SJA kum 175 kim Jubilee lungawi thusimnak Missa Mawlamyine ah tuah. (June 19, 2022)

SJA kum 175 kim Jubilee lungawi thusimnak Missa Mawlamyine ah tuah. (June 19, 2022)

           St.Joseph Sister kaing (Congregation) Kawlram ih a thlen nak Pathian riantuannak kum 175 kim Jubilee lungawi thusimnak Missa cu Mawlamyine Catholic Bishop Maurice Nyunt Wai in a hoha ih a cawl zo tu Bishop Raymond Saw Po Ray khal a tel. June 16 Jubilee hmuak nak program cu zanlam 4 ah an thok ih on puai caanserh theh ah thlan ah feh in nunnak a cem zo tu Sister pawl upatnak le thlacamnak pawl an tuah. Jubilee puaipi June 17 zinglam 9 ah lungawi thusimnak Missa raithawinak cu Mawlamyine Catholic Bishop Maurice Nyunt Wai in a hoha ih a cawl zo tu Bishop Raymond Saw Po Ray, Diocese a phunphun ih Puithiam pawl, Brother pawl, Sister pawl le Kohhran mipi pawl khal an tel.

           Jubilee Missa raithawinakah Golden Jubilee tuahtu sister pakhat le silver Jubilee tuah tu sister 3 pawl ih lungawi thisimnak Missa thawn khal hmunkhatten an tuah. Missa raithawinak theh sun nazi 2:30 hrawngah hlasak nak program pawl le Jubilee tuah tu pawl sunloih nak program khal an tuah.

           St.Joseph Sister kaing Kawlram ih a thlennak kum 175 kim Jubilee hminsin nak tiin Mawlamyine Catholic Bishop Maurice Nyunt Wai in hla a phuah sak mi "zanmang sungah hmun in pe aw" timi St.Joseph thawn pehpar mi hla cu SJA fanu pawl in Ukulele tum in a lut duh tu pawl ih an sak caan ah Bishop khal in hmunkhat ten amah rori in sak in a sunloih.

           St.Joseph Sister pawl cu Kawlram ih a thleng mi a hmaisabik nunau Pathian riantuan tu an siih 1847 June 17 ah Mawlamyine ih an thlen ruangah himi puai tuah ni ah kum 175 a kim cekci vekin ahmaisabik a thlennak hmun ih tuah nak khal a si. Aliam zo mi 1997 ah kum 150 kim puaipi cu Yangon khuapi ah sunlawi zet in an tuah thei nan tuitum ah cun thuhla a phunphun ruangah Diocese a phunphun ih Kohhran mipi pawl thawn Pathian hnen lungawi thusim in tuah a si.

           2022 ahcun SJA Kawlram hrang Jubilee kum tiin an nemhnget ih Mandalay, Kalay, Lashio, Myitkyina Diocese ih Waimaw khuapi pawl ah tuah asiih a vei 5 nak tuahnak a si. Kum cem lamah Hakha Diocese ah tuah ding a um. St.Joseph Sister kiang cu 1832 ah St.Emily De Vailar in a din ih kaing ih thulu cu "nuncem tiang riantuannak" ti asi. Himi thuthang cu RVA thuthang ihsin kan don mi a si.

https://bit.ly/3tLugDm