Ukraine ram dung ah Pathian a um. (February 24, 2022)

Ukraine ram dung ah Pathian a um.

(February 24, 2022)

            Mani ah Russia in Ukraine ram a dothoknak thuthang cu ram kang vek a si. Himi dinhmun ih thleng lo dingah Pathian thulam thawn caan tampi la in thurelkhawm nak an tuah. Asinan san nei loin atuvek dinhmun thlen a si nak a si. Ukraine cu nisuahnak Europe ram pakhat a si. Ramri asimi Russia theh ah leiram um daan vekin Europe ram pawl lakah a pahnih nak a kau bik ram a si. An khuapi cu Kyiv asiih, mipi cu 2020 ih cazin an lak nak vekin tan 44.13 a ummi ram pakhat a si. Russia in Ukraine cu an do nak ruangah ral ram ih an rualpi asimi ram pawl an tel dingih aveithum nak leitlun ralpi asi thlang ding tiin khal thenkhat in an thin a phang. Kawlram mi thenkhat khal in Ukraine thuhla hnakin, Kawlram thu ah thinlung ret dingah, Ukraine ram ah Europe NATO pawlkom pawl a um. Kawlram ah kawlram mi lawng an um tiin khal an ngan. A hman. Pom a si. Asinan cangan tu dinhmun in Ukraine thu ka ngan ding. Ka ngan dingmi cu Ukraine dung ah Europe le NATO pawl an um timi hnakin Pathian a um tiin ka ngan duh nak a si.

Miraltha pawl, Mithianghlim pawl suahnak

            Ral a thok veten ralkap pawl in raldo dingah mipi pawl an timtuah. Cutivekin thlacam nak hriamhrei thawn raldo dingah khal ti daan a phunphun thawn thangphok tu pawl khal an thangphok rero. Hivekih thlacamnak ah a tlamtling zet mi cu an leiram ihsin an thisa, an sungkhat, rammi Mithianghlim pawl ih hmin Litany camnak cu a tlamtling zet mi thlacam nak a si tiin cangan tu cun a ruat. Ziangruangahtile himi leiram thu, himi miphun thu, himi miphun ih thinlung ruah daan, himi miphun ih thu dik an duh nak, ram khel, nunphung, sumdawn nak dinhmun zaten a thei tu an si. Ukraine cu mi raltha le Mithianghlim tampi suahnak leiram a si. Curuangah ral a hrang rero zo nan ral buai nak ur kang sak a tuar tu cui hmun ih mi raltah pawl le mi thianghlim pawl thawn hmunkhat ten um in remdaihnak Pathian hnen tan ta in thlacam a si. An ram suak miraltha thar 27 an um. Cui 27 thawn thla an cam.

            Kawlram ahcun miraltha suak dingah rel hlah. Mithmai sia deuh ih zoh hman ah an cang ngam nawn lo.

An ram a kilkhawi tu Bawinu Rosary

            Rampi ih vanthat vansiat nak cu Bawinu ih thlacam sak nak khal phur zet in an dil. Siangpahrang Yaroslaw in Ukraine khuapi Kyivan Rus cu Bawinu hnen 1037 ah a rak hlan. Thenkhat thu vekin Yaroslaw in Europe cu Bawinu hnen hmaisabik a hlan tu khal a si tiin khal an sim. Latin tong thawn “Subtuum” mirang tong in “Beneath thy Progection” Kawl tong in “Bawinui duhdawt mi fale pawl” hla cu hlanlai ih ummi Bawinu hnen ap nak hla a si. Himi hla cu kum zabi 3 ah hla asithu mifim pawl in an rak ruat. Himi Bawinu hla cu Catholic lawng siloin, Orthodox pawl khalin an sak. Covid theh ah Pope in himi hla cu Bawinu upat sunloih in, pulhnat hlo dingah a hlan ter. Ziangvek dinhmun asi khal le Bawinu rinsan dingah hlanlai thlarau lam saya pawl in ruahnak an pe. A tu khalah Russia ih do an tuar ruangah Bawinu ih bomnak dilnak, kilhim nak dil a si.

Ukraine ih dinhmun cu Pope Francis khal a thin a phang ter

            Pope Francis cu Ukraine ah a cang rero mi ralbuai nak hrangah ram hotu pawl mai thinlung zoh fel sal dingah a forhfial. Ukraine ih ralbuainak dinhmun cu Pope Francis ih thin a phang ter. Curuangah remdiahnak ngah loihli dingah Bawinu ih thlacam sak nak an dil. Tuikum January 26 ni khalah Ukraine remdiahnak hrang than in thla a cam ter. Cutivekin 2021 December 12 khal ah “hriamhrei cu lamzin asilo” tiin khal a rak sim.

https://bit.ly/3skfGm8