Vualuh ni

Febuary 26 hi Falam Catholic Biak inn piah Vutzam culh nak a um ding ti mi thuthang

Kum 2020 Febuary ni 26 ni tlawngkai ni thum ni hi vutzam culh ni a si vekin vua a luh ni, a thawh nak ni khal a si. Falam Catholic Biakinn piah tlawngkai ni thum ni zaanlam nazi 4:30 ah Missa raithawi nak le vutcam culh nak a um ding a si.

 Hi mi niah hin Biakinn ah Missa raithawi nakah tel in vutzaam culh nak sang cio dingah le Missa raithawinakah tel cio diangah kan run lo sawm a si. Hi mi niah hin kan Catholic Kawhhran daan in rawl ulh nak le sa-ul nak tuah dingah in zirh bangin ulh nak tuah cio ding kan si. Rawl kan  ulh tik khalah mi hmaiah uar nak men si lo in Catholic Pawl pi ih zirh mi vutcam culh nakih a sul lam vekin kan mawh kan palh mi sual nak hrangah Pathian hnenah ngai dam dil nak le kan sual nak hrangih kan tuar ding mi sual cawhkuan nakin kan luat thei nak dingah ulh tlang cio uh si.

Burri hruk nak le taksa parih vutcam culh nak cu Judah miphun pawl hrangah an sual nak ruangih sualsir nak, dualcawh kuan nak hi mi pi hmai ih an tuah theu mi ti daan pakhat a si. Hi ti daan hi Catholic Khawhran pi ih tui ni tiang a run tuah mi a si. Vua lut ni le Good Friday ni ah hin a  hlei ce in sa ei ulhnak le rawl ulh nak tuah dingah in zirh a si. Hi mi vua luh ni ah hin a hlei ce in nang cu leidip na si ih leidip ah na kir sal ding ti mi Bawipai tong kam thawn vutcam culh nak kan sang a si. Hi mi thu ah hin ni khat khatah cun kan thi lai ding, leidip ah kan cang lai ding ti mi a thar ih in thei ter nak pakhat tla si. Hi tumtah mi ram kan thlen hlan cu a langte ih khual tlawng mi kan si nak in vunmang ter a si. Curuangah Pathian hmai ih kan sual kan palh nak parah ngai thiam dil phah in Biakinn lam pan tlang uh si tiah kan run lo sawm a si.