Synodal Church nunpi taktak thei dingah lungput thlengawknak nei dingin Cardinal Charles Bo in sawmnak hlan (February 26, 2023)

Synodal Church nunpi taktak thei dingah lungput thlengawknak nei dingin Cardinal Charles Bo in sawmnak hlan 

               Bangkok ih tuah mi Asian Synodal Assembly tonkhawmnak ih netabik Missa sumnak cu February 26 ni ah an rak tuah ih cumi ah Asia Bishops Pawlkom ih lubik, Cardinal Charles Bo in a rak hoha.

Cumi Missa sumnak ih a thusimnak ah Cardinal Charles cun synodal church le Bawipa Jesu ih ramcar lakih a khualtlawnnak (journey) a rak tahthim. Hi zalamtluan hi harsa zet pakhat a si ko nan, a ttul tuk mi a rak si fawn. Ziangahtile, himi hin thu ngainak, hmaiton thurelnak le cekfel awknak thawngin Kawhhranpi ih Thuthangtha a nunpinak ah tampi a rak somdawl thu pawl a sim.

            Kan pahsuak tul mi harsatnak pawl nawr thei ding cun, kan ruahnak lungput pawl thleng a tul thu khal Cardinal Charles cun a rak sim. Cule, a thusimnak ah L.E.N.T cafang hmangin lungput thlengnak thu a rak tarlang. Hmaisabik cafang ‘L’ cu ‘Letting Go’ a si ih, himi synodal church zalamtluan sullam a neih thei nak ding ahcun, synodal church si thei lo dingih in dawnkham tu pawl hmuahhmuah kan bansan le tanta a tul timi a sawhkhih. A pahnihnak cafang ‘E’ cu Encounter ti a si ih, Jesuh Khrih thluntu sinak ah Jesuh Khrih tong ngah tu si ding ih thupitnak a khihhmuh. Himi cun Jesuh Khrih ih keneh thlun ding khal in sawm: hmuh men lawng si loin, zoh ding; theih men lawng si loin, ngai ding; minung pawl ton tikah lan men loin, anmah thawn cawl ta ding; mifarah pawl hmuh tikah zahpi men loin, zangfah thinpemnak neih ding thu pawl in zirh a si ti’n a sim.

          A pathumnak cafang ‘N’ cu Neighborliness (Innhnen sinak) a si. Samaritan mithapa thuanthu thoknak ah ‘Ka innhnen cu zo so a si?’ timi thusuhnak kan hmu (cf. Lk 10:29). A netnak ahcun zangfahnak neitu hi innhnen a si mai. Asia ah hin, kannih Catholic zumtu Khrihfa pawl hi mi malte kan si ih, social lam, ramkhel lam le biaknak lam zawng ih buainak a phunphun lak ih um mi kan si. Cutivek buainak tampi lak khal ah, mi tlasam pawl bawm dingah kawh mi kan si. A neitabik cafang ‘T’ cu Transformation timi thlengawknak a khihhmuh. Himi zawn ah Cardinal Charles cun Saam ngantu ih “Maw Bawipa, na thlarau run thlah awla leilungpi cu tuahthar sal aw” timi tongfang vun mangsal in a tanglam vekin a sim: “Synodal zalamtluan kan fehnak ah Thiang Thlarau in ziang in sim timi ngai dingah kawh mi kan si. Curuangah Kawhhranpi sungah tharsuahnak suahpi dingah kekar tlang kan duh a si ahcun Thlarau Thianghlim ih thlengnak huham kan tul; ziangahtile kanmah te’n zianghman ti thei mi kan nei lo. Amah Pathian lawng rian dingin hi synodal zalamtluan kan feh tlangnak ah Pathian ih thlengnak thluasuah kan tul ringring a si”.

         Asian Continental Assembly cu a ra lai dingmi October thla ah Rome khuapi ih tuah ding mi Synod pi hrangah nasa takin timtuahnak neih zuam ding timi thuthluknak thawn net ter ta a si.

https://bit.ly/3krFlbD