Theihthiam nak ti mi cu

Theihthiam nak ti mi cu

          Theih thiamnak ti mi cu menmen thinlungin cu an pe thei lo. Theihthiam nak ti mi cu a ngaingai ih mifim pawl lawng in an pe thei.

          Veikhat veihnih  mah lam ih kan sual lo hman ah ngaithiam kan dil, kan mah lam ih kan luan lo khal le kan ko hmai sak, cuvekpawl an si.

          Lehrul kan duh ko nan thei lo vekih kan um san mi harsatnak pawl, thinlung duh nakah cun fiangfai ten kan tuah duh ko nan kan mai duh nak hnak in khatlam mi kan ruat sawn ih a tulzat ai in kan thinlung kha sau ter ih kan mah lam ihsin thinniam ter lo le a cat thlang ding mi kan pawlkom nak pawl. Curuangah theihthiam nak ti mi cu mi menmen pawl in an pe thei lo ka ti nak asi.

          Asinan mah parih theihthim sak tu pawl asile minung pawl in man hla in ruah a si lo.  

          Hmuhsuan duh nak, uk duh nak, ka tidan, ka duh dan hmuntinkim ah keimah ka hman ti kan ti duh theu.

          Hi mi cu tawk le cin a nei. Tahnak pakhat a lan tikah cun mah par ah a ngaingai ih in theithiam tu pawl, in upat ih in pawlkom tu pawl kan kiangin an tlan tikah kan sun tikah mai kiangah mah lawng si nak le a leng lam minung pawl lawng an tang ding.

          Remcang caan, kiangih kom tu um caan, kaih mi kut pawl a hnget caan sungteah cu zohman ruah a tul lo, thupit a tul lo ti pungsan in a si.

          Asinan nungramah zianghman rei pi a daih mi an um lo. Thlengawk nak ti mi cu ton lai ding mi a si.

          Cumi caanah vate thla kiak vekin khuitawk vanah ka zam ding ti a thei lo ding.

          Ziangtivek thinlung ka nei, ziangtivek in mi ka lehrul sal theu ti mi cu nungramah a thupi tuk.

          Mai caan lawngah mi pawl ih tuahnak ruangah tin sual va puh hlah.

          Vun ruat sal aw. kei mah caan ah teh minung pawl parah ziangtin ka rak tuah maituah vekin kan ngah sal theu.

          Veikhat veihnih theih thiam ding ko duh sak. Mai par ih in theithiam tu kha hleice in man nei zet in ret aw.

          Mitinkim kha na theih thiam sak thei lo hmanah mah par ih a ngaingai thinlung takih in kom tupawl cu theihthiam sak sal ding ko duh sak.

          A ngaingai ahcun theihthiam nak ti mi cu theihthiam sak tuartu in  nuam asi ko nan theihthiam tu cu veikhat veihnih thin a naa theu.

          Curuangah thinnat nak tuar in, in theithiam sak tu kha man nei zetah ret aw.

          Thil ziangziang a si khal le um nawn lo hnu lawngih a man hlat zia  theih ai in, a um lai caanah man nei ter aw. Hrekkhat thil pawl cu na nunram sungah tu le tu an ra kir sal lo ding.

          Theih thiam nak ti mi cu ttongih a duhsan pawl kha a ringring ih theihthiamnak a pe tu pawl lawngin an thei. A ringring ih neh nak a la tu pawl in an thei thei lo.