Protestant YouTube host hminthang pakhat in Catholic Kawhhran sungah lut dingin thu a botcat zo thu a phuang

Protestant YouTube host hminthang pakhat in Catholic Kawhhran sungah lut dingin thu a botcat zo thu a phuang

Protestant YouTube host hminthang pakhat a simi, Cameron Bertuzzi cun Catholic Kawhhran sung lut ding a timtuah rero thu 17.11.2022, Tlawngkai 4 ni ah amaih YouTube channel in theihternak a nei.

“Tui tum ah thuthan ding ropi ka neih mi cu, Catholic Kawhhran sungih lut dingin September 20, 2022 ah thubotcatnak ka rak tuah zo timi a si.

Tu fang cu RCIA timi kum upat hnu ih Catholic Kawhhran sung lut duh pawl timtuahnak thawn pehpar mi program ka neih rero lai a si. A ra lai dingmi Easter (Thawhsal) Puaipi ah Catholic Kawhhran sungtel ka sinak nemhnget a si ding” ti’n Cameron Bertuzzi cun theihternak a tuahmi sungah a sim.

Tui tum ih thil cangmi ah, Pope ih thuneihnak hi a dik maw dik lo, pompi tlak a si maw si lo timi thawn pehpar in, zirnak le zingzoinak thukpi a tuah hnu ih Catholic Kawhhran sungih lut dingah a thinlung a botcat thu khal a sim.

“Protestant pakhat dinhmun in, thinlung sangka kaupi ong in thil umdaan ka zingzoi. A netnak ahcun, ka hmuhsuahmi thil ih i hruainak hmun ah ka thlunko ding. Keimaih hrang le ka innsang hrangih thil harsa a si ding hmanah ka thlun thotho ding ti’n keimah le keimah ka ti aw,” tiah Cameron Bertuzzi cun a sim bet.

Protestant lam ihsin a rualpi pawl cun thil umdaan zingzoinak (study) a tuahmi hin Protestant zumnak sungah a fek ter sinsin ding ti’n an rak zum zet nan, an zum vek a rak si ta riai lo ti khal in a sim.

“Ka hmuhfiang ngah mi cu Pope ih thuneihnak hi a dikmi le pompi tlak a si timithu a si,” timi thu khal theihternak a neih mi sung ah a sim.

Cameron Bertuzzi hi Capturing Christianity timi hmin thawn YouTube channel tuahtu a si ih a channel subscribe tuahtu khal minung 151,000 lenglo an um zo. Asinain, Catholic Kawhhran ih a luhnak thu cipciar pawl cu amaih channel ah si loin, channel dangdang ah simfiangnak a neih ding thu khal a sim.

Catholic YouTube host hminthang pakhat a si ve mi, Matt Fradd thawn Pints with Aquinas timi hmin thawn tuah mi YouTube channel ah, November 18, 2022 ni ah pawlkom awknak run nei ding khal an si.

Christian biaknak ihsin mifim hminthang tampi thawn pawlkom awknak an neihmi khal amah Cameron Bertuzzi ih YouTube channel sungah zoh ding le ngai ding tampi a um.

Catholic Kawhhran sung ihsin hminthang zet mi, Bishop Robert Barron, Trent Horn, Jimmy Akin, Fradd, Fr. Vincent Lampert le Protestant ihsin Catholic Kawhhran ih ra lut tu Bible thiam hminthang Scott Hahn te pawl thawn khal amaih YouTube channel sungah pawlkom awknak an rak nei zo a si.

https://bit.ly/3EJZz7O