Thlang Korea Catholic Bishop pawl pawlkom in Kawlram mipi pawl thawn hmunkhat ih an um pi nak March 12, 2021

Thlang Korea Catholic Bishop pawl pawlkom in Kawlram mipi pawl thawn hmunkhat ih an um pi nak

March 12, 2021

            March 11 niah thlang Korea ih Catholic Khristian innsang pawl in Kawlram ih a cang rero mi ramkhel lam remdai lo nak pawl thawn pehpar aw in an thin a phang thu, hmun le ram sung Democracy cangvaih nak pawl thawn lungrual ten an um thu an pom thu lang ter nak cangvaih nak an tuah thu Younhap News Agency ah an lang ter. March 11ni tlawngkai nili ih tuah mi thlang Korea Catholic Bishop pawl pawlkom ih an lang ter nak ah Korea Catholic Khristian Diocese cu thil dik lo in harsat nak a tong rero tu kan hmun le ram sung ram pakhat asive mi Kawlram mipi pawl ih thi sen luan nak pawl hrangah an thin a phan thu a tel.

            Cutivekin Korea ram khal hlanlai ah ralkap thunei tu pawl ih hmuhsuam nak an rak tuar dah thu, February 1 niah ralkap in thu neih nak laksak ni ihsin thok in a rak dodal tu Kawlram mipi pawl par ih zangfah nak an neih thu, a tui tik cu caan cu Catholic Khristian pawl ih vua caan asivekin mai harsat caan ah hlan nak ah Kawlram ih ulenau pawl hrangah lungrual ten kom nak hmuh ter nakin thu el nak le tangdornak, nat nak pawl an tuar pi thu, Seoul khuapi ih Cardinal Andrew Yeom Soo-jung khal in Kawlram mipi pawl hrangah hmunkhat in tuah ve ding tumtah nak thawn Kawlram ih Yangon Catholic Archbishop Cardinal Charles Maung B hnen tlawngkai ni nga ah America dolar 50,000 an hlut thu khal an sim.

            Remdai ten duhphorh nak nei tu pawl parah ralkap thuneih nak pawlih hmuhsuam nak le tuahmawh nak thuthang ruangah an thin a nat hleice thu, Democracy cu a duh tu pawl hrangah a zam rang thei bik in an ngah ding tiin an ruah san thu, anmah pawl khal Kawlram mi pawl thawn hmunkhat ten an um thu" an sim. Thlang Korea Catholic Khristian National Council of Churches in Korea (NCCK) Korea Khristian Diocese pawl Council khal in mipi ih duhphorh nak ih dil mi pawl thawn an um thu an lang ter. Thlang Korea Khristian ulenau apwl in April thla karkhat nak vua caan netabik caan tiang ni tin ten Kawlam hrangah nazi pakhat Bawi Jesuh thi le sa upat nak tuah ding ah ruah nak an nei ih an tuah rero thu khal an sim. Himi thuthang cu Yonhap news Agency thuthang ihsin kanngah mi a si.

Source : http://yna.kr/AEN20210312003151315