A dik lo mi hngalnak

A dik lo mi hngalnak

          Veikhatah mipakhat cu a caw pawl ei dingah hrampi hawl dingin a pok. Aw… kan khua lam cu hrampi a mal tuk thlang ruangah khat lam khua ah ka va hawl ding. Cutin a ruat ih khatlam khua ah cun a va feh. Zingsung a hawl ih hrampi tawk zet a ngah hnuah cui hrampi pawl cu hmun khat ah a tawm ih a tum tuk ruangah a liang in a phur thei lo.           Cutikah a liangih pu dingah rua pum a hawl. Rua pum a ngah hnu ah dung le hmai in a  tuah ih puh dingah len hrampi tawm khat lawng a si ruangah a hmailam ah hrampi ttawm thawn a rih zat bangaw mi lungto pakhat kha a ret. Zin lai hrawng a thleng tikah mipakhat thawn an tong aw ih cui pa in hitin ruahnak a pek. “Nang cu na thil rit dingah na tuah aw rero na hrampi tawm kha a hrek veve in thek awla dung le hmai in pu awla a ngah si tin a ti. Ee… si ngai… ka rak ruat thiam lo.” Cutin cuipai ruah nak a pek vek cun a thek ih dung le hmai in a pu.

          Cutin a feh ih tawk fang a feh hnu ah hitin thu a ruat. A thil put cu a nuam deuh ngaingai….  si ngai hiti ruah nak in pe tu hi zo a si” tin a ruat ih theih a duh lala ruangah tuite a hmuh mipai dung in a thil phur mi thawn a hei dawi kir. A va man tikah banghmel tak a aw thawn a sut “Hei hei… hiti na tuah len a tha ding ti ruah nak i pe tu nang mah hi zo saw na si.” Cupa in hitin a sim sal “Kei cu … Khua tin kim ih mithil a dil tu kutdawh pa ka si.” Ziangtin ee… nang cu kutdawh pa na si maw? a ti. Ka si a ti. Cutikah hrampi phur tu pa cu thinheng tuk in hitin a ti… “Keimah si… a thok in ka rak thei ngah lo ih nang kut dawh ih ruah nak pek mi ka pom lo… keimah ten a hlan vek in ka phur sal ding kutdawh pa” tin a ti. Hrampi phur tu pa cu a hlan vek in a hmailam ah a aiawh in lungto a ret ih hrampi tawm cu a phur sal.

          Hi thuanthu ah ziang mi kan hmu thei ti le minung pawl cu kan tuah mi a hman lo ih zoh a rem lo ruangah  ruah nak in petu kha asinak zoh in minau pawl ih ruahnak pek mi cu kan pom sak duh lo… leithlun ah hivek minung kan tam tuk a si. Hi mi thuanthu cu sapyimyodawt sungta thawn kan run lo hlawm mi a si.