Taksa sung thil pawl zuar sak zik te mi mipa pakhat cu minung zuar tu vekin um hrim im a run tu Siangbawi July 31, 2021

Taksa sung thil pawl zuar sak zik te mi mipa pakhat cu minung zuar tu vekin um hrim im a run tu Siangbawi

July 31, 2021

          Zukih hmuh mi Catholic Siangbawi cu ralkap Siangbawi a si. Ralkap Siangbawi ti tikah raldo tu Siangbawi a silo. Raldo tu ralkap pawl thawn hmailam ah siseh, ralbuai nak hmun ah sieh tel in Catholic mi ralkap pawl ih thlarau lam daan pawl asimi sualthlah nak, Missa raithawinak, hriamhma a ngah tu pawl hrang thlacamsak nak, harhdam nak sahrik culhnak saramentu pawl pek nak a tuah sak. Siangbawi cang dingah mi tinkim a cang thei nana a cang duh tu pawl cu nemhnget cia mi a hrampi a simi zir nak tuah lo thei lo tuah a tul. Himi Siangbawi cu nunnak thap nak program pakhat tuah in ruahnak hman ih ruah ngam lomi tuah daan thawn thah zik mi mipa te pakhat a rak run thei.

        Cui nauhak runsuak thei dingah Siangbawi cu misual pakhat vekin um in taksa sung thilri pawl zuar nak pawlkom ih kut sung ihsin a rak run. Himi thu cu Spain tong thawn suah mi thuthang a simi El Pais ah an lang ter.Cutiih an lang ter nak cu mangbangza a si. Ziangruangahtile Siangbawi pawl khal siseh, Catholic Kohhran mi khal siseh, ziangtik hman ah sunloih in a ngan dah lo tu thuthang ah an lang ter nak ruangah a si.

          Cui Siangbawi ih a hmin cu Fr. Ignacio Maria Donoro de los Rios a si. Amah cu kum 57 asiih, a hlan ah ralkap Siangbawi a rak si. Amah cu a danglam zet ih hleiah a hnatuan nak parah a pek awk zet ruangah Princess of Asturias Award for concord laksawng hrang hril a rak si. Amah cu Siangbawi tiin kum 28 hna a rak tuan. Hitivekih a pek awk tehi nak cu mino pawl hrangah a si thu, ziangruangahtile mino pawl cu harsa zonzai pawl ruangah lam a phunphun thawn minung zuar nak an ton ruangah a si.

Zuar daan then thek

          Fr. Ignacio cu 1990 ah El Salvador ramthen ih ahleice in tuanvo pek mi ralkap pawlkom sung tel pakhat a si. Cumi hna a tuan laiah ton mi thinphan mangbangza cu "zuar daan then khat" tiin timi taksa zaten zuar nak a si. Minung taksa thenkhat cu zuar ding ih tuah nak a si. Harsa zet in in le ei hman nei lo tluk in a harsa mi fale 5 a nei  tu innsang pakhat cu an fa kum 14 mi Manuel cu zuar ding ah an ruat. Ziangruangahtile amah cu taksa kim lo a si. An pek ding mi cu America dolar 25 a si.

Cui paisa thawn innsang in le ei an lei ding a si. A lei tu pawl cu mi pakhat ih taksa sung thilri cu dolar 24 thawn lawng an lei nan an zuar sal tikah a let tampi a miat an ngah ding a si. Taksa then cu then menmen asinan a daih mi zuar nak pakhat a si.Cutiih zuar a tong tu fapa cu sa that vekin thah a tuar thlang ding. Then then in sat in an khawm ding. A lei tu paw order a um asile zuar dingah anman. An zuar tikah ram sung thil zuar nak ah asilo. Ramtin thil zuar nak ah an zuar.

Minung taksa zuar nak

          Himi thilcang hman cu thinphan ralthlak za a si. Innsang pakht hrang ziangvek ruahsan nak hman nei nawn lo tiang asiih, anmai sung suak fa rori hman zuar ding tiang a cang. An fapa khal mahlemah humhim aw thei tu, a dam cak mi le a si lo. A lei tu pawl cu minung thinlung nei loin zuar mi thil asimi a lei tu minung pawl that dingah an kut an thup lo. Caan in khal siseh, then then in khal siseh, order an ngah vekin an sat mi cuai thlai in zuar ding an man cia. Ziangvek minung man, minung daan, biak nak lam zianghman thei lo. Thei thiam lo. Thei thiam khalle ziangah an siar lo. Manuel ih thuhla cu kum zabi 2 a rei ih hngilh ding tluk mi thuhla a sinan a tui kum zabi 21 khalah minung pawl cu zuar mi vekin a um rero lai.

Nunnak tiang hlan in harsa zet in a rak run

          Zuar a tuar tu kut ke kim lo mi Manuel cu ramleng ih thil zuar tu pawl kut sung ah a thleng zik te tiin theih a si. Tikcu caan a lak ah hmang men lo in kut ke kim lo mi mino ih nunnak runsuak thei dingin a ti thei pa tawp in a rak zuam. A mah cu Zarhkhat hrawng khabe hmul met lo in a ret. Truck mawtaw pakhat khal a rak sang. Cui hnu ah khua mipi menmen vek in hnipuan a rak hruk. A thinlung daiten um dingin a ret ih cui mifarah mi innsungsang umnak lam ah a rak mawng. Cui innsungsang cu Panchimalco ih um a farah zet mi veng ah an um. An mai dinhmun khal mi zuar tu ah an cang. Fr. in cui innsungsang cu minung zuar nak a tuah tu pawl ih pek mi sumpai hnak ih tam a rak pek.

          Kut ke kim lo mi mipa cu man cia mi mawtaw sungah an zawn hnu ah zamrang ten an feh cih. Hi tiin Manuel cu minung bang lo ih thahnak in a rak luat thei. Fr. Ignacio in thuthang ih thusuh awk nak ih a rak sim mi cu Manuel a run lai ah a ruahnak ah theih mi pakhat a rak nei. Hi mi tlangleng cu a nunram ah veikhat lawng a mawng ding maw? A thlahphoih men ding maw? Nang mah in mawng bang aw la na ruah lo in cui hmun ah lo hruai ding pawl kha na mi theih mi pawl an si ding. Cu mi pawl thawn an run mi naute cu a mai nunram a rak thleng ter thei ding khal a rak thei.

          Nauhak a rak zuar tu innsungsang dinhmun ziangtin a um ding? Hi nauhak ziang tin an lei ti a innsang pawl in thei hai seh. Cui ruahnak parah Fr. Ignacio ih sim mi cu innsungsang ah dik lo ih thu bohcat men a ngah lo. Ziangah tile cui nauhak cu rei lo te ah a thi cing ding. An mah khal in lungawi zet ih an zuar mi a si lo. Harsa zet in an tuar ve ko nan an rak zuar. Ngai ngai ah cun Manuel in a dik mi bawmnak a rak tul. Cui bawmnak a ngah le a innsungsang pawl ih ruahnak vek in a thih tul lo ding. Curuangah a mah cu tha ten an rak tuamhlawm. Din sal nak khal an rak tuah. Hi tiih tuah nak cu thih ding lawng a si lo. Tu hnak in dam deuhdeuh dingah a si. Cu vek in an run ih an rak kilkhawinak in kum 25 rei hnu ah Manuel cu a dam lai.

          Fr. Ignacio a suahnak Spain a thlen ah Manuel a dam taktak thu a rak theih nak cu Manuel in ca a rak kuat ruangah a si. Cui ca sungih ngan mi cu Fr. Ignacio cu a nunram ah ‘a thupi bik mi a si’ tiah a rak ngan. Fr. Ignacio in Manuel a run suak hnu ah ram kiangkap pawl ah a tuan nawn lo. Fr. Ignacio cu thilri hlu tu pawl thawn kom aw in Nazareth Home (Nazareth inn) ti mi pawlkom an rak din. Cui pawlkom cu nu le pa nei lo mi nauhak pawl, innsungsang then aw mi innsang ih nauhak pawl, zuar a tong tu nauhak pawl a thupi bik in kilkhawinak pawlkom a si. Innsungsang pawl cu an farah harsat tuk ruangah cui farah nak pah phah in zuar tuar nak, sualnak sungih an rak pil cu kum 25 lawng a si lo. Tui ni tiang zuar nak, zuarnak ah that in zuar nak, nung cing ih zuarnak pawl a cang. 

          Kum tin ‘Telva’ ih sunloih mi ‘Solidarity’ (pumkhat sinak) laksawng cu tui kum 2021 hrangah Fr. Donaro in a rak ngah. Cui laksawng ih ngah mi American Dollar 20,000 in fang ciin nak leiram pawl a rak lei. Hi tiin ‘Nazareth Home’ ih tul sam mi pawl cu thil ciin nak thawn hmai an nor thei ding a si. Cu vek in tui kum June 30 ah khal Princess of Asturias Award for Concord laksawng hrangah Fr. Donoro hril a ngah thu an rak than.

          Hi thuthang cu Aleteia thuthang ih kan ngah mi a si.

Ref; Aleteia

https://bit.ly/3ynyNw5