Ukraine ih Pathian riantuan pawl a tui dinhmun ruangah ramri khuapi ah relh in mipi pawl thawn um in an theih tawk in bawm March 4, 2022

Ukraine ih Pathian riantuan pawl a tui dinhmun ruangah ramri khuapi ah relh in mipi pawl thawn um in an theih tawk in bawm

March 4, 2022

              Lviv khuapi cu Ukraine ram ih nitlak nak lam ah a um ih, Ukraine nitlak nak lam ih khuapi tiin khal ti a theih. Cui khuapi cu Russia pawl ih rapthlak zet ih mi thah nak ihsin a tlan ih a luat tu pawl hrang ahcun an colh nak khuapi a si thlang. Cumi ihsin a dang ramri khuapi pawl asimi Poland, Romania, Slovakia le Hungary ram pawl ah tlan dingin dinhmun hngak nak hmun a si. UN ih an thu suah nak vekin Russia le Ukraine an do awk caan ihsin thokin nauhak 7.5 tan hrawng cu tih a nung mi dinhmun ah an um tiin an sim. Lviv khuapi ih ramri ah um in Italy Pathian riantuan pawl in cui tih a nung mi hmun ih a um tu nauhak pawl, nu pawl an bawm rero. Italy ih Pathian riantuan tu Puithiam Fr.Moreno Cattelan cu a hmaisabik bom nak a pe tu ding pawlkom thawn Romania ah a feh.

              Fr. Moreno Cattelan cu Italy miphun Puithiam pakhat asi mi Don Orione dinmi “Sons of Divine Providence” Pathian a ruahsan tu fapa pawl pawlkom sungtel pakhat a si. Nauhak pawl him dingah an timtuah hnu ral buainak hmun ah a ra sal. Ral a buai rero nan mah vial luat dingah a silo. Harsat tuar pawl thawn hlawm aw in tuar dingah thukam nak a tuah ruangah mipi pawl tan in a kir lo ding. Ziangvek dinhmun khal siseh netabik tiang mipi pawl thawn a um ding. Ral buai nak a natsa mi hmun ah cun dungsip in, Lviv ah cawl in nauhak pawl le nu pawl theih tawk in a bawm.

              Lviv ah anmah tuamhlawm nak hmun ah khan, tak kholh nak khan, rawl suan nak a um. Nau neih nak thlakhat lai lawng asimi naute nu pakhat naute thawn an um. Cui dinhmun ah cui naute le nu hnen a tuvek mi tamsawn um nak hmun thawn a kaih aw lo. Cui Puithiam cu Ukraine ih rian a tuan nak kum 17 a si zo. Curuang khalah amai dinhmunin a pahnih nak a inn vek asimi Ukraine tlansan in a ram rori ah ziang ti hman in a tlung thei lo. A cang mi hmuahhmuah mipi pawl thawn um dingah a bot cat aw. Cumi hrangah Ukraine miphun, mai daan kel, nunphung, biaknak lam kaihhnget nak, lungrualnak, hmunkhat tenum thiam nak, sinak, miphunphun khat sinak cuvek pawl cu a hrangah a nunram then vek asi tiin a ruat. Europe ih biaknak lam pawlkom tampi thawn cozah asilomi pawlkom thawn pehzom in ral ih harsat tuar pawl zangfah bomnak pawl peknak, a him mi hmun pawl ih kuat nak pawl an tuah. Himi thuthang cu Rome Reports thuthang ihsin kan don mi a si.

https://bit.ly/3pNL22L