Singapore Catholic Pawlpi a thlennak kum 200 kim Jubilee tuah. December 14, 2021

Singapore Catholic Pawlpi a thlennak kum 200 kim Jubilee tuah.

December 14, 2021

              Singapore Catholic Pawlpi cu an ram ih Catholic Kohhran a thlennak kum 200 kim caanserh cu kandung zarhah an tuah. Atuvekih an tuah nakah a hleice in Missa raithawinak an tuah ih Singapore ram ih ummi Catholic Parish Biakinn 32 ah zanlam 6 ah bangaw in khawnglawng an tum ih Pathian hnen lungawi thu an sim.

              Singapore ramih a hmaisabik Biakinn asi mi Tuukhal tha Cathedral Biakinn ah Singapore Archbishop William Goh in a hoha mi Missa raithawinakah an tel ih Biakinn zaten in hminsinnak pek ding can an hngak.

              Singapore khuabawi Lee Hsien Loong khal in a nu pi Ho Ching thawn Missa raithawinakah tel in Catholic Pawlpi Singapore ram ih a um nak thawn tuahtuan nak pawl hrangah lungawi za a si thu cu Missa raithawinak ih a tel nakin a theih pit thu, December 11 niih tuahmi lungawi thusimnak Missa raithawinak ah Pope aiawhtu Apostolic Nuncio Archbishop Mareu Za Lewski khal a tel ve.

              1821 December 11 niah France Puithiam pakhat asimi French Saint Laurent Imbert in Singapore tikulh ah a hmaisabik Missa raithawinak a tuah tu tiin an zum ih a Bishop a si mi Bishop Esprit Marie Joseph Florens hnen ngan mi caah theih a theih thu, cui Puithiam cu Singapore tikulh hnen Korea ah rian a tuan bet nak ihsin 1849 September 21, a kum 43 ah Pathian thu ruangah thah a tuar. Anih cu 1984 ah Pope John Paul ih a nemhnget mi Korea ih sin Pathian thu ruangah thah a tuar tu mi raltah 301 sungih a tel ve tu a si thu khal a sim.

              Tuini tuicaan ah Singapore Catholic mipi mipum 300000 hrawng an um ih, Singapore ram hrangah khat lam khat lam ihsin hnatuan tu khal an si. Archbishop William Goh in hi kum 200 kim can cu Singapore Catholic pawl in danglam zetin timtuah in an tuah thei ruangah lungawi za a si thu le Pathian hnen lungawi thu khal a sim. Himi thuthang cu Vatican thuthang ihsin kan don mi a si.

https://bit.ly/31TmnkJ