St. Dominic a nunnak a cem nak kum 800 a rei zo

St. Dominic a nunnak a cem nak kum 800 a rei zo

        August 6,2021 St. dominic cu 1221, August 6 niih a nunnak a cem ruangah tuikum ah a nunnak a cem nak kum 800 a kim thlang. Curuangah leitlun killi ih Dominican pawlkom zaten an mai pawlkom rak din tu an pabik a nunnak a cem nak kum 800 kum Jubilee puai cu tuikum sung tuah dingah an thok zo a si. A nunnak a cem caan ah a kum 51 lawng a si lai. August 6 ni cu Nu Catholic Pawlpi ih biakkhawm nak kum khat sungah Bawi Jesuh hmuihmel thleng nak puai ni cu cu mi puai hnu nihnih a rei August 8 niah tuah a si. Himi pawlkom a din tu an pa bik a nunnak a cem nak kum 800 Jubilee tuah dingah lam hmuh nak tiin a kau lam pi 20, a sau lam pi 16 a sang mi zuk an suai. Cui zuk cu St. Dominic cu a nau le pawl thawn cabuai ih an totlang zuk a si.

       Cui zuk thawn pehpar aw in a tu ah an pawlkom ih taunvo nei tu upa asimi Fr. Gerard Francisco Parco Timoner in Vatican zung ih a sim fiang nak cu himi zuk cu Mascarella cabuai tin kawh a si thu, a zuk taktak cu bologna khuapi ih a ummi Mascarella ih a thianghlim mi Maria biakinn ih a um thu, Mascarella cu hmun kawh nak a si thu, himi zuk cu kum 800 kim Jubilee puai ih zuk tiin hman a si nak cu St.Dominic a mah pakhat lawng sunloih siloin a pawlkom sung tel a nau le pawl thawn tuah nak lam a tuah duh thu, zung sung ih then tampi cu a tu a veikhat nak tuah mi Jubilee puai ah leitlun killi ih Pathian riantuan tu ulenau pawl aveikhat nak pum khawm ding a si thu langter nak a si thu, cabuai cu hmunkhat ih um nak langter nak a silo. St. Dominic ulenau pawl karlak ah lu par ah tleu nak a um nak zuk cu St. Dominic mithianghlim tiin khaisang a si hnu reilote ih suai mi a si. A kum cekci in cun kum 1234 St. Dominic a thih hnu kum 13 a rei hnu ih suai mi a si. Cutivekin St. Dominic cu a thih hnu kum 13 ah mithianghlim tiin rak khaisang a si. Jubilee St. Dominic cu Bologna ah Pathian thu a sim nak hmun a si.

         Amai ruang khal Bologna lawngah an phum ih, upat zet in zoh a si. Curuangah Bologna cu Jubilee hmun a si. A nunnak a cem ih an phum nak hmun ihsin mithianghlim tiin an khaisang hlan kum 1 a duh ah biakinn ah an thawn. Cutiin thawn ding ih an phorhsal tikah kum 13 rei lei tang ah thli le ni dailo in a ruang an laih tikah a rim sia siloin rim menmen khal asilo mi a rim theih a si. Asinan St. Dominic ih ruak a phorh tu a nau le Dominican pawl ih an sim nak vekin rim sia nam loin, rimhmui lawng an thei. Cui rim hmui cu a kiang ih um mi pawl hnen khal an mang a bang tiin himi thilcang mi thawn pehpar aw in Blessed Jordan of Saxony in ngan in hminsin nak a tuah. Blessed Jordan of Saxony khal Dominican pawlkom ih ahmaisabik lam pawlkom sung tel pakhat a si. An laih sal mi St. Dominic ih ruk cu lungto thawn tuah mi thlan um nak ah an zawn nak lamzin tluan khalah cui rimhmui thawn a khat. Himi rimhmui cu Bawi Khrih ih rimhmui ziangtin a ngah timi tetti pakhat a si thu (IIKorin 2: 15-16) "Ziangahtile kannih cu Khrih in Pathian hnenih a pek mi zihmui rimthaw bangtuk kan si.

          Cui zihmui cu rundam nak lamzin ih a feh rero lai mi hnen ah le hloh ral nak lamzin ih a feh rero lai mi hnen khalah a thleng theh a si. A hloral cuahco mi pawl hrangah cun hi rimhmui cu an thih nak rim sia a siih, rundam nak a ngah lai rero tu pawl hrangah cun nunnak pe tu rim thaw a si" tiin a ngan. A tui caan ih Dominic Tuikum May thla ah Pope Francis cu St. Dominic ih a thih nak kum 800 kum Jubilee puai hrangah cibai buk nak ca a kuat. Pope ih a ngan mi pawl ah Dominic ih Kohhran hrang a pek awk nak a thupi mi tawh pawl thu a ngan. Cumi thu pawl cu, 1. Tlawngta pakhat dinhmun in Palencia ih fimthiam nak a zir lai ihsin "zumnak le zangfahnak, thudik le duhdawt nak, tlaitlung nun le zangfah lainat nak" pawlkom dingmi thil a si timi a pom. Blessed Jordan of Saxony ih a ngan mi vekin Dominic san laiah rilrawn ih um nak a um ih mi tampi harsat an tuar. Rapthlakzet in an thih nak cu mah rori in a tong. Cumi a rapthlak mi dinhmun bawm dingah Dominic cu zangfah nak thinlung thawn a duh zet mi cauk pawl zuar in harsat tuar pawl, mi zonzai pawl bom nak hmun a phuan. (Libellus, 10) "Thudik le zangfah nak hnatuan" a tuan tu Dominican pawlkom pawl ih hnatuan mi pawl cu Pope in pehbet in a sim.

           Francisco de Vitoric ih hnatuan nak cu hmun tinkim ih minung covo upadi ih a hrampi a si. - Himi a hrampi upadi ah Antonio Montesinos le Bartolome de las Casas hnen minung sinak le cumi hmun ih a um mi pawl ih covo humhim sak nak ruah nak pawl, cumi thu thawn pehpar aw in biak nak lam a hram pi ruah nak pawl thawn America khal ah siseh, Asia ih Domingo de Salazar khalah siseh a kilhim sak thei. 2. Thil thupi mi ah nunnak ih a thupi mi Dominic cu amah kha Father tiih kawh ding hnak in Brother tiih kawh a duh sawn. An pawlkom sungih a hlan ih an din daan a si. Himi cu pawlkom sung thleidan nak um loin zaten ulenau thinlung nei dingah a si. Cutivekin dinhmun, thuhla pakhat thawn pehpar aw in zaten ruah thei nak, thu botcat thei nak neih nak pawlkom a si. 3. Pawlkom ih daan cu nunram ih ziangvek dinhmun khalah siseh hman nak Dominican pawlkom sung tel pawl ih ahleice ih an hnatuan mi cu "thusimnak" a si.

          Ansim mi ca cu Siena khuapi ih St. Catherine ngan mi ah siseh, fimthiam nak thawn langter in Pathian thu pawl sim nak ah Blessed Fra Angelino ih zuk suai mi ah siseh,zangfah nak hnatuan pawl khal Lima khuapi ih St. Rose, Blessed Johne maciasle St. Magaret of Castello pawl ih tuh nak ah hmuh a theih. Cutivekin tuikum ah kanmah pawl in Dominican innsang in Pathian hrang thah a tuar tu pawl khal hngilh lo ding. Ziangruangahtile Pathian hrang thah tuar nak cu tha a cak zet mi thusimnak a si. St. Matin de Porres ih a tha zet mi nunram khal mi tampi in an thlun. Mi mal nak hmun ah siseh, mi tam nak hmun ah siseh, Gospel thuthangtha lungawi nak thu a theih ter. 4. Biaknak lam ruah nak thangso nak Pope Francis in Dominican pawlkom sungtel hnen lungawi thu a sim nak ah biaknak lam ih fim thiam nak khal san a thleng ter ruangah a si. Gospel thuthangtha sim nak in thaten a pe aw. Ahleice in biaknak lam ruah nak thar pawl a thangso nak in zum nak ih a thok nak pawl a thei thiam ter deuh deuh.

        Europe ih um mi phunsangtlawng pawl hnen Dominican pawlkom sung tel pawl thlah in fimthiam nak a hlawm ter. Hmailam ah thusim thiam suak vivo ding ih a hman ih, a dik mi Bible par ah a bun aw mi biak nak lam ruah nak pawl um dingah a tul thu, biak nak lam thawn pehpar aw in thusuh nak pawl cu a thu kaih zet in, upat nak thawn sim thei dingah a tul htu Dominican cun thaten a thei thiam tiin Pope in a sim. Himi thuthang cu Aleteia thuthang ihsin kan don mi a si.

https://bit.ly/3ArFfmD