September thla ah Pope Francis ih nithum rei khualtlawnnak a si ding mi Slovakia ram August 13, 2021

September thla ah Pope Francis ih nithum rei khualtlawnnak a si ding mi Slovakia ram

August 13, 2021

          Slovakia cu a ralai ding mi September thlaah Pathian riantuan nak thawn a ra tu ding Pope Francis hmuak dingah timtuahnak an nei rero. Pope cu Hungary ram ih khuapi, Budapest khuapi ih tuah mi mitinkim thawn pehpar aw mi Bawi Jesuh Thi le Sa congress cem nak Missa raithawinak cu September 12 ah hoha in a theh hnuah Slovakia ah a feh cih ding. Slovakia ram ih khuapi 3 ah a feh ding. Cumi pawl cu Bratislava, Kosice, Presov pawl an si. Ahmaisa pahnih ahcun Latin daan a hmangtu Catholic mipi pawl an um ih, a pathum nak khuapi ah cun Byzantine daan (asilole) Greek Catholic mipi pawl an um. Nithum a rei dingmi cumi khualtlawnnak ah nihnih cu a hmaisa bik khuapi ah a um ding ih, ramtin upa pawl thawn President inn pi ah an tong aw ding ih, biaknak lam thurelkhawm nak pawl cu St.Martin Cathedral ah tongaw ding an si. Cutivekin Slovakia ram ih Lutheran Kohhran thawn thlacam nak an nei ding. Cutiin karuna (zangfah lainat nak hnatuan) ih Sister pawl (Mother Teresa Sister kaing) pawl thawn khal a dang ten an tong aw ding.

          Slovakia ram ih Catholic Bishop pawl pawlkom ih simrelthei nak anei tu Fr. Martin Kramora in "Bishop pawl pawlkom in inn nei lo pawl, innsang pawl, nu pawl le nauhak pawl an kilkhawi phah thu, khuapi asimi Bratislava ah bom a tul tu pawl khal an ti thei tawk in an bom thu, zangfah lainatnak hnatuan tuan dingah a kaih zet mi hmun a si thu, Pope cu cutawk hmun ah a feh ding. Bratislava ah Pope cu Jew pawlkom pawl thawn khal an tongaw ding thu, Pope an mah pawl thawn an tonawk nak ding hmun cu Rybne Namestie tualrawn a si ding ih, aveihnih nak leitlun ralpi ih that a tuar tu jew pawl von mang nak hmun tiin an nem hnget.

          Cutawk hmun cu a hlanah Jew biaknak a bia tu pawl ih biakkhawm nak a rak si dah zo nan communite thuneih nak an ngah tikah siat suah theh a rak si. Curuangah hminsin tlak tiin nemhnget a si. Cutiin Pope cu presov khuapi a feh cih ding. Cutawk hmun ah Byzantine daan a hmang tu Catholic mipi pawl thawn tong aw in, an mah pawl thawn thlacam nak an nei ding. Cutiin Kosice ah tlung in, mino pawl thawn Loka Motiva lek nak zung ah an tong aw ding. Amah cu Rome pawlkom thawn khal Lunik IX hmun ah an tong aw ding. Anmah pawl cu covo sungin, ziang ih rel lo nak a tuar tu pawlkom an si.

          Cutawk hmun ah Salesian pawl ih a tha zet mi tumtah nak hmun a si. Salesian pawlkom in cutawk hmun a um nak cu kum tampi a rei. Cutawk hmun ih Kohhran mipi pawl ih thlarau lam le zangfah lainat nak hnatuan pawl tuan a si. Pope Francis cutawk hmun ah feh in a zoh duh. Cui hnu ah Kosice ah feh in mino pawl thawn an tong aw ding.

          Pope cu a tui tum a khualtlawn nak cu September 15 ah Sastin ih riahsiat nak pasarih Bawinu upat nak hmun ah Missa raithawi nak in a cem ding. Kumtin September 15 ah khawmzawh tu pawl cu Bawinu upat nak hmun ah khawmzawh nak neiin Slovakia ram a bawm tu Bawinu puai tuah a si. Himi puai cu ram hrang a thu pi mi puai sung ih pakhat a si ve. Himi thuthang cu Rome Reports thuthang ihsin kan don mi a si.

https://bit.ly/3CZVvwW