles ram ih khuapi Victoria Diocese ih tuu khal tu Bishop tiin a ret. Tui caan tiang Mauritius ram Rodrigues tikulh ih Diocese ih tawlrel tu a si. Bishop Alian Harel cu 1950 kum June 24 ah Mauritius ram Quatre-Bornes khuapi ah a suak. Lorrette de Quatre-Bornes ah hramthok tlawng, College du Saint-Esprit ah lailak tlawng a kai.

            Kum 20 a kim ah Angers le Nantes khuapi ah Siangbawi tlawng kai-ih, Theology le Physology fimthiam nak pawl a zir. 1978 kum September 3 ah Siangbawi can nak a la ih Port-Louis Diocese ah tuanvo nei in hna a tuan. St. Helena Bacilica biak inn ah tuanvo a lak vek in St. Gabriel ih thianghlim mi Jesuh thinlung  Paish ih Siangbawi tin khal tuanvo a nei. 1994 kum ah Bishop can nak a ngah.

            2000 kum khal ah Forconio Diocese hrangah le Rodrigues tikulh hrangah Bishop tiin ret a si. 2002 kum December 8 ah Port-Louis ih Bishop Maurice Piat le kawhhran karhzai nak pawlkom ih secretary Bishop Robert Sarah pawl tel in Cardinal Jean Margeot ih hoha nak in Bishop tiin ret a si. Bishop Alian Harel cu India Bishop pawl pawlkom ih sungtel pakhat khal a si. Seychelles ram mipum ih zatek 76.2 cu Catholic an siih Rodrigues tikulh ih mipum zatek 91.3 cu Catholic zumtu pawl an si. Himi thuthang cu Vatican thuthang ihsin kan ngah mi a si.

https://bit.ly/35Cr0z0