US Bishop pawl in Hiroshima le Nagasaki khuapi ah bomb an thlak nak kum 75 kim nak hrangah a hlan khan in thla cam dingah forhfial nak an nei (July 14,2020)

US Bishop pawl in Hiroshima le Nagasaki khuapi ah bomb an thlak nak kum 75 kim nak hrangah a hlan khan in thla cam dingah forhfial nak an nei

July 14,2020

            United State ih Bishop pawl in 1945 kum ah Hiroshima khuapi le Nagasaki khuapi ih bomb (nuclear) an rak thlak nak kum 75 kim nak Puaipi tuah hlan ihsin Japan ram ih daih nak a um thei nak dingah thlacam cio dingah sawm nak le forhfial nak an nei.

            July 13 niih an casuah mi ah US Bishop pawl in August 6 ni cu Hiroshima khuapi ih bomb thlak nak kum 75 kim nak ni a si ih August 9 ni cu Nagasaki khuapi ih bomb thlak nak kum 75 kim nak ni a si ve. Hi bomb thlak nak hi raldo nak awk nak ah atomic (nuclear) hriamhrei hman hmaisabik a si vekin a neita bik si ding khal in ruah san nak a um" tiah an ngan.

            2000 kum hnu lam khal ah hmun le ram, ram khel thu ah siseh, ralthuam hriamhrei suah nak thu ah siseh, buai nak tampi a um hrih lai. US Bishop pawl khal in dungsip lo te'n nuclear hriamhrei suah lo ding le hman lo dingah lam ih thang phol nak cu an tuah rero hrih a si.

            1981 kum ih Pope St. John Paul II ih Japan a tlawn hnu in kum tinte'n Japan ram ih Catholic kawhhran in ni 10 sung daih nak hrangah thlacam nak a tuah ringring. Cumi thlun in, tui tum ih bomb thlak nak kum 75 kim nak caan hman nak ah US ih um mi Catholic zum tu hmuahhmuah le thinlung tha a nei mi hmuahhmuah in August 9 ni ih Missa raithawi nak le thlacam nak ah thin khat lungkhat te ih tel tlang khawm dingin US Bishop pawl in sawm nak an nei a si.

            US ih kawhhran in Jesuh Khrih ih rundam nak hrang ih a pumpek nak thawng in kan ngah mi Pathian ih laksawng pakhat asimi leitlun ih daih nak a thar ih a thlen theinak dingah thlacam khawm dingin sawm nak an neih mi a si.

            2019 kum, November thla lai ih Pope Francis in Nagasiki khuapi a tlawn lai ih a sim mi tongkam pawl vun phorh suah sal in US Bishop pawl cun nuclear hriamhrei um lo nak daih nak thawn a khat mi leilungpi hi hmun kip ih mizapi ih ruahsan mi a si tiah an tar lang.

            Pope Francis cun Nagasaki a rak tlawn lai ah nuclear hriamhrei ih hinghro nak do ding cun lung rual teih kan tan khawm a tul. Cule, cuih kan tankhawm nak khal khat le khat rinhlel awk nak pahsuak ih zum awk nak nei thei dingih catbangloih kan zuam lawngih ngah thei mi a si tiah a rak sim.

            Tui tum ah US Bishop pawl in Pope Francis ih ding nak le lungrual teih tan khawm nak par ih a thum aw taktak mi ding nak thawn a khat mi leilungpi dinsuak dingah a thar ih kan zuam a tul a timi khal an lungkimpi thu an tar lang bet.

            An ca suah mi ih net nak ah US Bishop pawl in a tu le a kum khua in dingnak le daihnak leng ringring ter thei dingcun tihphan nak, zum awk lo nak le buainak pawl cu pumpek ih tan rual nak, zumnak le thlacam nak pawl ih an nehta a tul thu an lang ter.

            Hiroshima le Nagasaki ih Bomb thlak nak thutawi

            Leitlun thuanthu ah voikhat lawng cekci raldo awk nak ih nuclear hriamhrei hman nak cu leitlun ralpi voihnihnak lai ah a rak cang dah mi a si. Leitlun ralpi voi hnihnak can lai 1945 kum ah Hiroshima khuapi cu August 6 ah siseh, Nagashima khuapi cu August 9 ah siseh US in bomb a rak thlak dah a si.

            Hiroshima khuapi ih bomb thlak mi in hma khat te ah minung thawng 80 a that cih ih neh hnu ah minung thawng sawm tampi thlanmual a liam ter. Nagasaki khuapi ih thlak mi cun hmatkhat teah minung thawng 40 a that ih khuapi sung ih hmun kaupi a siatsuah.

source: vatican news

https://bit.ly/39cDeOM