Zarh khat sung thuthang pawl rel nak le simnak (Nov 26, 2022)

Zarh khat sung thuthang pawl rel nak le simnak (Nov 26, 2022)

Tui Zarh sung kan ngah mi thuthang pawl ka run rel ding.

            India ram, Catholic Puithiam pakhat ih short film pakhat in laksawng pahnih ngah

India ram ih Catholic Puithiam pakhat ih ‘Carlo’ ti mi hmin thawn short film cu ram tinkim film puai ‘Global Taj’ ah laksawng pahnih a si mi short film laksawng le quality tha bik laksawng a rak ngah.

             Christmas caansung Mandalay Archdiocese ah thlun tul mi lamhmuhnak suah

Mandalay Archdiocese ih Archbishop Mark Tin Win in Naute Jesuh suah ni hngahnak ah chritmas Novena khal Dec 17 ah pelh lo ten tuah cio dingah, carol hla sak lo dingah, nuamnak pawl hrial dingah, Christmas thawn pehpar in innsang sungih tuah mi nuamnak, ei in zuk pawl khal social media pawl ih tarlang lo dingah Biakinn pawl, Puithiam tlawng, Sr. tlawng, Biakinn khawnglawng sin pawl cei mawinak tuah lo dingih zaangfah dilnak a nei.

          Philippines ram ah Naute Jesuh puai ni cu 2023 ah ropi zet in tuah ding.

Philippines ram in Naute Jesuh upat sunloihnak an pe. Biaknak lam puai si loin rampi ih puai ti tluk in an tuah. Covid ruangih rak tuah ngah lo mi pawl cu a ralai ding mi 2023 ah a hlan vekin Naute Jesuh ih Basilica Biakinn ah an tuah sal ding thu kohhran mipi pawl hnenah theihternak an nei.

        Capi tiin hmin pek mi Laudato Si ih lamhmuhnak film Cop 27 ah tarlang

Pope Francis ih capi pakhat a si mi Laudato si sirhsan in capi tiin hminpek mi film cu Nov 10, 2022 ah UN ih tikcu caan thlengnak thurel khawmnak ah an tarlang.

          Sri Lanka ih milar minta le radio thuthantu AlFred Perera nunnak cem

Sri Lanka ih milar minta le radio thuthantu Al Fres Perera cu Nov 20, a kum 93 ah nunnak cem. A mah cu Sri Lanka ih thuthang thannak Pawlkom ah reipi hna a rak tuan ih Sri Lanka Parliament ih thuthang latu tiin khal reipi hna a rak tuan.

         Pope Francis in innsang le nunram ah a hmaisabik mi menmen secretary hril

Pope Francis in Nov 17 ah inn sang nunram ih secretary thar tiin Gleisan De Paula Sauza a hril. Kum 38 a si mi Sauza cu Pope zung ih innsang nunram hrangah secretary tiin Pope ih hril mi a hmasibik mi menmen a si.

         Indonesia ah 5.6 tha a nei mi linghnin ruangah mipum 56 nunnak cem ih mi 700 tuamhlawm

Nov 21 ah Indonesia ram ih nitlaknak Java ramthen ih Cianjur khuapi ah 5.6 tha a nei mi ling a rak hnin. Nauhak 40 tel in mipi 56 nunnak an cem ih 700 luan in tuamhlawmnak an lak ih inn 100 luan siatral nak le leiminnak pawl khal a cang.

          Pope Francis in a sungkua pawl umnak, saklam Italy ih um mi a unu veh

Pope Francis in a sungkua pawl umnak Italy saklam, Asti ah Nov 19, unu ih suahcam an tuah ni ah a va tlawng.

         Philippines Pawlpi in ‘Red Wednessday’ cu Nov 23 ah tuah

Philippines ram ih Aid to the Church in Need (ACN) in Philippines ram, Rizal ih Our Lady of Peace and Good Voyage antipolo Cathedral ih kum tin an tuah theu mi ‘Red Wednessday’ ah rampi sungih Christian zaten tel cio dingin a rak sawm.

        Leitlun remdaihnak hrang bawm dingah Indonesia ah Catholic khualtlawng pawl in Pope Francis tong

The Indonesian Catholic Juarnalists Association (paguyu bun warfawan Katolik Indonesia –PWKI) in Pope Francis cu Nov 16, St. Peter Basilica ah leitlun remdaihnak hrang bawm dingah an tong.

        Thluasuah don mi hanghnah hangrah pawl Pathian hnenah hlan

Myit Gyi Naa, diocese, khaan tee khuapi zi phyu khung veng ah St. Colanban hmin lak mi Biakinn puai thawn thluasuah hrang lungawi thusim nak puai cu Jesuh Siangpahrang puai (20.11.2022) zing nazi 7:30 ah tuanvo neitu saya ih hohanak thawn an rak tuah.

            Kyaing Tung Diocese Bishop ih tuanvo ap mi Bishop John Saw Yan in Yangon St. Mary Biakinnpi ah lungawi thusimnak Missa tuah

Nov 19, zing 10:00 ah St. Mary Cathedral, Yagon Archdiocese ah Puithiam nunram in kum (20), Bishop nunram in kum 7, mission riantuannak nunram thawn kum 27 tiang pumpe aw tu Bishop John Saw Yan in lungawi thusimnak Missa raithawinak a rak tuah.

          Vietnam ih Khristian thawng tampi thah tuar tu pawl mannak

Vietnam ram ah 1533 ah Khristian zumnak a thleng ih Vietnam ih Christian tampi cu hmuhsuamnak a phunphun ruangah Mithianghlim le martyr pawl ah an cang. Nov 24 cu Bawi Jesuh ruangih thah tuar tu kan theih mi pawl siseh, theih ban lo mi pawl siseh Vietnam martyr pawl ih puaini a si. 

             The Voice of Italy laksawng rak ngah tu Sr. in a thianghlim mi a nunram tansan

2014, The Voice of Italy ih hla zuamawknak ah mipi thapetu pawl lawng si loin daing pawl khal rak mangbang ter thluh tu Sr. Ceistina Scuccia in a mai Sr. nunram a rak tansan zo.

           Pope Francis in Caritas international hotu zaten cawl ter dingah thubotcat

Pope Francis in tlawngkai nihnih ni ah International Confederation of Charities (Caritas Internationalis) ih hotu upa dinhmun ih tuanvo latu pawl zaten a cawl ter hai ih pawlkom ih hoha daan tha deuh dingah rei lo te sung hoha tu ding pakhat tuanvo a rak pek.

        Irish Puithiam Philippines ih Biakinn tampi design suaitu a kum 97 ah nunnak cem

A mah cu kum 97 a si. 1960 ihsin Philippines ram ih Iligan le Pagadian Diocese le Ozamit Archdiocese ah Parish rian a rak tuan.

          Cardinal Gracias in India ram ih mizo ram innsang tin ah Khrih kha Siangpahrang siseh tiin sim

Nisuahnak saklam, India ram, Mizo ram khuapi Aizawl ah 2022, Nov 18-20 tiang mizo ram ih Catholic kohhran pawl in Platsinum Jubilee (kum 70) an tuah. Thu a sim nak sungah ‘innsang tinkim Aizawl le mizo ram ah Khrih cu Siangpahrang siseh’ tiin Oswald Cardinal Gracia in a rak sim.

        Indonesia Catholic pawl in linghnin ruangah tuamhlawm tul mi pawl bomnak an phuan ih nunnak cemtu khal 264 tiang thang

Indonesia Catholic pawlkom in 2022, Nov 21 Cianjur ih linghnin ruangah cangvaihnak tampi an nei ih mi 268 ann nunnak a liam ih mi 100 an hlo lai tiin a sim.

       German mission riantuantu pakhat Mali ah kaih tuar

German mission riantuantu, Fr. Hans-Joachim Lohre cu Mali ram, Bamako khuapi ah Mass raithawinak tuah dingih tim a tuah rero lai ah a rak hlo tiin Agrica riantuannak pawlkom ih tarlang vekin theih a si. 2017 ah Colombian mission riantuantu Sr. Gloria Cecilia Naravez cu Islamic pawlkom ih kaih a rak tuar ih kumli reihnu 2021 , Oct ah an rak thlah sal.

          Kawlram hrang thla a cam sak ding thu Cardinal Vincent Nicole in ca kuat

Kawlram hrang thla a cam sak ding thu cu 2022 veihnihnak thurelkhawmnak hlan ah England le Wales Bishop Pawl pawlkom aiawhtu Cardinal Vincent Nicole in Cardinal Charles Bo hnenah ca a rak kuat.

           Cardinal Oswald Gracias in seminary thuzirnak ah synodal vek si ding a tul tiin sim.

India ram ih an ram pi huap in conference ah Cardinal Gracias in synodal vek si ding a tul thu a sim.