Ramkhel lamih nasa tukih a rak tuantu Catholic Puithiam cu Puithiam riantuannak in cawl ter October 26, 2021

Ramkhel lamih nasa tukih a rak tuantu Catholic Puithiam cu Puithiam riantuannak in cawl ter

October 26, 2021

              Philippine ram, Bicol khayaing ih Catholic Puithiam pakhat cu Puithiam tuan theinak in a cawl ter. Ziangahtile hnatuan dang pawl ah sinak cohlang in a tuan rero ruangah a si. Cui Puithiam cu Granwell Pitapit a si. Amah cu Libmanan Pawlpi ih nunphung rian tuan rero tu a si. Pawlpi ih cin le daan vek a sile Catholic Puithiam pakhat cu ramkhel lamah sinak cohlang in a tuan thei lo. Bishop Jose Rojas ih sim mi vek sile Pawlpi ih Canon upadi (daan) in tui Puithiam ih a tuah mi pawl thawn pehpar in fiang ten a tar lang zo thu, ziangah tile cui Puithiam cu tui a ralai dingmi Camarines Sur Libmanan ih a tum bik mi khuapi a simi Camarines Sur khuapi ih khaw bawi sinak hrangah a zuam ding a si.

              Tui kumkhua Puithiam pakhat asimi Catholic Puithiam in a rian tuannak kumkhua in a colh nak cu neta lam ah khal rian tuannak tuan thei salnak kham nak a si. Hi thuthan cu October 22 ih rak than mi a si. Thuthan sungah hi Puithiam thawn pehpar in neta ih a cang dingmi hmuahhmuah Pawlpi thawn pehtlaih awknak a um nawn lo thu, Pawlpi in aiawh in a tuah nawn lo thu a tarlang. Cuvekin a hlan ih a rak tuan mi nunphung lam khal a tuan nawn lo thu, Pawlpi ih hminkhal ziang thuhla hrang hman ah a hman thei nawn lo thu, cuvekin Pawlpi ih lamhmuh nak thawn tuan rero mi mi harsa pawl ih nunram khaisannak lam caanserh pawl thawn pehtlaih nak a nei nawn lo tiin an sim. Tuvekin Puithiam thawn pehpar mi rian tuan colh nak cu Puithiam pakhat ih thukam nak pawl sungin thianhlimnak lam ih thukam mi colhnak a si lo thu, hi thukam mipi theih ih bal dingah cun dil nak ca lak a tul thu Bishop in a rak sim.

              Tuah cun cui Puithiam cu Puithiam rian a tuan thei nawn lo. Curuangah tile leitlun thu ah ziang hman dokhamnak um loin a tuan thei thu, cui hlei ah a dang Catholic Puithiam pahnih asimi Sarsogon Diocese ih Fr. Emmanuel Alparce le Tagum Diocese ih Fr. Emerson Luego pawl khal hrilawk nakah an tel ding. Fr. Emerson Luego cu Davao de Oro ramthen ih, khaw pi uk tu sinak dinhmun siseh, Fr. Emmanuel Alparce cu Albay khayaing, Bacacay khuapi ih thuron tu sinak siseh zuamawk nak ah an tel ding. An pahnih khal a hlan ah Nu Pawlpi ih nunphung lam thawn pehpar mi rian rak tuan dah tu pawl an si. Himi thuthang CBCP thuthang ihsin kan don mi a si.

https://bit.ly/3bcRWab