Sister pawl in Pope Francis ih kiangkap kilhimnak thlun in Philippines ah hnawm sar.

Sister pawl in Pope Francis ih kiangkap kilhimnak thlun in Philippines ah hnawm sar.

          Philippines ih Sr. pawlkom pakhat in Pope Francis ih kiangkap kilhimnak ih thlarau lam ah hnawmsarnak community pakhat an rak tuah thok.

          “Laudato Si (Praise Be), kan ruuninn kilhimnak” cu 2015 ah an rak suah.

          “July 02, Zarhpi ni Missa Sumnak theh ah, convent tlawng dung, lamzin parih hnawm pawl kan sar thok,” tiin Sr. Sophia Oshita, SCG community hotu in a rak sim. “Nan cangvaihnak fate pawl in a tap rero mi leilungpi thawn kan naihniamnak ah lo hruai hram seh,” tiah a rak sim bet.

          A mah cu the Caristas Sisters of Jesus, Suore della Carita di Gesu (SUG) sungtel a si.

          Vietnam Sister pakhat le Japan mi Sr. panga pawl cu rampi ih khualipi, Manila nisuahnak thlanglam ih province pakhat, Laguna, Binan ih Caritas Don Bosco School ah an tuan.

          “Thla tin ten Laudato Si ih tumtah mi 7 hrangah pakhat khat tuah kan tum. Hnawm sar nak, a dang ten retnak le tha ten hlon ding hi kan cangvaihnak pawl sungih tel mi an si ve,” tiah Sister Oshita in a rak sim.

          “Congregation pakhat dinhmun in, Laudato Si Platform ah kan tel. Community pakhat ciar in Pope Francis ih sawmnak lehrul dingah an zuam ih mipi thatnak hrang, a hleice in kiangkap kilhimnak hrangah pakhat khat an tuah,” tiah a rak sim bet.

          Laudato Si ih tumtah mi pasarih pawl cu a tap rero mi leilungpi, farah harsa pawl ih tahnak, sumdawnnak pawl, nunram um tud aan pawl, fim zirnak, thlarau lam le community ih telnak pawl an si.

          “Lamzin tluan ih hnawm pawl thuhla ah kan thin a nuam lo. Zohman in hi hnawm an sunsak lo ih lamzin tluan ih ui co pawl ih eek pawl; sunsak mi taktak cu mawtaw sukso pawl an si,” tiah a rak simfiang.

          “Kan mai dungthluhntu hnatuan cu tlawng phuan rero ding hi a si. Nitin kan hnatuan men hman ah kan buai tuk. Asinan, Zarhpi ni Missa Sumnak ah, thok ol deuh dingin kan tuah. Hi ziaza fate pawl in mipi pawl ih ziaza thleng thei dingah le kiangkap sunsak thiam dingah ruahsannak kan nei,” tiin a rak sim.

          Sr. pawl in khuapi kiangkap ih hnawm pawl sar dingah thubohcatnak an rak tuah. Ziangah tile Zarhpi ni ah mawtaw sukso an mal deuh.

          St. John Bosco ih Salesian Italian Puithiam pawl cu, a dintu Fr. Antonio Cavoli, SDB le a bawm tu, Venerable Vincent Cimatti, SDB pawl in the Caritas Sisters of Jesus Congregation cu 1937 ah Japan, Miyazki ah an rak din.

          Japan, Korea, Philippines, le Vietnam pawl tel in ram 15 pawl ih tuan tu Sr. 905 hrawng an um.

          Philippines ah an Congregation in Sr. 12 thawn tlawnginn pahnih an nei.

          Hi thuthang cu RVA thuthang ih kan ngah mi a si.