Yangon Magis mino pawl a hmaisabik thi hlut nak 26.7.2020

115931647_2998232900274351_8864775421288886585_o.jpg

Yangon Magis mino pawl a hmaisabik thi hlut nak

26.7.2020

            26.7.2020 niah Yangon ih Magis mino pawlkom pawl cu thi hlu nak bank ah thi an hlu tiin theih a si. Magis mino minung (14) in thi an hlu tiin theih a si. Magis mino pawl thi hlut nak cu a veikhat nak asi tiin khal theih a si. Atuvekih thi hlut nak ih tumtah mi cu nulepa puaini le Jesuit pawlkom din tu St.Ignatius ih lamhmuh mi thlunin July (31) niih a thleng dingmi St.Ignatius ih puai ni sunlawih peknakah  thi hlut nak tuah a si tiin Yangon Magis mino tuanvo nei tu Bro.Han Zaw Shing in a sim. Pehbet in Brother in "thi hlut nak cu taksa lam ih zoh ding asile thihlut nakin harhdam nak hrangah a tha. Thlarau lam ih zoh asile thihlut lai caan ah a dam lo ih thi a tul tu pawl, mai pek mi thi in nat nak pawl hlo in dam sal nak ding hrangah vancung um kan Pa thlacamnak kan cam sak. Cuihleiah Brother cu AB thi, hmuh a har zet mi thi a si ruangah atuvekih a hlut thei cu a lung a hmui zet" tiah thi hlut daan le thi hlut nak ih ruah daan pawl a sim. Bro cu a tui in a veithum nak thi a hlut nak khal a si tiin khal theih a si.

             Sunzom vivo dingah thihlut nak ih a tel ve mi Magis mino pakhat asimi Colette Htet Htet Win khalin"a veikhat nak thi hlut nak asiih a hmasabik cu ka tih. A hlan ihsin thim ka tih. Thi hlu dingih zoh fel nak tuah ding tiang tih nak thinlung ka nei ih ka hlu duh lo ding tiin ka ruat. Asinan ka tuah thei. Ka hlu tengteng ding timi thinlung thawn tampi thazang ka la. Zoh fel nak tuah nak ih ka ong tikah ka hlu. Thi an lak lai khal ah ka thi hi zo in a ngah ding timi ruat in ka lung a kim zet. A tu ka hlu ih neita hlu duh nak thinlung kan nei sal" tiin thi a hlut lai ih a ruah nak a sim. Neita Magis mino asimi Susan khalin "nunnak ah midang pawl bawm thei tikah nunnak cu san a nei vovi tiin ka ruat ih thil tha pakhat ka tuah thei ruangah ka lung a awi. Atuvekih pulh nat caanah minung thenkhat harsatnak an ton caan ah, mah dinhmun a that caan ah mi tampi hrang mai tuah thei tawk ih mi that nak ding hrangih ka thi hlut nak asi. Neita khalah ka hlu bet ding" tiin thi hlut nak thawn pehpar in a sim.

            Pehbet khalin thi hlut lai ih ruah nak an sut nakah "thi hlut lai caanah vancung um kan Pa thlacam nak cam in, ka thi a ngah tu khal ih that nak a si thei nak dingah thla ka cam sak. Nulepa puaini khal a sivekin ka nulepa hrang khal ah ka hlan" tiin a sim. "Amah cu thihlut hlan ih timtuah awk nak khal tuah asithu atuvekin a sim". Aveikhatnak thihlu dingih ka feh laiah Hemoglobin tha na mal tiin in hlu ter lo. Curuangah tui tum cu Tandat a tel mi in le ei pawl ka ei. Thazang ngah nak ding rawl ka ei. Ih khop zet in ka it" tiin Susan in aveikhat nak thi a hlut daan khal a sim. Yangon Magis mino pawl cangvaih nakin a tu vekih thi hlut nak cu a veikhat nak asi tiin khal theih a si. Magis mino pawl cu a hlan ah thla tin tonkhawm awk nak an nei nan covid-19 ruangah minung pumkhawm nak tuah a ngah lo ruangah Online lawng in Zoom meeting  in Online Program pawl an tuah ih lockdown theh hnuah a tuvek in thihlut nak a veikhat nak a leng suakin cangvaih nak pakhat asi tiin theih a si. 

Add new comment

1 + 6 =