Sri Lanka Catholic Sr. cu rampi laksawng tacik thawn sunloihnak ngah (October 20, 2022)

Sri Lanka Catholic Sr. cu rampi laksawng tacik thawn sunloihnak ngah

(October 20, 2022)

          Sri Lanka ram ih Carmelite Catholic Sr. pakhat cu (2022) hrangah rampi ih laksawng tacik thawn sunloihnak a ngah. Cui Sr. ih hmin cu Mary Angelika tiah an ko. A mah cu Carmelite Dungthluntu Sr. congregation sungtel a si ih 2022 hrangah ‘Guru Prathiba Prabha’ laksawng tacik a rak ngah. Hi laksawng cu Sri Lanka ram ih fimthiamnak lam zungih sunloih mi ‘fimthiamnak lam ih mi thiam bik laksawng’ a si. Hi caanserh cu kumtin ten leitlunhuap saya/sayamah pawl sunloih ni ah an sunloih theu. Hi tacik thawn sunloihnak ih tumtahnak cu ramsung ah a thiam zet mi fimthiamnak lam thangso ter dingah zuam zet ih zirh duh tu a si tiah a sim.

          Hi caanserh ah ramsung ih district (9) ihsin tlawng uktu (45) le saya/sayamah (90) an rak tel. Hi tlawng uktu (45) sungin Catholic tlawng uktu (4) an rak tel. An mah pawl cu Bro. C. Vijayathasan, Saklam district ihsin Sr. Mary Angelika, nisuahnak district ihsin Sriyapushpam AC, nitlaknak lam district ihsin Sr.Nilanka Lancer HF pawl an si. Sr. Angelika cu fimthiamnak nunram ah kum (22) rei a rak tuan. Neta lam ah assistant tlawng uk tu dinhmun in tu tiang tlawng uktu dinhmun in Jaffna ih um St. Don Bosco tlawng ah a tuan rero lai.

          Hi tlawng cu Sri Lanka ih um, Tamil tong thawn zirh mi tong thiamnak ceknak exam ah thiam hleice mi tlawngta suahsak thei tu tlawng pakhat khal a si. Hi tlawng hruaikaitu pawl cu Dungthluntu hna tuan rero tu Carmelite Sr. congregation in a si. Tlawng dinhmun in tlawngta pawl ih ziaza le a tha zet mi fimthiamnak an thupit. Tu vekih sunloihnak laksawng a ngahnak cu covid (19) a cannak kum 3 sungah ram ih fimthiamnak zungih lamhruainak vekin zuamnak thawn saya/ sayamah pawl siseh, tlawngta pawl ih nu le pa pawl siseh, lamhruai in ap aw ih a rak tuan ruangah a si.

          A mai kawhnak thawn pehpar in mithmai pan ten, ziaza tha mi Pathian duhdawttu, midang pawl khal duhdawttu, ram mipi tha pawl suahsak dingah a si thu, a mah hi ruahnak pawl rak ngah ter tu cu Albert Schweitzer a si thu, ‘hlawhtlinnak cu mithmaipannak tawhfung a si lo. Mithmaipanak sawn kha hi hlawhtlinnak ih tawhfung a si. Na tuah rero mi thil na duh a si le na hlawhtling ding tiah Sr. in a rak sim.

           Hi thuthang cu RVA thuthang ih kan ngah mi a si.

https://bit.ly/3Adwrmr