Tuluk ram ih Bishop pawl HongKong ih Puithiam pawl thawn tu-le-tu tong aw (January 4, 2022)

Tuluk ram ih Bishop pawl HongKong ih Puithiam pawl thawn tu-le-tu tong aw

(January 4, 2022)

            October thla ah Tuluk ihsin Tuluk cozah daan a thlun tu Catholic biaknak lam hotu 15 le Hong Kongih kum upa Catholic Puithiam 15 pawl cu tuletu an tong awk thu Writer thuthang hnen an sim. An tong awknak thu cu “biaknak lam thawn pehpar aw in Tuluk cozah ih daan thlun dingih forhfial nak a si. Tuluk cozah ih biaknak lam daan cu Biaknak lam, nunphung, um tlan daan le ramkhel lam daan suahmi vekih feh dingah a si. Hivekin feh ding asile biaknak lam cu ramkhel lam ih uk nakin a luat thei lo ding timi thaten an thei. Himi daan cu Tuluk President Xi Jinping in 2015 ah a rak din. Himi daan thawn pehpar in, America ram ih leitlun huap biaknak lam zalennak hrang tuanvo neimi Commision in, himi dil nak cu biaknak lam ih fehdaan hmuahhmuah hi maih duhduh ih uk thei dingah tuahmi Tuluk cozah ih socialist daan pakhat a si thu fiang zet in a rak sim zo.

            Hong Kong ih Kohhranpi hrang tumtah in December 4 ni ah Ordination a ngahtu Jesuit Pawlkom pakhat asimi Bishop Stephen Chow Sau-yan cu cui thurelkhawmnak ah a caan kim in a tel thei lo. Hong Kong ram mipi pawl in thuanthu ah ram khel, biaknak lam, Gospel thuthangtha phuannak lam ah zalennak an rak nei ko. Asinan Tuluk ram ahcun kum zabi a dot dot biaknak lam hmuhsuamnak, cozah thawn hmuhdaan a bangaw lomi biak nak lam hotu pawl kai in kum thla siar in thawngthlaknak pawl a um. Beijing lam ihsin tikulh ram asimi Hong Kong parih an thuneihnak hnget ter tahrat in, cumi a pompi thei lotu pawl cu an rak hrem hai. Hong Kong khal Tuluk cozah ih thuneihnak a var vivo mi parih dodalnak cu tui kum sung ah a rung then-aw bet. Tuluk ram ah Catholic Pawlpi cu Tuluk a cozah ih duh zawng a thluntu le Vatican ih thupeknak vekih a thluntu ti’n phuaih hnih an then aw. Vatican ih lamhmuh nak pawl a thlun tu Pawlpi cu “leitang Pawlpi” tiin an ko ih, Tuluk cozah ih huatnak, mitkemnak lawng siloin kaih, hrem, kum thla siar ih thawngthlaknak pawl khal an tuar. Tuluk cozah ih theihpit nak khal an ngah lo.

            2018 ah Vatican cu Tuluk cozah thawn lungkimnak an ngah. Cui lungkim nak cu Tuluk cozah ih theihpi mi Bishop tuan ding pawl lawng ordination pe bet ding ah a si. Cui lungkimnak cu kum hnih sung a siih 2020 ah a kum an than sal. Himi lungkimnak cu leipar leitang then-awk nak komsal dingah tumtah nak tiin an sim. October thla ih tonawknak ah Tuluk cozah ih biaknak lam thawn pehpar ih a fehpi mi daan le nunphung ih hrambunmi daan a tuahmi pawl khal an felfai ko pam ih, buainak a thlenpi lo ding ti’n lemnak awkam khal rak thlah a si.

            Tuluk ram ih Jesuit Puithiam asimi Benoit Vermonder in kan dung 2018 ah biaknak lam thawn pehpar in Tuluk cozah ih a fehpi daan pawl cu ca in a suah. Cui cauk cu Vatican ih secretary pawlkom pawl in an siar. “Top-down policy timi tlunlam ih thupek vekin thlun thluh mai ding timi fehdaan hi cu tih a nung ko. Ziangahtile, himi hin zumnak lam ih maih sinak taktak pawl a hlo ter thei. Hmansehla, Catholic pawl hin himi thu ah cozah lam ihsin ra kommi a si ruangah thlun lo ding ti khal a si cuang lo.   Buainak pakhatkhat a thlen khal le, Catholic pawl le comunist pawl karlak ah thurel tlangnak a tul” timi thu pawl cuih ca-uk sungah a tel.

Cuihleiah, Fr. Vermander in, “Ziang asi khalle, zumtu Khrihfa pawl hin, Tuluk cozah ih thu fehpi daan vekih thlun ding ih a dilnak an ngai ve ih, khui tawk zawn ah thlengawk ding a tul ih ziangvek ralrinnak a tul ti vek pawl khal an ruahkhawm a tul” ti’n a rak ti bet.

            (May, 2019) ah Vatican ih secretary asimi Cardinal Pietro Parolin in, “unphung hrambun ih biaknak fehpi daan le Tuluk cozah ih biaknak lam a fehpi daan hi fehtlang thei le bawmaw-ton thei an si. Himi pahnih cu pakhat le pakhat an hnaihnok awk lo vekin, pakhat le pakhat khal an pial aw lo” tiah Tuluk cozah ih suah mi “Global Times” thuthang ah a sim. Hmailam ah himi thulu kha thuk zet in ruat sal ding ih a tul thu, ahleicein “nunphun hrambun ih biaknak fehpi daan le Tuluk cozah ih biaknak lam fehpi daan” ih pehtlaih nak hminsin in, Tuluk cozah lam ihsin khal biaknak ih um daan pawl le zirh mi pawl ziangah rel loin um loin ziang tin tuah thei ding timi thupi ah ret in tuah a tul. Nunphung hrambun ih biaknak lam fehdaan cu Gospel thuthangtha phuannak pakhat a si. Cumi thuthangtha phuan tikah rahtha rah thei ding cun, thuthangtha ih zirhmi a muril hloh ter lo ding le, minung ih hmuhtonmi le nunphung umdaan ih zirin phuan thiam a tul thu khal a rak sim bet.  

https://bit.ly/3Jt2ReY