Queen Elizabeth II ih ruak vuinak ah leitlun ram uktu tampi an tel, ram uktu hrekkhat pawl sawmnak an ngah lo.

queen-elizabeth-funeral

Queen Elizabeth II ih ruak vuinak ah leitlun ram uktu tampi an tel, ram uktu hrekkhat pawl sawmnak an ngah lo.

               Kan dung September 8 ni ih mual a liamtu Queen Elizabeth II ih ruak vuinak cu mani (19.9.2022) ah United Kingdom huap level in sunglawi zetin an tuah a si. Anih hi kum 70 sung Queen dinhmun in rampi a hruai hnu kum 96 a kim ah pialral ih feh a si. Ruak vuinak Service cu London khuapi, Westminster Abbey ih ummi Gothic biakinnpi ah mipum 2000 lenglo tel in tuah a si. Hi Biakinn cu 1953 kum ah Siangpahrangbawinu lukhum a rak cohlan nak hmun khal a si. Cutawk hmun ihsin Queen Elizabeth II ih ruak cu peng 26 a hlatnak thuanthu maksak neimi Windsor khua ah thiar a si ih London khuapi sung lamzin tluan ah peng 1 tluk saumi mitlar thawn sunglawi zetin an thlah.

             Cule a ruak cu Windsor khua, Siangpahrang pawl umnak hmuan sungih ummi St. George Biakinn hnuai ah vui a si. Himi ruakvuinak ah Siangpahrang innsang sungtel, amah Queen Elizabeth ih fa le, tu le pawl leh sungkhat nai deuh pawl tla an tel. Cun, Europe le kiangkap ihsin Siangpahrang innsang hrek khat pawl tla an tel ve. Belgium ihsin King Philippe le Queen Mathilde, Spain ihsin King Felipe le Queen Letizia, Netherlands ihsin King Willem-Alexander le Queen Maxima, Norway ihsin King Harald V le Queen Sonja, Denmark ihsin Queen Margarethe II pawl tla an tel. Japan ihsin Emperor                    Naruhito le Empress Masako, Jordan ihsin King Abdullah, Malaysia ihsin Yang di-Pertuan Agong, le Bhutan ihsin King Jigme Khesar Namgyel Wangchuk pawl khal an tel. Ramkhel lam zawngin hruaitu pawl lakah Britain ih prime minister tuan dahtu pawl le tual lai tu pawl khal an tel. US ihsin President Joe Biden le First Lady Jill Biden, China ihsin Vice President Wang Qishan, India ihsin President Droupadi Murmu pawl tla an tel ve. South Korea ihsin President Yoon Suk-yeol, Canada ihsin Prime Minister Justin Trudeau, Brazil ihsin President Jair Bolsonaro, South Africa ihsin President Cyril Ramaphosa, New Zealand ihsin Prime Minister Jacinda Ardern, Australia ihsin Prime Minister Anthony Albanese te pawl tla an tel.Tuitum Queen Elizabeth II ih ruakvuinak ah telpi dingin sawmnak a dong lomi ram 3 an um ti a si.

            Russia le Belarus cu February 24 ni ih Ukraine ram luhcilhnak ruangah hrial an si ih, Myanmar cu 2021 kum ihsin ralkap ih uknak lak ruangah sawmnak an hlan lonak a si ti’n an sim.

source-Times

Photo - vatican news

 

 

 

 

 

Add new comment

1 + 0 =