Sri Lanka ramah nikhua siatnak ruangah mipum 5 thi, 60,000 harsat tong (October 19, 2022)

Sri Lanka ramah nikhua siatnak ruangah mipum 5 thi, 60,000 harsat tong

(October 19, 2022)

Tubai teih ruah tamtuk a sur ruangah Sri Lanka ram ah malbik mi 5 an thi ih, mi 60,000 in harsatnak nasa zet an tong.

Sri Lanka cu tikulh ram pakhat a si vekin hmun tampi cu ruah tamtuk surnak in a siatsuah thu theih a si.

Ruahti tam tuk ruangah minung 60,000 lenglo cu inn le lo tanta in hmun himnak ah an tlan.

Vanduai tong pawl bomnak Disaster Management Center cun vansiat tongtu pawl zate hrangah beunak an tawlrel sak ding thu a sim.

Sapugaskanda ih tiliknak hmun ah ti a leuh tu pakhat cu ti sungah a pil ih a thi.

A thi mi hi October 16 ni, zanlam ah rualpi dang thawn Sapugaskanda ih ra mi a si ih, Rathnapura khuapi, Ayagama veng ih um, kum 36 mi a si ti’n Sri Lanka Palik cun a ti.

A dang kum 26 mipa pakhat khal October 16 ni thotho ah, ti a leuh ih a pilnak hmunah an sar.

Ging Tivapi ih tidai a thang tuk ruangah Ganegama le Wakwella sehvel ih lei niamnak hmun pawl ah ti a lik rero lai.

Ambalangoda, Batapola, le Galle Elpitiya ih lampi pawl khal tidai in a philh thluh.

Nilwala Tivapi ih tidai cu a thang rero lai. Thlanglam peng ih hmun tampi khal ah tidai a lik roro.

Matara kiangkap sehvel ah tipi thuanthum ih tidai pawl an cang tuk ruangah ngakai tu pawl khal hnatuan an feh nawn lo.

Kalutara, Nuwara Eliya, Rathnapura, Kegalle, le Colombo khuapi pawl le hmun dangdang khalah leimin a um thei ruangah ralrin peknak pawl tuah rero a si.

Ingiriya, Walallawita, Palindauwara le Bulathsinhala kiangkap hrangah level three red warnings timi ralrin peknak tuah a si zo ti’n vanduai tongtu bomnak Disaster Management Center cun a sim.

Tikong lam tawlrelnak zung khal cun ruah sur pehzulh ahcun a niam deuhnak hmun pawl ah ti a lik sinsin thei ti’n ralrin peknak thu an suah ve.

Nikhua tahnak zung ih Director tuanvo neitu, Athula Karunanayake khal in Sri Lanka ram hi to-ruah ih a nen laifang a si thu a sim.

Zanlam kau, asilole, zantim ah rampi huap in ruah cen thei dinhmun a si.

Reilo te sung thlisia ruahsia thleng thei dinhmun a si thu khal Athula Karunanayake cun a sim bet.

Hi mi thuthang cu RVA thuthang in kan dong mi a si.

https://bit.ly/3VI8rRx