Rome khuapi ih Pope ih lungkim pi mi phunsangtlawng pawl a ra lai ding mi fim zir kumah a hlan vek in ong thei dingah an timtuah. July 15, 2020

Rome khuapi ih Pope ih lungkim pi mi phunsangtlawng pawl a ra lai ding mi fim zir kumah a hlan vek in ong thei dingah an timtuah.

July 15, 2020

            Tuikum fimzir kumah covid-19 pulhnat ruangah March thla ihsin thokin thlawng feh on lo in Online ih sin an zir. Hmanhman ten tlawng an kai thei lo. Asinan aralai dingmi fimzir kum (2020-2021) ah tlawngta pawl , mah rori hmanhman tlawngkai in ca zir thei dingah Rome khuapi ih Pope ih kuttang ih phunsangtlawng pawl zaten in an timtuah. Hitivekin tuah dingah June thla ah Vatican ih fimzirnak zungihsin sim mi a si.

            Hitivekih tuah nakah harhdam nak lamih thu nei tu pawl in covid-19 pulhnat karhzai lo dingah thlun dingmi thu pawl tha ten thlun ding asi. Angelicum tiih mitampi ih theih mi St.Thomas Aquinas phunsang tlawng ih fim zir tu tlawng ta pawl cu Rome khuapi sung lawng siloin a dang khuapi khal in siseh, a dang ram khalin siseh an kai.

            Covid-19 pulhnat ruangah fimzirnak a hlan vek si thei dingah tlawng kai man, um nak man pawl thawn pehpar in harsat nak an tong rero tiin tlawng ta pawl hnen ihsin an tar lang thu, ziangruangahtile Religious pawlkom le a thangso rero mi rampawl ihsin tlawng ta pawl hrangah covid-19 ruangah ramih sumdawn nak lam harsat nak ton rero a si thu, cutivekin Religious  asilo mi tlawngta menmen pawl khal sumpai ah buai nak an ton thu, tlawng ih a bawm dingmi tlawngkai man cu tlawngta tamsawn pawl tlawng a kai ter thei sal ding tiin an ruahsan thu, tui kum fimzir nakah hmin a pe tu ding tlawngta thar pawl hrangah tlawng kai man 25 -50 zatek tiang thum dingah thu an potcat. Tlawngpi cu covid-19 ih tul tuk nakih hmang ding sumpai hawl nak khal din in, $100000 tiang fund hawl in a tui tlawng ta pawl hrang tlawng kai man bawm dingah an timtuah. Tlawng ih council cu ram (90) a aiawh ih, anmah pawl cu a bang aw lomi sumdawn nak thanso nak, nunphung ihsin a ra tu pawl an si.

            Italy ram ih lockdown caan ah tlawngta tampi cu an tlawng ca pawl online ihsin thlun thei dingah an zuam nan computer an nei loih computer hawl in le a nei pawl in Internet line tha mi hawl nak ah an buai zet thu, Religious pawl, Siangbawi a silo mi, mi menmen tlawngta pawl hrangah Rome khuapi sungah um in, ca khal zir, tlawng kai man khal mah ten hawl in an har tuk.

            Thenkhat cu innsang le fale pawl an neih thu, anmah pawl cu hitivekih harsa zet in an zir nan zuam zet in an zir nak cu tlawng pi ih thazet ih an ho thei ruangah fimthiam nak thupit ter nak ruang khalah asi. Hmanhman ten tlawngkai nak hmun ihsin rinlopi ih Online ihsin zirnakih thleng nak cu (2019-2020) fimzir nak ih thil um daan zoh ding asile rin lo pi ih thleng ih tuah nak ah Pathain ih bawm nak thawn tuah asile ziangkim a cang thei timi thu an zir ding tiah ruah sannak a um.

            Online cazir nak tuah thei nak cu tlawngpi ih tumtah nak asi. A hngetkhoh zet mi Khristian pawlkom langter asi thei thu, a ralai ding mi fim zir nakah mah rori tlawngkai in tlawng khan sungah cazir thei tu tlawngta pawl an um ding vekin um daan a phunphun ruangah mah rori tlawngkai thei nawn loin a tang lai mi zir dingmi pawl a cem tiang santhar ih bawm nak ruangah Online ih a zir tu ding pawl khal an um ding. Ziangvek asi khal le tlawngih a ra tu ding tlawngta zaten cu thlarau runnak hrangah a thianghlim mi thu hman cu thatho zet in zir asi ding tiin khal ruahsan asi thu phunsangtlawng ih director Fr. Benedict Croell, O.P. in CNA ah email ihsin a sim mi cu CNA thuthangin kan ngah mi a si.  

https://bit.ly/3eHKGlW