Mithianghlim Kan Si Maw? (Sim tu Rev. Fr. Polycarp Thawngte)

Zarhkel (31) nak Zarhpi -A (All Saints Day)

Mithianghlim Kan Si Maw?

Thuthangtha sim tu Rev. Fr. Polycarp Thawngte

Tuini cu kan hrangah a sunglawi hleice mi Zarhpi ni a si.  Mithianghlim pawl puai kan tiih kan zate ih Puaipi a si kan ti le a sual lo ding ruangah nan zate’n Bawipai thluahsuah hmuifu phunkim co tlang uh law, Happy Feastday ti’n cibai ka lo buk.  Tuini hrang ruah khawm dingah ziang a tha ke aw ti’n Siangbawi upa-1 ka ron/suh tikah “Pawlpi ih mithianghlim a timi sungih tel lo nangmai nun ih na hmuhton mi mithianghlim an um maw ti hi ruat hnik awla” i ti-ih cucu ka lungkim zetmi a si.  Mithianghlim pawl Puaini kan ti mi hi ruah rero tikah Pawlpi ih mithianghlim ti-ih a than cia mi pawl lak hmanah sunloih hleice ni phulo tampi an um ding tlunah, Pawlpi in mithianghlim ti-ih than thei hrihlo mi, kan theih banlo siseh, kan theihmi sung hmanin siseh, mithianghlim ti tlak an um lo pei maw?  Himi in ka tlangval (bro.) laiah Christian unau dang thawn Bawinu Maria upatnak thawi pehpar in thu kan rel tikih ka rak sim dahmi i mang ter sal.  “Marih cu minung a si ko si ziangah a hnen ih bomnak dil rero ih thla cam tul?” in ti.  Cutikah kei in “Marih cu a Fapa Zesu, Pathian a si ih anih cu ret hrih in amah lo, a dang mithianghlim tampi hnen khalah bomnak dil in thla kan cam lai.  Cuihhleiah nangmah hman hitluk ih Pathian duhdawtu le mitha na si hi, na thih le nangmah lo upat in na hnen hmanah bomnak lo dil ih thla cam ka tum.  A mithianghlim pawl cu Bawipa in a hmang thei si.” tin ka rak ti dah.  Asinan tuni tiangah cuti’h thla ka cam ngaingai hi ka thei aw hrihlo.  In taan santu ka pi le pawl le siangbawi pawl ruak thlah tikah cu thla in cam sak dingin ka rak dil dah.

Unau, nang teh cuvek in a thizomi pawl hnenah thla na cam dah maw; silole, cuvek thlacamnak hi sualnak a si ti’n na ruat maw?  Na ruah pang le cu palhpi ih palh a si men ding ka ti.  Ziangahtile, Pawlpi in mithianghlim ti’ih a than hlanah cuih a thizotu ih hmin ih mangbangza langnak a rak dil theu a si.  Curuangah zumtu pawl in a thizotui’ hnenah thla cam in mangbangza bomnak dil a si.  Kan Lairam le kan dinhmun ah cun hivek tiang thleng dingin zo hman tuanvo la tum le a paih tu khal kan um lo si men ding.  Kan dung lai ah Lumbang fa pakhat in ziangah Fr. Muffat vek tla mithianghlim a si thei lo ding maw i rak ti dah ih Pawlpi ih tahfungih mithianghlim tling ding cun kan theihnak, kan neihnak, kan tuahnak in a tlin lo si thei ka rak ti dah.  Lumbang kum-2 ka um sungah Fr. Muffat ih sambaunak, thianhlimlonak an relmi hman ka thei dahlo.  Minung cu zo hman a famkim kan um lo kan ti ko nan kan Missionary pawl cu kan nel ngam lemlo ruangah teh si pei maw, rel siat an hlawh lo nasa in ka hmu.  Fr. Muffat tla cu tui a damlai mi tampi in kan theih le kan hmuh mi, nelmi hman a si men ding.  Cumi rori hman a hnenin bomnak dil in thla kan cam dah lo cu maw.  Kanmah in zumnak thawn hram kan thawh lo ah cun zo hman in in ra fial rero lo ding. 

Curuangah ka forhawk duhmi cu thaisun Nov.2 ni cu All Soul’s Day timi a cafang vekih kan leh cun “Thlarau Hmuahhmuah ih Ni” ti a si ding.  Kannih cun a thizomi pawl hrang thlacam nak, Kawl tla cun “Thlanmual Meivan Puai” kan ti theu men.  An hrang thla kan cam sak lawng kan ruat theu men ding nan, cumi kha kanmai hrang khal a si thei mi a si; culo le an hnen ih thla kan cam ding mi khal a si; ziangahtile, zo in vangcung ah Bawipai hmel a hmu ti kan thei lo.  Tuini kan Thuthangtha Mt 5:8 ah “Thinlung a thiangmi pawl cu mi thluasuak an si; ziangahtile Pathian an hmu ding” a ti.  Meikangramte/ Hellfate kan ti theu hi Fr. Mangte in “Thianternak Hmun” ti sawn ding kan si ti’h in sim dah zo bangin cuih hmunin zo an thiang/luat zo ih Pathian an hmu, zo an um lai ti kan thei lo ruangah thlacam sak ding hrimhrim cu kan si.  Cucu “mithianghlim pawl pumkhat sinak” timi Dungthluntu pawl ih zumnak kan tawmmi sungih kan phuanmi a si. 

Kan thutlangpi ah lut sal sehla, mithianghlim kan si maw kan ti le himi “mithianghlim pawl pumkhat sinak” thawngin mithianghlim kan si ve a si. Ziangahtile, CCC. 946 sungah Mithianghlim pawl pumkhat sinak timi cu Pawlpi/Kohhran a si.  Cuih Kohran cu Khrih ih Ruangpi a si ih Khrih cu Kohhran ih Lu a si ti’h mithianghlim Paul in in zirh vekin Khrih ruangah kannih khal a ruangpi Kohhran sungtel kan sinak thawngin mithianghlim kan si.  Asinan, a borhhlawh mi thisa thawi nunglai mi kan si ruangah sualnak sungih kan tlak tikah a Kohhran thawngih thianhlimnak, famkimnak kan ngahnak a simi Pathian zangfahnak dil ding kan hngilh lo pei uh.  “Minung kan si si, mi famkim kan um lo pi” ti’n mah le mah thlah thlam aw men ding kan si lo.  Kolose 1:22 sungah “a Fapa taksa ruangpum rori in thihnak a tuarnak ruangah Pathian in a rualpi-ah a lo tuah zo. Cutiih remnak a tuahnak cu mi thianghlim, mawhnak nei lo le soiselnak um loin a hmaika ih thlenter a lo duh ruangah a si” in ti.