Seoul Cardinal in Korea raldo awk nak a daih nak kum (70) a kim ni ah remdaih nak a dil June 26, 2020

 archbishop_of_seoul_cardinal_andrew_yeom_soo-jung_at_mass_in_the_myeongdong_cathedral_ansa.jpeg archbishop_of_seoul_cardinal_andrew_yeom_soo-jung_at_mass_in_the_myeongdong_cathedral_ansa.jpeg

Seoul Cardinal in Korea raldo awk nak a daih nak kum (70) a kim ni ah remdaih nak a dil

June 26, 2020

            Seoul Cardinal cu Andrew Yeom Soo-jung a si. A liam zo mi zarh nili sun cu Korea raldo awk nak a daih nak kum (70) a kim ni a si. Cumi canserh ah Cardinal in remdaih nak a dil. Sak le thlang Korea ram pahnih cu ralkap pawl remawk lo nak a um rero nan, ram pahnih karlak lungkim in remdaih nak an lak nak kum (70) a kim zo. A cam hminsin nak tuah dingah Missa raithawinak cu Dioceses pawl ah thlacam ter a si.

            Cuihleiah Korea Catholic kawhhran mipi pawl khal hmun khat ah thla an cam. Cutivek in thlacam nak tuah asinan Corona virus ruangah minung pakhat le pakhat harhdam nak lam ih hmuh mi vekin thlun a si. Cardinal cu Myeongdong cathedral ih Missa raithawi nak sungah mipi pawl thawn thla an cam a si. Cardinal in "kan zate ih kan tul mi a hman mi remdaih nak ngah taktak dingah a har tuk ding ti ka thei. Asinan a cang thei lo lawlaw mi a si lo" tiin a sim.

            Hitivekih a sim nak cu June (16) niih sak Korea le thlang Korea ih Kaesong ih pehtlaih awk nak zung an kah awk nak a can nak ah an dinhmun a harsat lai caan ih a dil mi a si. Cumi zung cu thuanthu ih a tang mi (2018) kum Korea ram komawk nak tumtah in an thu rel khawm thehah ong nak an nei. "Ram khel thuhla ah ngaithiam awk nak a um asile thu hman duh vivo a si ding ih, remdaih nak khal rei pi a daih ding. Ram upa pawl khal in mai pulpak thu, a bom tu pawl le mai ram ih that nak lawng tuah nak ihsin suak in, ram pahnih hrang ih that nak hrangah zuam nak thawn tuah thei hram hai seh" ti khal in Cardinal in thla a cam sak.

            Korea Catholic Bishop pawl pawlkom in Korea ram hnih rem sal nak tuanvo a la tu Bishop Lee Ki-heon khal in remdaih nak le kahawknak cawl tengteng dingah dil nak khal a suah. "Kum (70) hnu pawlkom pahnih (ramhnih) a thek ter tu, ram a pahnih in a thangso ter tu ding ihsin kham nak a simi ruah nak pawl pah in, Korea ramhnih hmai a nor lo nak cu sak Korea hnen UN ih a pek mi kham nak le covid-19 pulh nat ruang khalah a tel" tiin a sim bet.

            Hlanlai thuanthu von zoh asile (1950, June 25) niih sak Korea in thlang Korea a uk nakin raldo nak a thok. Cui raldo nak ah ram mi tan tampi an nun an rak liam ih, raldo nak kum thum a rei hnu (1953, July, 27) ah remdaih nak thawn an cawl ter. Remdaihnak nitleu cu (2018, April) ah tleu suak vekin a rak um dah. Ziangruangahtile cui kumah "Panmunjom Declaration" timi thuthan mi cu thlang Korea tamadah Moon Jae-in le Sak Korea tamadah Kim Jung-un in lungkim nak ca an rak ngan. Atu in ral a daih nak kum (70) a kim zo nan an ram hnih in pehpar awk nak le remdaih nak hnatuan cu a har tuk lai. 

https://bit.ly/3eMYRqB

Add new comment

4 + 12 =