St. Junipero Serra ih zuk ret sal nakah California ramthen ih ramkulh uktu in lethmat a tthu September 28, 2021

St. Junipero Serra ih zuk ret sal nakah California ramthen ih ramkulh uktu in lethmat a tthu

September 28, 2021

          Bishop pawl ih ca ah ‘hi Mithianghlim cu America ram ih a um tu pawl hrangah tumtah mi pakhat a rak siih an upadi in ‘America ram hrangah a si lo! California ramthen hrang lawng ah a si’ tiin a zen tiin St. Junipero Serra ih sintuh thawn pehpar in a rak ngan. Spain miphun a si mi California ramthen hotu Gavin Newsom in St. Junipero Serra ih zuk cu lungphun thawn ret sal nak upadi cu lethmat a rak thu zo. St. Junipero Serra cu America ih a um tu pawl hnenah Bible thuthangtha tleunak rak hoha tu a si.

          Mithianghlim ih sintuh cu California ramthenih a sungkhat pawl, a hleice in thlanglam hmun pawl ah an rak tuah ko nan kan dungkum ramhuap ih duhphorhnak ah nunphung lam dodal in an siatsuah. Curuangah zuk cu an rak ret tha sal. Mithianghlim ih zuk cu ramthen ih khuapi Sacramentu ih um pangpar hmuan ah lungto thawn 1960 ah an rak tuah.

          Asinan, ramthen ih upadi lam pawlkom in Mithianghlim ih sintuh cu a hlan a um nakih re nawn lo dingah mee zuuk in thubohcatnak an rak tuah.

          Asinan, kan dung tlawngkai ninga ni ah vei 338 nak thurelkhawmnak ah meethlaknak thawn an rak botcat ih ramthen ih hotu Newsom in lethmat a rak thu. Cu vekin tui thlathok lam khal ah Los Angeles ih Archbishop Jose H. Gomez le San Francisco ih Archbishop Salvatore J. Cordileone pawl in Wall Street Journal op-ed piece ti mi ca an rak ngan mi cu upadi lam pawlkom in Mithianghlim cu ‘California ramthen hotu’ tiah zen phah in an sim ih ramthen ih thuanthu cu a sual zawngin a langter tiah an rak ngan.

          Vei 338 nak hluatdaw thurelkhawmnakah Mithianghlim ih rian tuannak ah upa, nauta pawl hnenah sal tuannak, kut ke kim lo pawl nat ter nak, miphun cimit dingih thahnak, nunau pawl ih sinak siatsuah ter nak pawl hmuh a theih tiin a rak puhmawh.

          Tui san ah sual puhmawhnak a tampi ko nan ziang vekih mi hminthang thuanthu lam mifim hman in Mithianghlim ih tuan daan thawn pehpar in tu vekih at thlak za mawhpuhnak vek a rak tuah thu, Franciscan pawlkom 21 khal California ramthenih tangphawlawng cawlhnak ah America ih suak tu cui hmun in um tu pawl hnenah Pathian thu simnak thawn Gomez le Cordileone pawl in an rak ngan.

          Archbishop pawl in California ramthen ih upadi lam pawlkom hnenah tumtahnak tha zet thawn suah mi ca uk pakhat ta an sirhsan ih cui cauk cu thuthang la tu pakhat a si mi Elias Castillo in a Cross of Thorns: The Enslavement of California’s Indians by the Spanish Missions (Hlin Thinglamtah – American suak cui hmunih um tu pawl in Spain rian tuantu pawl hmuhsuam nak) tiih hmin pek mi ca uk pakhat a si.

          “Kan mah dinhmun in Catholic tam sawn umnak ramthen pahnih ih um Diocese hoha nakah mai pipu pawl ih zumnak rothil a kilkhawi tu California Catholic thawngzalenglo pawl rianih a umnak thawng in Archbishop pawl in an rak ngan. America ram ih suak cui hmun ih um tu pawl hmuhsuam tuarnak cu a kha zet mi thuanthu a um ding ti cu theih a si. Thuanthu cu a hnok ih a thu um daan lawng a thupi. 2015 ah Pope Francis in Mithianghlim ih a rak khaisan mi Mithianghlim cu ziaza hnok tuk a nei tu tiih tarlang an duh. Asinan, American ram ih a suak tu pawl rak humhimtu, American ih um tu pawl hnenah thi dingih thupeknak pawl nasa zet ih dinpi in rak humhimtu tiin an nemhnget.

          St. Serra cu California ih a um tu pawl hrangah hngilh a theih lo mi pakhat a si. Ziangah tile a mai nunram hmuahhmuah rak aptu a si. St. Serra cu a kum upa ih a nun a nuam lo nan Mexico khuapi sungah peng 2000 luan lamwsio in cu tawkih a um tu pawl ih caantha nemhnget sak dingah thuneitu pawl hnenah duhphorhnak tuah dingin an rak dil. Hmailam caan ruahsan in a liam cia mi pawl an rak langter. Cu mi pawl ih caantha dil in rak humhim tu mansalnakah a mai zuk tuah in cui caantha thawn kaih in rak khuasak tu California ih a um tu pawl ih hminsinnak vekih tha hmuh a theih nawn lo thu Archbishop pawl in an rak ngan.

          Santa Clara University in a cawl zo tu Junipero Serra: California, Indians, the Transformation of a Missionary ca uk rak ngan tu khal a si mi Robert M. Senkewicz in 2015 ah Catholic World Report thawn thusuh awknak ah California ramsung rian tuan daan cu California ih a um tu pawl sal ih hmannak ihsin humhimnak famkim ten pe thei tu ti daan a si tiah a rak sim.

          St. Serra le Franciscan pawlkom sungtel dinhmun in cui hmun ih a um tu pawl ramri a rak nor tu Spain pawl ih hmuhsuamnak cu a hleice in upat in a rak humhim. Spain lothlo tu pawl, lungmankhung a lai tu pawl le ralkap pawl in cu tawkih a um tu pawl leiba tampi ah pil ter in an thih tiang leiba sam tei nawn lo dingih bumnak khal tha ten an rak kilkhawi.

          Curuangah cui hmun ih a um tu pawl in Pawlpi cu an mah hrangah beunak, rinsan nak, humhimnak ah a cohlang ih an mai nunphung zumnak pawl in Khristian biaknakah an rak thawn. Curuangah cui hmuh ih a um tu pawl hrangah cun St. Serra le Franciscan cu an mai hrangah rundamtu le rinsan mi ah an rak cohlang.

          Hi thuthang cu Aleteia thuthang ih kan ngah mi a si.  

https://bit.ly/3olpzyd