Zaangfah lainatnak kan ngah vek in mi lainattu si hram uh si! (April 11, 2021)

Zaangfah lainatnak kan ngah vek in mi lainattu si hram uh si!

April 11, 2021

          'Zaangfah lainatnak Jesuih puai ni' ih Zarhpi ni ah Pope Francis in Christian pawl hnenah Bawi Jesuih zaangfah lainatnak ngah thei dingin a rak sim.

          Jesuh Khrih in a mai remdaihnak ngaidamnak le a hriamhma pawl ihsin in rak hlawm. Cui zaangfah lainatnak cu midang pawl thawn hlawm awk nak in rulkir sal dingah a rak forhfial.

          'Remdaihnak, ngaithiamnak le Bawi Jesuih lainatnak thawngin mi thar si hram uh si. Zaangfah lainatnak thu teette khaan tu si thei dingah thluasuah pawl dil cio uh si.

          "Hi ti zawng in kan zumnak nung ter in kan nunram khal pumkhat te in a um ding. Hi ti zawng lawng in zaangfah lainatnak a langsar ter tu Pathian ih thuthangtha sim a si ding," tiin Pope Francis in Easter Zarhhnih nak ih hman mi 'zaangfah lainat tu Jesuih Puai ni' Zarh pi ni Missa sumnak ah a rak sim.

          "Duhdawtnak cu kan mah hrang lawngah si sehla zumnak cu cem ral men in thathnemnak um lo mi ruahnak vek ah a cang ding. Midang pawl tel lo mi zumnak cu nunnak tel lo mi taksa pum vek a si ding.

          "Zaangfah lainatnak hnatuan a tel lo ah cun zumnak cu a thi a si," tiin Pope Francis in 1994, Rome khuapi ah "Divine Mercy" Biakinn ti'n Pope St. John Paul II in mipi theih ih a rak nemhnget mi Vatican kiang ih um Sassia ih sak mi 'Santa Spirito' Biakinn ah a rak sim.

Pope Francis in Sassia ih sak mi "Santo Spirito" Biakinn ih Missa raithawinak

          Covid pulhnat ruangah thlun ding mi daan pawl kilhim in Missa sumnak ah minung 80 lawng an rak tel thei ih thawnginn sung ih a um tu mipa pawl, nunau pawl, nurse pawl, mi harsa pawl, rinsan ding nei lo mi pawl tel in "Missionaries of Mercy" ti mi ih Puithiam hrekkhat pawl khal Pope thawn Missa sumnak ah an rak tel. Missa sumnak ih mipi pawl tel thei dingah facebook ah khal an rak tarlang.

          Pope Francis in a thusim nak ah Bawi Jesuh in a dungthluntu pawl ih thinlung a thangphawk ih an nunram ziangtin a thleng aw ti a vun mangsal.

          Dungthluntu pawl in zaangfah lainatnak an rak co ih an mah rori mi zaangfah thiam tu ah an rak cang. Bawi Jesuih hnenin remdaihnak, Thiang Thlarau le Jesuh Khrih ih hriamhma ti mi thluasuah pathum ihsin zaangfah lainatnak an rak ngah.

Remdaihnak

          Bawi Jesuh a thih hnu ah dungthluntu pawl cu an nunram ih duhsan hlo in an mai Bawi cu tantahrat in an sual an sir ih tihphannak thinlung thawn khaan sungah an rak relh.

          Asinain, Bawi Jesuh cu an lak ah dingin 'nan hnenah daihnak um hram seh' tiin cibai a rak buuk. Bawi Jesuh in harsatnak um lo in remdaihnak a pek dah lo.

          Asinain, thinlung sungih zumnak a nei tu pawl hnenah daihnak a rak pek. A lenglam  ih hmuh theih mi daihnak vek si lo in thinlung sungih a cam ringring mi remdaihnak vek a si.

          Bawi Jesuih remdaihnak in dungthluntu pawl cu an sualsir nak in Pathian riantuannak ah a feh ter. Bawi Jesuih remdaihnak cu a ol sam mi le a dem deuh mi pawl a tel lo nain kan thinlung um tu daan pawl a si mi harsatnak pawl a cang ter tu mah le mah humhim awk tuk nak, thinlung pawl pahsuak thei lo in thawng tlak ter tu, mai duhnak pawl pah bal thei dingih hniksaknak pawl a tel.

          St. John Henry Newman in 'mah le mah kan duh awk hnak in Pathian in in duhdawt sawn' tiih a rak ngan vek in dungthluntu pawl khal in Pathian in mawhthluk men lo in sualcawhkuannak a pek siang lo thu an rak thei thiam.

Thiang Thlarau hnen ihsin ngaithiamnak

          Bawi Jesuih zaangfah lainatnak langter daan a pahnih nak cu sualnak pawl ngaidamnak hrangah Thlarau Thianghlim hnenih thlah nak a si.

          Kan nih in kan mah ten sualnak kan hrial thei lo. Pathian lawng in cui sual nak pawl in hrial sak thei. Pathian ih zaangfah lainatnak thawngin beidonnak hmun in kan luat thei. Curuangah kan mah rori ngaithiamnak ngah a tul.

          "Thiang Thlarau ah ngaithiam nak cu thinlung nungsal dingih a tuah thei tu Easter laksawng a si," tiah Pope Francis in sim phah in Christian pawl hnenah Sualthlahnak Sacramentu pom thei dingah thluasuah dil a tul thu a rak forh.

          Sualthlahnak cu kan mah pawl le kan sual nak pawl thuhla lawng a si lo. Pathian le a mai zaangfah lainatnak thu a si sawn. "Sualthlahnak cu a thianghlim mi lainatnak, thawhsalnak Sacramentu a si" tiah sim phah in sualthlahnak cu mi zaangfah thiam tu pawl hnenah a thlum zet mi zaangfah lainatnak hlawm cio dingin a rak forhfial.

Bawi Jesuih hriamhma pawl (Wounds of Jesus)

          Netabik nak ah Bawi Jesuh in kan hriamhma cu a mai hriamhma ih a lak nak thawngin siseh, kan sambaunak pawl cu a mai taksa par ih a phurh nak thawngin a mai zaangfah nak thawn sual nak ih nen mi kan nat nak pawl a dam ter.

          Bawi Jesuih hriamhma cu kan thinbang nak pawl ih zaangfah nak a luang liam mi, a mah le kan mah lak ih lamzin pawl in on sak. Cui hriamhma pawl cu Pathian ih a duhdawtnak le zo a si thu thei tu dingih tel thei dingah kan hrangih in on sak cia mi lamzin pawl an si.

          Cu mi cu Jesuh Khrih in a mai hriamhma le a thosal mi a ruangpum cu kan hnenih in pek mi Bawipai Thi le Sa sungah hmuh a theih. Tui ni ih Cathianghlim sungah Thomas ih a zum lo nak thu a langter vek in kan nih khal in Pathian kan hawl hmu ih a mah thawn ziangtluk nai in kan um ti thu thei in 'Kan mai Bawi, kan Pathian'  ti mi thu tlang in au ter.

          Zaangfahnak thluasuah ngah nak cu Christian pawl ih khualtlawnnak ih a hramthok nak a si. Pathian ih duhdawtnak co lawngah kan nih in leilungpi hnenah a thar mi pakhat khat kan pe thei ding a si.

Zaangfahnak co nak le hlawmnak (Receiving and giving mercy)

          Hi mi cu dungthluntu pawl ih an rak tuah mi a si tiin Tirhthlah sungta sirhsan in Pope Francis in a rak sim. Zaangfah lainatnak ngahnak thawngin mi zaangfah tu ah an rak cang.

          Communite san lai vek si nawn lo in a thianghlim mi Khristian pawl ih thlun mi daan thuk zet ih a sim nak ah "zohman in ka bul ta ti lo in an rak hmang tlang" tiin a rak sim.

          An tihphannak pawl cu Bawi Jesuih hriamhma an thamnak thawn a rak dam ih tu ah cun an bomnak a tul tu pawl ih hriamhma pawl tham an tih nawn lo.

          Pope Francis in, "thinlung diriam tuk in um hlah uh. Zaangfah lainatnak cohlan nak thawngin mi zaangfah thiam tu si hram uh si" tiah forhfial phah in a thusim a rak cawl a si.

          Hi thuthang cu Vatican thuthang ih kan ngah mi a si.