Tokyo Archdiocese cu Catholic Olympic lektu pawl hrangah thlarau lam program pawl a um nawn lo thu than. (July 21, 2021)

 Tokyo Archdiocese cu Catholic Olympic lektu pawl hrangah thlarau lam program pawl a um nawn lo thu than.

July 21, 2021

            Tokyo Archdiocese cu Catholic Olympic lek tu pawl hrangah thlarau lam program pawl a um nawn lo thu than. Inntek tiin Japan ram ih tuah dingmi Olympic puai cu thaisun ihsin thok ding asinan covid pulh nat pi cu leilungtlun ah a um rero lai. Nat suan awk nak a darh rero lai. Cazin vekin Japan ram ah covid nat nei mi 848000 an um ih, nunnak a cem tu 15000 an um. Curuangah ram sung tuah dingmi ziangvek program khal siseh check fel dingah a tul.

          Harhdam nak lam tih phan nak a tam vivo ruangah Olympic puai ih a thleng tu ding Catholic lek tu ding pawl hrang thlarau lam thawn pehpar in tuah sak dingah Tokyo Archdiocese in program annei lawk nan cui program pawl zaten an thulh. Himi thulh nak thawn pehpar aw in Tokyo Archbishop Tarcisio Isao Kikuchi in "Tokyo Archdiocese sungih Parish tinkim cu Olympic puai ih a ra tu ding lek tu pawl ih thlarau lam tul mi pawl theih tawk in bawm dingah a sim thu, asinan nat suan awk nak ruangah kilhim awk a tul vekin a hlan ih thu botcat mi pawl an thulh sal thu" a sim.

          A hlan ih tuah mi program ah Catholic Olympic lek tu pawl zaten tel thei dingah tumtah in ram tin hman mi tong pawl thawn Cathedral ah nitin tuah dingah, cutivekin Rosary cam nak khal ahleice program tiin an telh. Rinlopi'n Tokyo khuapi cu cozah in pulhnat ih a thupi mi dinhmun tiin an than ruangah lek tu pawl cu an um nak inn ihsin feh vah nak an on lo. Cutivekin Siangbawi pawl khalin an hnen ah feh in thlarau lam thazang pek nak a um thei lo ding.

          Bishop in ziangvek hmun khal siseh tuah ding mi thlacam nak ah covid do kham nak ralrin pek nak pawl thlun dingah, lek tu pawl khal Biakinn pawl ah feh lo dingah, ziangruangahtile pulhnat karh nak cu karh loin kilhim dingih tuah nak ah zaten tel ding a si thu, kanmah pawl dinhmun in pulhnat suan nak a thupi ah ret in tuah rero asi thu, ziangruangahtile kan nunnak kan kilkhawi vekin midang pawl ih nunnak khal kilhim ding tuanvo kanneih thu, curuangah biak nak lam program pawl line pawl ihsin thlah ding a si thu, ziang tivek ih ti asi khal le Japan ram ah fur caan a cem zo ih, mi zan ah van ah vangro tla hmuh asi thu, vangro cu hmailam caan ih ruahsan nak hmuh tu a si thu a tha lam in a sim.

          A hman in cun a vei 32 nak Olympic puai cu kan dung kum 2020, July 24 ihsin August 9 tiang tuah dingah nemhnget a rak si zo nan pulhnat ruangah tuikum July 23 ihsin August 8 ni ah an thawn. On puai cu tlawngkai ninga zan 8 Tokyo khuapi ah lek nak ah tuah ding a si. Taksa kim lo Olympic khal cutivek in kan dung kum in tuikum 2021, August 24 ihsin September 5 tiang tuah ding a si. Himi thuthang cu Vatican thuthang ihsin kan don mi a si.

https://bit.ly/3y0SpWC