Daan le Daan ih tumtahmi (thuthangtha sim tu Rev. Fr. Peter Zin)

Daan le Daan ih Tumtahmi

Thuthangtha sim tu Rev. Fr. Peter Zin

October 28, 2020

Duhdawtmi nu le pa, u le nau pawl, Pathian pekmi thluasuah: harhdmnak, lungawinak le daihnak pawl cu nan zate hnenah um ringring hram seh. Tuni October 30, 2020 (Tlawngkai ninga) ni ih kan siar dingmi Bible pawl thawn pehpar in “daan le daan ih tumtahmi’ timi thulu thawn thlarau thazaang kan lak tlang ding in ka lo sawn duh. Kan zumnak thawn pehpar in asilole kan biaknak lam thawn pehpar in ‘daan’ timi thuhla kan rel tik ah mi hrek khat in daan a ṭul lo a ti tu an um vek in, khatlamah kan daan ah hi tin a um tiin cumi daan thawn a kaih aw lo mi cu ziang vek thil ṭha a si khal le a cohlang thei lo tu, a pon thei lo tu, kan daan vek rori a si lo cun a ti tu, khal an rak um lala. Curaungah kan nih hrangah a thupi zet mi cu ziangrungah himi daan hi a ṭul ih himi daan a um nak ih tumtahnak/ tumtahmi thei ziang asi ti hi thei kan ṭul a si.

Tuni kan siar mi Gospel Luka 14:1-6 tiang sung ah Bawi Jesuh in Sabbath ni ah minapa pakhat a damternak thu kan hmu a si. Veikhat ah Sabbath ni ah Bawi Jesuh cu Farasi hotu lakih pakhat ih inn ah rawl zawh dingin a rak feh. Bawi Jesuh ih hnaṭuan daan, a cangvaih daan hi mi ih hmuh kel theih kel vek si lo in a phun dang deuh ṭheu ih curuangah mipi in acuangce in Farasi pawl le a mah a dodal duhtu pawlin ziang a tuah pei tihi ṭha tein an rak thlir ringring ṭheu. An rak thlir ringring ṭheunak san khal cu a sualnak an hawl duh ruangah a si. Cutin an rak zoh rero lai ah mi pakhat a kut le a ke a thling thluhmi minapa cu Bawi Jesuh hnen ah a rak ra. Cumi minapa a dam ter hlanah Bawi Jesuh in Daanthiam pawl le Farasi mi pawl kha thu a sut hmai sa ta. “Kan Daan in Sabbath ni ah mina damter ding a on maw on lo so?” tiah a sut. Mina dam ter cu thil ṭha a si ih cumi thil ṭha cu Sabbath in ah tuah hi a sual lo ti cu Daan thiam pawl le Farasi mi pawl in an thei a si. Daan in a on lo an ti asi le Sabbath ni ah hi thilṭha tuah a ngah lo ti thawn a bang dingih Daan in a on ko an ti a si le Bawi Jesuh ih thil tuah mi ah an lung a kim ve ti a lang ding a si. Thilṭha tuah cu a ṭha ko ti an thei nan Bawi Jesuh a dodal ringring tu an si vek in a thil tuah mi ah an lung kim pi duh lo ih ziang hman ṭong lo in an um men a si. 

Cun himi Sabbath niah mina damternak hi Pathian ih duhlo mi silo in an mah Jew miphun pawl ih ruahnak men ah a sual vek in an hmu mi a si. Pathian thukham pahra ah cu Sabbath ni thianghlim ter ding tihi a thupi bik in a sim duh mi a siih himi par ah Jew miphun pawl in an bet vivo ih Sabbath ni ah thilṭha hman tuah ngam lo tiang ah an cang. Himi Sabbath Ni thianghlim ter ding timi Daan ih tumtahmi sawn kha ruat lo in daan thlun a ṭul ti fang lawng an ruat ih an rak ruat sual vivonak a si. Pathian thukham lak ih a thupi bik cu Duhdawtnak a si ih cumi duhdawtnak sawn kha ruat loin, hngilh ta men in duhdawtnak thawn tuah ṭul mi pawl khal tuah lo ding ah an ruat vivo. Ziang thawn a bang ti si le, thuṭhimnak ah, tuhi Covid 19 ruangah ram tin in ralrin awk nak pek in kan um rero lai hi a si. Ramkhat le ramkhat cu kan bang aw cio lo ih ram hrek khat ah cu inn leng suak tik ah hmaikhuhnak (mask) hmang ringring ding, hmang lo a si le cawhkuan pek ding ti a si. Himi hmaikhuh an hmang ternak, Daan kan ti pei ih, an tum tah mi cu pakhat lo pakhat virus cawn aw lo ding in ralrinnak, khamnak hi asi. Asinan ziang tin a um vivo a si tisile hmai khuh kan hmang lo a si le natnak kan ngah pang ding tiin ralrinnak ah hmang kha a thupi bik ah ret nawn lo in kan hmang lo a si le in cawh pang ding ti sawn hi minung tampi ih ruahnak ah a lut a si. Ṭuanvo nei tu upa pawl ih hmuh thei nak ding hmun ah cu kan hmang ih in hmu lem lo ding tiih kan ruah nak ah cu hmang lo in khal kan um men. A caancaan ah kan zumnak thawn pehpar in daan a um mi pawl khal ah cuvek in kan ruat caan tampi a um ṭheu ding. Curuangah daan kan thlun tikah daan ih tumtahmi kha ṭha ten thei in kan thlun a si le a man nei zet mi daan thlun ah kan cang ding a si. Cuti a silole cu Farasi pawl ih daan thlun vek, cawh kuan ṭih ruangih daan thlun vek khal ah kan cang thei men a si.

Bawi Jesuh in Daan pawl siatsuah ding in ka ra lo famkim ter dingin ka ra a ti ih ziang tin a fam kim ter kan ti a si le duhdawtnak in a famkim ter kan ti thei. Ziangzaing a tuah khal a si le miin hitin an tuah ṭheu timen siloin duhdawtnak thawn ṭha dueh in a tuah ringring asi. Sabbath ni ih minapa a dam ter nak khal ah Jew miphun pawl hmuh daan ah cu nidang ah tuah seh la ti hi an duh men ding. Asinan Bawi Jesuh ih hmuhnak ah cu Sabbath ni ah a fapa asilole a neih mi caw tikhur sungah a tlak mi vek in a hmu. A tu rori ah bawm a ṭul, a tuarnak a har tuk ti kha Bawipa ih hmuhnak kha asi. Farasi pawl le Daan thiam pawl ih Daan thlunding kha a thupibik in an zoh lai ah Bawi Jesuh in cu minapa ih a tuarnak a thupi dueh in zangfahnak le duhdawtnak thawn a hmu a si. Bawi Jesuh in Daan a siatsuah a si maw tisile a siat suah a siloih an ruat sual mi sawn kha a rem sak duh mi sawn a si. Daan thlun tikah daan ih tumtahmi thei in a thupibik mi kha hngilh lo ding in kan Bawipa in in zirh a si.

Farasi pawl le Daan thiam pawl in a thupibik mi daan pawl ih tumtahmi a simi mi duhdawtnak kha hngilh in a daan fangfang lawng thlun an tum ruangah Bawi Jesuh in an sualnak pawl thei dingin a khihhmuh sak ringringnak a si. Kan pawlpi sung khalah thlun ṭulmi daan tampi kan nei ve ih cumi daan pawl ih a netnak ih tumtahmi kan zoh a si khal le Pathian duhdawtnak le midang pawl duhdawt theinak ding hrang ah a si. Tuni a veikhatnak kan siar mi Filipi 1:1-11 sung khal ah St.Paul in duhdawtnak hrangah thla in camsak a si. ‘Pakhat le pakhat nan duhawknak cu theihnak dik le thu thleidan thiamnak thawn a ṭhangso vivonak dingah thla ka cam a si. Cutiin nan ṭhang a sile a ṭhabikmi kha hril nan thiam ding,’ a ti. Duhdawtmi nu le pa u le nau, daan  kan thlun tik ah daan ih tumtahmi a si mi duhdawtnak kha hngilh lo in a thlun theitu, duhdawtnak le zawnruahnak ah a ṭhang sinsin tu kan si thei nak dingah Pathian hnen ah thazang ding in zuam cio uh si. Pathian in in thluasuah cio hram seh. 

Fr. Peter Lal Zin Thang (Hakha Diocese)