St. Joseph Sister pawl in saklam Nuachyankone veng meikang nak a tuar tu pawl hrangah a tul mi pawl bomnak an pe April 14, 2021

St. Joseph Sister pawl in saklam Nuachyankone veng meikang nak a tuar tu pawl hrangah a tul mi pawl bomnak an pe

April 14, 2021

            Mandalay myo, Aungmaytharsan myone, Upuktaw veng, ni tlak nak lam zin 3 zin 73 le 76 lamzin karlak saklam Nuachyankone ah April 13 ni kawl pawl ih kumthar puai (Zilawngpuai) hmuah ni zinglam 4 hrawng ah mei a kang ih inn 29, innsang 40 mipum 181 meisa kang nak an tuar. A tlun ih meisa kang a tuar tu mipi pawl hnenah 14.4.2021 ni zinglam ah, Mandalay St.Joseph  Sister pawl in bomnak a pe tu pawl hnen ihsin an hlut mi a hlu pawl cu bet in fang, siti, noodles, biscuits, khasuan, nga, datsa, sapian, thuamhlaw pawl innsang 40 hrang an hlu. Meisa kang nak a tuar tu mi pakhat in ‘ziang thilri hman kan la man lo. A zaten a  kang cih thluh. Himi hman ruah a sur ruangah meisa kang feh daan a nuam te lam. Ziangkim a thok ihsin thok sal ding a si mai. Ziang ti tha maw' meisa kang a tuar tu kum 70 hrawng a si mi pitar pakhat in a sim.

            Kum 15 mino pakhat khal in “himi kan inn a si. Zoh hnik uh a zaten a cem thluh. Zo hman in in bawm man lo. Kan inn kiang ih putar pakhat tla cu a leng hman  suak man lo ruangah tikhur ah dawp in a um. Mei a mit lawng in a suak thei. Van that nak ah” tiin a sim. Mei a kang thok nak inn dunlam tlun khuh luanglu parah thilri pakhat a tla ih rinloin thawm a thang ih a sen thu, luanglu tang ihsin a siat ih, meikhu um loin mei kang ter tu thilri pakhat khat parah a tla mi asi thei thu, meisa ralrin lo ruangah kang siloin rinhleh um mi meikang nak a si thu, meikang mit nan a kang deuhdeuh nak khal mangbangza a si thu” meikang nak a zoh tu meikang nak veng kiang ih a ummi mi pawl in meikang nak thu an sim nak a si.           

            Meisa kang bom nak inn ih ummi Muslim meisa kang a tuar tu pawl hnenah St.Joseph Catholic Khristian Sister pawl in Mandalay myo, Masoeying phungki tlawng ih ummi phungki pawl thawn bomnak an pek mi a si. Meisa kang nak a tuar tu hnenah Mandalay ih mipi pawl in a tul mi pawl bom nak a hlu an pe ih a tui dinhmun hrangah a rem cang hrih ko nain meikang nak  a tuar tu pawl ih nuntu khawsaknak tunding sal nak ding hrangah tuah tul mi tampi a um lai  tiin bomnak hnatuan ih tuanvo nei mi pakhat in a sim. Meikang a tuar tu mipi pawl hrangah (73B lamzin- 4 lamzin, veng then 34 ih kawl pawl ih hall inn pakhat cu on sak a si. Sunvu cutawk ah an um ih mihrek cu zan caan ah sungkhat nai pawl inn ah an it ih thenkhat khal inn sang cop in an um tiin theih a si. Himi thuthang cu RVA Myanmar thuthang ihsin kan don mi a si.