Pope St.John Paul II meithal ih an kap lai ih thi a kop mi a puan fual Rome ah an ret that lai May 12, 2021

Pope St.John Paul II meithal ih an kap lai ih thi a kop mi a puan fual Rome ah an ret that lai

May 12, 2021

            Pope St.John Paul cu 1981, May 13 ah St.Peter tualrawn ah a ra thleng tu khawmzawh tu mipi pawl thawn tong aw dingah mawtaw thawn a feh. Culaiah Pope that dingah a tum tu in meithal thawn a kap ih Pope a kap ngah. Pope meithal thawn kap a tuar lai ih a hruk mi thi a kop mi a puanfual cu St.Vincent ih fanu pawl Sister tlawngah cu mi laiih a um daan vekin an kilkhawi. Cumi an tlawng ah ro zoh duhin khawmzawh pawl mi tampi an feh rero lai. Hi Sister tlawng cu dinhmun a phunphun ruangah pasal nei lo (tuanvo la loin) nau a nei tu nunau pawl, mi vai pawl le harsa zonzai pawl umnak hmun tuamhlawm nak hmun a si.

            Cumi puan parah meithal thawn kap a tuar laiih a suak mi thi pawl le cerek ih kap nak a ong pawl cu puan parah hmuh a theih thu, himi puan ro thil cu Sister tlawng ah ziang tin a thleng timi thu thawn pehpar aw in Pope hriamhma a tuar laiih a tuamhlawm tu nurse  Anna Stanghellini in himi puan cu kum tampi kilkhawi hnu ih a thleng nak a si. Sister tlawng ihsin Vatican cu peng 2 hrawng a hla.

            Himi thil a cang ni ah Pope ih nunnak tikcu khel in hum thei dingah manhlap zet in amah kel tein phoih loin kaihci thawn an tan ih an poih sak. A puan cu zial parah an ret ih, Pope le a nat nak par lawngah mi zate ih ruah nak a thleng. Dinhmun malte a diah deuh hnu lawngah a thenthen in tan mi zial par ih ret mi a puan an mang sal. Himi puan lak lo asile hnawmhlon nak sungah an hlon ding tiin an ruat. Netaah cumi nurse in a rak lak mi a puan cu a nel zet mi St.Vincent ih fanu pawl Sister pawl hnen a pek. Cumi ihsin khawmzawh pawl in an thei vivo ih, va zoh in Pope cumilai ah Mithianghlim asi hrih lo. Pope ih thlacamsak nak ngah dingah thla an cam. Khawmzawh pawl ih nunram ah Pope John Paul II ih thlacam saknak a ngah tu mi tampi khal an um.

            Veikhat ah nau neih a duh tu innsang ih nu pakhat cu innsang a din zo nan nau nei thei loin an um. Curuangah himi ro thil umnak ah nitin feh in Pope John Paul II ih thlacam sak nak a dil. Reiloteah nau a von thu, nu le naute siibawi pawl hnen an hmuh awk tikah an pahnih hrangah harsat nak a um thu an thei. Curuangah an nu pa in Pope John Paul II hnen in thlacam sak nak an dil. Netabikah thazet in nau an nei thei. Cui an naute khal John Paul tiin hmin an rak pek. Ziangtivekasikhal le nurse Anna Stanghellini ih theihthiam nak ruangah a thupi zet mi Pope St.John Paul II ih ro cu ron kilkhawi theinak a si tiin himi rothil thawn pehpar in St.Vincent ih fanu pawl ih Sr. Maria Rosario in a sim. Himi thuthang cu Rome Reports thuthang ihsin kan don mi a si.

Photo courtesy of: The Straits Times

https://bit.ly/3tR5wqB