Thumkom Pathian cu a siat zo mi Leilung pi kilvengtu a si. June 7, 2020

Thumkom Pathian cu a siat zo mi Leilung pi kilvengtu a si.

Pope Francis ih Holy Trinity Zarh pi sun ih sim mi thuthangtha. June 7,  2020

          Pope Francis in hi tin a sim; A thianghlim mi Bawi pathum Pathian pakhat cu minung pawl ih sual nak, that lo nak le siatsuah duh nak hlir in a khat mi hi kan leilung pi "Duhdawt nak thawn Rundam tu" a si a ti. Pathian in hi leilung pi hi tha le mawi zet in a sersiam nan sual nak sung ih a tlak siat hnuah cun hi leilungpi cu that lo nak le siatsuah\pahsual nak in a run philh\khat thluh. Kan zaten sual nak nei mi kan si theh tiin a sangkaa te ih sin St. Peter square ih a ra tu mipi pawl cu zoh phah in a sim.

          Pathian cu a duh vekin hi leilungpi khal relcat thei tu, sual nak khal hloter thei tu, that lo nak hmuah hmuah khal pahbal thei tu a si. Asinan leilungpi sual nacing in a duhdawt thotho. Kan ni khal sual nak tuah in dung kan tun caan hman ah in duhdawt tho tho a si.

          Cun, Pope Francis in hi thuthangtha John 3:16 .... sungih Pathian ih tongkam le, tui ni Bawi pathum Pathian pakhat puaini thu thawn pehpar aw in a ruah mi cu a hlawm ve. Hi a tlun ih kan siar mi Pathian tongkam ih a khihhmuh duhsan mi cu ziangasitile, Bawi pathum Pathian pakhat asimi Pa Pathian, Fapa Jesu le Thiangthlarau Pathian ih an hnatuan tumbik cu leilung le a minung pawl rundam dingih a duhdawt nak lawng hi a si.

          Cu le hi ti'n a sim bet; Pa Pathian ih in duhdawt nak a tum zia hi cu a fapa neih sun Jesu le Thiangthlarau Pathian cu kanni leitlun misual pawl run ding in a run thlah nak hi a si. Curuangah Bawi pathum Pathian pakhat hi Duhdawt nak a si ti hi kan hmufiang thei a si. Hi leilungpi a thar in sersiam dingin le run dam\suak sal ding hi a duh thusam mi a si. Cumiih tlun ah a hleice in a sim mi cu, tui ni cu "Pathian in i duhdawtnak" timi ruahsan nak fiang te'n kan hmuh thei mi ni a si.

          Pope Francis ih rel dan vekin, Christian nun neih timi cu Pathian duhdawt nak a cohlang thiam tu, a mah thawn pawlkop aw thei ringring tu, le a mah hawl ringring tu, mai nunnak ah Pathian hi a hmaisa bik ih a ret thiam tu ti nak a si a ti. Hi ti'n a sim theh hnuah " Aw a thianghlim mi Nu Maria, Bawi pathum Pathian pakhat thawn a um camcin tu, hi leitlun kan nun sung nun man nei dingin le lungawi nak thawn khat in Pathian ih duhdawt nak kan thinlung sungih kan hmu ringring thei nak dingin in bawm hram aw. Cun kan tumtah nak hmun asimi Vancung ram lamzin kan pan suak thei nak ding khalin in kaihruai hram aw" ti'n thla a cam.

          Angelus thlacam nak a nei hnu ah hi ti'n mipi pawl hnenah a sim. Hitivekin hi tawk hmunah hitizat nan rat thei nak in, Italy ram sungah Coronavirus hi a hlo vivo thlang ti a lang fiang tin a ti tikah mi sen pi in lungawi zabeng in an lawm. Asinan Pope in ralneh nak aw thawn au ding ah a tuan tuk lai. Harhdam nak le humhim nak lam ih thlun dingmi daan an tat mi pawl kha hngilh lo ten thlun ding in thu a cah.

          A hrek khat ram dang ah coronavirus ruangih a thi mi le a na mi tampi an um lai. Ram pakhat ah tla cu minute 1 ah mi 1 a thi ti thu tla a sim. Himi thu hi kan dung June 5, 2020 ih Brazil ram ih Folha de San Paulo news paper ih cahmai pi bik ih an tar lang mi "covid-19 in Brazil mi pawl minute 1 ah mi 1 a that" tiih an ngan mi sung ta a sim. Brazil ah nazi 24 sungah mi 1,473 an thi ti a si. John Hopkins University covid-19 dashboard ih an tar dan vekih zoh asile Brazil hi leilungtlun pumpuluk sungah nat ngah tu tam bik nak ram 2 nak, a thi mi ah ram 3 nak a si ti a si.

          Pope Francis in nat tuar tu pawl le an innsungsang pawl, cun a zoh ih a tuamhlawm tu pawl nan zate nan tuar vekin kei khal ka lo tuarpi ve a si tin a ngaihsak nak thu tla a sim.

          A netabik ih a sim mi cu; tui June thla hi Jesuh thianghlim thinlung biak nak, upat nak hleice ih pek caan tin pawlpi in zirh mi a si. Curuangah, ka nauhak telai ih ka pi in zirh mi thlacam nak tawite thawn thlacam tlang ding in mipi pawl ka lo sawm tin a ti. An thlacam mi cu hitin a si. "Aw Jesu ka thinlung hi nang mai thinlung vekin run si\cang ter hram aw" ti asi. Thungai in, Pathian ih zangfah nak, sual ngaidam nak le thinlung nem nak timi thluasuah pawl kan dong thei ringring nak ding, cerh ti hmun pi hi cu Jesu Khrih ih minung le Pathian a si nak thinglung hi a si. Nan ni khal a hmaisabik nan nun ah Jesuh ih duhdawt nak hi thupi bik ah ret thei tum ringring uh tin a forh.

          Pathian duhdawt nak a tak in a um ngaingai nak hmun, Thianghlim Sacramentu ah biaknak pek thei ringring dingin zuam uh si. Cuticun, kanni khal a mah Jesuh vekin nuam teten kan thinlung tla a tha vivo ding, sau tla a sau ding, mihrang ih that nak pek thei tu tla kan si ding tin a sim. Hi mi thuthang hi CNA thuthangih kan ngah mi a si. A rak ngai tu nan zate parah Pathian thlasuahnak um hram seh.

https://bit.ly/2YefJQi